قارۋ- جاراقتارىن اسىنعان «قازاق باتىرلارى» لوندوندىقتاردى تاڭعالدىردى

لوندون. قازاقپارات - ەجەلگى جاۋىنگەرلەر كيىمىن كيىپ، قارۋ- جاراقتارىن اسىنعان قازاق جىگىتتەرى لوندون تۇرعىندارىن تاڭعالدىردى، دەپ حابارلايدى قازاقپارات ءتىلشىسى.

ترافالگار الاڭىنا اعىلعان تۋريستەردىڭ نازارى الاڭنىڭ اجارىن اشىپ تۇرعان ادميرال نەلسوننىڭ مۇسىنىنەن گورى قازاق باتىرلارىنا اۋىستى.

بويلارى 2 مەتردەن اساتىن جىگىتتەرمەن ولار جارىسا سۋرەتكە ءتۇستى. باتىرلاردىڭ فلەش- موبى ەليزاۆەتا 2- حانشايىمنىڭ لوندوندىق رەسمي رەزيدەنسياسى الدىندا جالعاستى.

«مەن ا ق ش- تىڭ ميچيگان شتاتىنداعى دەترويت قالاسىنانمىن. بۇگىن بىرىككەن كورولدىككە كەلىپ، از- ماز بوس ۋاقىت تابىلعان سوڭ بۋكينگەم سارايىنا دوستارىمىزبەن باس سۇققانبىز. ءبىز ءۇشىن بۇل ءجاي سايكەستىك ەمەس، ودان دا اسقان دۇنيە - باتىرلارمەن سۋرەتكە ءتۇسۋ، ولاردىڭ شەرۋىن كورۋ، قۋانىشىنا ورتاقتاسۋ. وسى تاريحي ءساتتىڭ ءبىر بولىگى بولۋ مەن ءۇشىن ۇلكەن باقىت»، - دەيدى تۋريستەردىڭ ءبىرى دجون ليكاري.

«وردا» ەتنو- جوباسى اياسىندا دۋمان، بەكتورە، ەلۋار جانە ولجاس ەسىمدى جىگىتتەر ەكى جىلدان بەرى قازاقتىڭ سالت- داستۇرلەرى مەن ۇلتتىق كيىمدەرىن الەم ەلدەرى اراسىندا ناسيحاتتاپ كەلەدى.

«بۇل جاققا كەلۋدەگى ماقساتىمىز ۇلتتىق كيىمدەرىمىزدى شەتەلدىكتەرگە كورسەتۋ، قازاقتىڭ كونە عاسىرلىق تاريحىن تانىتۋ. ەجەلگى اتا- بابالارىمىزدىڭ جاۋگەرشىلىك زاماندا كيگەن ۇلتتىق ناقىشتاعى كيىمدەرىن ناسيحاتتاۋ» - دەيدى «وردا» ەتنو- جوباسى قاتىسۋشىسى دۋمان ءامين.

اۆتور  :عالىمجان قارامان ۇلى