+7 (701) 759 90 19
-5 °С : نۇر-سۇلتان
2 °С : الماتى
USD 384.63 EUR 427.98
RUB 6.08 CNY 54.68
جاڭالىقتار

ق ر پرەزيدەنتى ءبىرقاتار مەملەكەتتىڭ ەلشىلەرىنەن سەنىم گراموتالارىن قابىلدادى

11 قاراشا 20:21
:ءبولىسۋ
ق ر پرەزيدەنتى ءبىرقاتار مەملەكەتتىڭ ەلشىلەرىنەن سەنىم گراموتالارىن قابىلدادى

نۇر- سۇلتان. قازاقپارات - قازاقستان پرەزيدەنتى قاسىم- جومارت توقايەۆ ءبىرقاتار مەملەكەتتىڭ ەلشىلەرىنەن سەنىم گراموتالارىن قابىلدادى. بۇل تۋرالى اقوردادان ءمالىم ەتتى، دەپ حابارلايدى قازاقپارات.

قاسىم- جومارت توقايەۆقا نيدەرلاند كورولدىگىنىڭ ەلشىسى اندرەي كارستەنس، ماجارستان ەلشىسى انتال حەيزەر، گرەكيا رەسپۋبليكاسىنىڭ ەلشىسى ادام گەورگيوس اداميديس، ەگيپەت اراب رەسپۋبليكاسىنىڭ ەلشىسى مانال ەحيا ءال شينناۋي، كاتار مەملەكەتىنىڭ ەلشىسى ابدۋلازيز بەن سۇلتان دجاسەم مادجيد ءال- رۋمەيحي سەنىم گراموتالارىن تاپسىردى.

مەملەكەت باسشىسى ەلشىلەردى قازاقستانداعى ديپلوماتيالىق قىزمەتتەرىنىڭ رەسمي تۇردە باستالۋىمەن قۇتتىقتاپ، يگى ميسسيالارىنا تابىس تىلەدى.


سالتاناتتى شارا بارىسىندا پرەزيدەنت شەتەلدىك ديپلوماتتارمەن شاعىن سۇحبات قۇردى.

قاسىم- جومارت توقايەۆ نيدەرلاند ەلشىسىنە اتالعان مەملەكەت قازاقستاننىڭ ەۋروپاداعى نەگىزگى سەرىكتەستەرىنىڭ ءبىرى ەكەنىن ايتتى.

«ءبىزدىڭ ەلىمىزدىڭ «شەلل» جانە تاعى دا باسقا ءىرى مۇناي كومپانيالارىمەن قارىم- قاتىناسى وتە جاقسى. مۇنداي ىنتىماقتاستىق الداعى ۋاقىتتا دا جالعاسا بەرەدى دەپ ويلايمىن. ءبىز نيدەرلاندىنىڭ قازاقستانمەن تىعىز ىقپالداستىق ورناتۋعا ۇمتىلىسىن جوعارى باعالايمىز. ءسىزدىڭ ەلىڭىزدىڭ ينۆەستيتسيالىق الەۋەتى وراسان زور»، - دەدى مەملەكەت باسشىسى.


قاسىم- جومارت توقايەۆ انتال حەيزەرمەن كەزدەسۋ بارىسىندا قازاقستاننىڭ ماجارستاندى ورتالىق ەۋروپاداعى جانە ەۋروپالىق وداق اياسىنداعى نەگىزگى ءارى ماڭىزدى سەرىكتەسى رەتىندە قاراستىراتىنىن اتاپ ءوتتى. پرەزيدەنت ماجارستان ۇكىمەتىنىڭ بۋداپەشتتە تۇركى كەڭەسىنىڭ وفيسىن اشۋ جونىندەگى شەشىمىن قۇپتاپ، وعان تاريحي ادىلەتتىلىكتىڭ ورناۋى دەپ باعا بەردى.

«ەكى ەل اراسىندا گۋمانيتارلىق بايلانىستار نىعايىپ كەلەدى. ال ەكونوميكا سالاسى بويىنشا دامۋ قارقىنى وتە جوعارى. ءبىزدىڭ ۇكىمەتتەرىمىز بىرگە جۇمىس اتقارۋعا ەرەكشە قۇلشىنىس ءبىلدىرىپ وتىر»، - دەدى قازاقستان پرەزيدەنتى.


قاسىم- جومارت توقايەۆ ادام گەورگيوس اداميديسپەن اڭگىمەلەسۋ كەزىندە قازاقستاننىڭ گرەكيامەن اراداعى ىنتىماقتاستىقتى دامىتۋعا زور ءمان بەرەتىنىن ايتتى.

«ءبىز گرەكيامەن وسىعان دەيىن قالىپتاسقان ىنتىماقتاستىقتى ودان ءارى وركەندەتۋگە زور قىزىعۋشىلىق تانىتامىز. ءسىز ەلشى رەتىندە ەكى ەل اراسىنداعى بايلانىستى ءارى قاراي دامىتۋعا ەلەۋلى ۇلەس قوساسىز دەپ ويلايمىن»، - دەدى پرەزيدەنت.

ەگيپەت ديپلوماتيالىق ميسسياسىنىڭ جەتەكشىسىن قابىلداۋ ساتىندە مەملەكەت باسشىسى پرەزيدەنت ابدەل فاتتاح اس- سيسيدىڭ 2016 -جىلعى قازاقستانعا جاساعان ساپارى تابىستى بولعانىن اتاپ ءوتىپ، وعان ىزگى تىلەگىن جولدادى.


«ەلدەرىمىز ەكىجاقتى قاتىناستاردى دامىتۋ باعىتىندا وڭ ناتيجەلەرگە قول جەتكىزدى. حالىقارالىق كۇن تارتىبىندەگى كوپتەگەن ماسەلە بويىنشا مەملەكەتتەرىمىزدىڭ ۇستانىمى ورتاق»، - دەدى قاسىم- جومارت توقايەۆ.

مەملەكەت باسشىسى كاتار ەلشىسىنە 2019 -جىلدىڭ ماۋسىم ايىندا دۋشانبەدە وتكەن ازياداعى ءوزارا ىقپالداستىق جانە سەنىم شارالارى جونىندەگى كەڭەس سامميتى اياسىندا ءامىر تاميم بەن حاماد ءال- تانيمەن تابىستى كەزدەسۋ وتكىزگەنىن ايتتى. سونداي- اق اتالعان ەلمەن ىنتىماقتاستىقتىڭ نىعايا بەرەتىنىنە سەنىم ءبىلدىردى.

«ءبىز Qatar Airways كومپانياسىنىڭ نۇر- سۇلتان مەن دوحا اراسىندا اۋە قاتىناستارىن ىسكە قوسۋ جونىندەگى شەشىمىن قۇپتايمىز. مەملەكەت باسشىسى رەتىندە ءوزىم جانە قازاقستان ۇكىمەتى كاتارمەن بايلانىستاردى نىعايتۋ ءۇشىن بارلىق قاجەتتى شارالاردى قابىلدايمىز»، - دەدى قاسىم- جومارت توقايەۆ.


باستى سوزدەر: بيلئك جانة ساياسات,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات