اسقار مامين تۇركيا پرەزيدەنتى رەجەپ ەردوعانمەن كەزدەستى

None
None
انكارا. قازاقپارات – ق ر پرەمەر- ءمينيسترى اسقار مامين تۇركيا رەسپۋبليكاسىنا جۇمىس ساپارى اياسىندا پرەزيدەنت رەجەپ تايىپ ەردوعانمەن جانە ۆيتسە- پرەزيدەنت فۋات وكتايمەن كەلىسسوزدەر وتكىزدى.

سونداي- اق قازاقستان- تۇركيا ۇكىمەتارالىق ەكونوميكالىق كوميسسياسىنىڭ وتىرىسىنا، ەكىجاقتى بيزنەس- فورۋمنىڭ اشىلۋىنا جانە تۇرىك بيزنەسىنىڭ كاپيتاندارىمەن كەزدەسۋگە قاتىستى. بۇل تۋرالى قازاقپارات primeminister.kz سايتىنا سىلتەمە جاساپ حابارلايدى.

«ەلدەرىمىز اراسىنداعى ىنتىماقتاستىق بارلىق سالادا قارقىندى تۇردە دامىپ جاتىر، ەكىجاقتى قاتىناستاردى ساپالى جاڭا دەڭگەيگە شىعارۋدىڭ نەگىزى سالىندى. قازاقستاننىڭ تۇڭعىش پرەزيدەنتى - ەلباسى ن. نازاربايەۆ پەن مەملەكەت باسشىسى ق. توقايەۆ تۇركيانى قازاقستاننىڭ ماڭىزدى ءارى ستراتەگيالىق سەرىكتەستەرىنىڭ ءبىرى رەتىندە قاراستىرادى» ، — دەدى ا. مامين انكارا قالاسىندا ر. ەردوعانمەن كەزدەسۋدە.

قازاقستاندا تۇرىك كاپيتالىنىڭ قاتىسۋىمەن 4200 دەن استام كومپانيا تىركەلگەن. ولار ەنەرگەتيكا، كولىك، اگروونەركاسىپ، ماشينا جاساۋ سەكتورلارىندا، ينفراقۇرىلىمدىق قۇرىلىستا جانە باسقا دا سالالاردا قىزمەت كورسەتەدى. وسى جىلدىڭ 9 ايىنىڭ قورىتىندىسى بويىنشا ەكىجاقتى تاۋار اينالىمى 2,3 ميلليارد دوللارعا جەتتى. بۇل، 2018 -جىلدىڭ سايكەس كەزەڭىندەگى كورسەتكىشتەن %68 ارتىق. وسى جىلدىڭ سوڭىنا قاراي ەكىجاقتى ساۋدا- ساتتىق كولەمى 3 ميلليارد دوللاردان اسادى دەپ كۇتىلۋدە. قازىرگى كەزدە تۇرىك تاراپىمەن بىرلەسىپ پىسىقتالىپ جانە ىسكە اسىرىلىپ جاتقان ينۆەستيتسيالىق جوبالار پۋلى 6 ميلليارد دوللاردان اسادى.

كەلىسسوزدەر بارىسىندا ساۋدا- ەكونوميكالىق، ينۆەستيتسيالىق، كولىك- لوگيستيكا، اۋىل شارۋاشىلىعى جانە باسقا دا سالالارداعى ىنتىماقتاستىقتى ودان ءارى دامىتۋ ماسەلەلەرى تالقىلاندى.

ا. مامين ق ر تۇڭعىش پرەزيدەنتى - ەلباسى ن. نازاربايەۆتىڭ مونۋمەنتىنە بارىپ، اتاتۇرىك كەسەنەسىنە گۇل شوعىن قويدى جانە ر. ەردوعانمەن بىرگە تۇركيادا وتكىزىلىپ جاتقان «بولاشاققا تىنىس بەر» ەكولوگيالىق ناۋقانى اياسىندا اعاشتار وتىرعىزدى. سونىمەن قاتار، ۇكىمەت باسشىسى تر ساۋدا- ونەركاسىپ پالاتاسىنىڭ جۇمىسىمەن تانىستى، ونىڭ ىشىندە تۇركيانىڭ مەملەكەتتىك ورگاندارىن تسيفرلاندىرۋ جۇمىستارى دا بار.

ق ر پرەمەر- ءمينيسترى ا. مامين تۇركيانىڭ ۆيتسە- پرەزيدەنتى ف. وكتايمەن ىستانبۇلدا قازاقستان- تۇركيا ۇكىمەتارالىق ەكونوميكالىق كوميسسياسىنىڭ وتىرىسىنا قاتىستى.

شارا قورىتىندىسى بويىنشا ساۋدا جانە ينۆەستيتسيالار، ونەركاسىپ، كولىك، ءبىلىم بەرۋ، دەنساۋلىق ساقتاۋ، تۋريزم ءتارىزدى جانە تاعى دا باسقا سالالاردا 65 پۋنكتتەن تۇراتىن بىرلەسكەن ءىس- قيمىلدار جوسپارى قابىلداندى. بۇدان وزگە، حالىقارالىق ارالاس جۇكتەردى تاسىمالداۋ تۋرالى ۇكىمەتارالىق كەلىسىمگە، 2019-2021 -جىلدارعا ارنالعان «جاڭا سينەرگيا» بىرلەسكەن ەكونوميكالىق باعدارلاماسى بويىنشا ءىس- قيمىلدار حاتتاماسىنا، سونداي- اق، ق ر ساۋدا جانە ينتەگراتسيا مينيسترلىگى مەن تر ساۋدا مينيسترلىگى اراسىنداعى «حالال» ساناتىنداعى ونىمدەر بويىنشا ىنتىماقتاستىقتى دامىتۋعا باعىتتالعان ءوزارا تۇسىنىستىك تۋرالى مەموراندۋمعا قول قويىلدى.

ا. مامين مەن ف. وكتاي 500 گە جۋىق تۇرىك جانە 100 قازاقستاندىق ىسكەرلىك ورتا وكىلدەرىنىڭ قاتىسۋىمەن قازاقستان- تۇركيا بيزنەس- فورۋمىن اشتى. فورۋم اياسىندا ينفراقۇرىلىم، يندۋستريا، كولىك- لوگيستيكا سالالارىندا، دەنساۋلىق ساقتاۋدا، قارجى نارىعىن دامىتۋدا، مەملەكەتتىك- جەكەشەلىك ارىپتەستىكتە تاجىريبەمەن الماسۋ جانە وزگە سالالاردا بىرلەسكەن جوبالاردى ىسكە اسىرۋدى قاراستىراتىن، جالپى 1,5 ميلليارد دوللار سوماسىنا 18 قۇجاتقا قول قويىلدى.

اتاپ ايتقاندا، قازاقستاندا قاتپاركارتون قاپتاما، لاك- بوياۋ ونىمدەرى وندىرىستەرىن، «اقتوبە- گەبزە» يندۋستريالىق ايماعىن اشۋ، تۇركىستان قالاسىن ينفراقۇرىلىمدىق دامىتۋ، سونداي- اق، الماتى مەن قاراعاندىدا ۋنيۆەرسيتەتتىك كلينيكالار سالۋ، كوكشەتاۋ، قىزىلوردا، اقتاۋ، اتىراۋ، اقتوبە، تارازدا كوپبەيىندى اۋرۋحانالار سالۋ، شىمكەنت پەن اقتوبەدە دياگنوستيكالىق ورتالىقتار سالۋ تۋرالى ۋاعدالاستىقتارعا قول جەتكىزىلدى.

قازاقستان پرەمەر- ءمينيسترى تۇركيانىڭ 41 ءىرى كومپانياسىنىڭ باسشىلارىمەن – ق ر ەكونوميكاسىنىڭ قازىرگى جانە الەۋەتتى ينۆەستورلارىمەن كەزدەستى. اسقار مامين تۇرىك بيزنەسىنىڭ كاپيتاندارىمەن ەكىجاقتى كەلىسسوزدەر، سونىمەن قاتار، «دوڭگەلەك ۇستەل» فورماتىندا ورتاق كەزدەسۋ وتكىزدى. ۇكىمەت باسشىسى تۇرىك بيزنەسمەندەرىن تۇركىستان قالاسىنىڭ تۇركى الەمىنىڭ مادەني- رۋحاني ورتالىعى رەتىندە جاڭعىرۋى مەن دامۋىنا ۇلەس قوسۋعا شاقىردى.

تۇركياعا ساپارى اياسىندا ا. مامين قايسەرى قالاسىنا بارىپ، وندا 2018 -جىلدان باستاپ قىزمەت كورسەتەتىن، مەملەكەتتىك- جەكەشەلىك ارىپتەستىك مودەلى بويىنشا جۇزەگە اسىرىلعان تۇركيانىڭ دەنساۋلىق ساقتاۋ سالاسىنداعى العاشقى جوباسىنا اينالعان قالالىق اۋرۋحانا قىزمەتىمەن تانىستى.

سوڭعى جاڭالىقتار