ارۋجان جازىلبەكوۆا ا ق ش- تا «ەڭ ۇزدىك اكتريسا» اتاندى

نۇر- سۇلتان. قازاقپارات - قازاقستاندىق اكتريسا ارۋجان جازىلبەكوۆا ا ق ش- تا «ەڭ ۇزدىك ايەل ءرولى» سىيلىعىن جەڭىپ الدى، دەپ حابارلايدى قازاقپارات.

سينحۋا اگەنتتىگىنىڭ حابارلاۋىنشا، قازاقستان مەن قىتاي بىرلەسىپ تۇسىرگەن «كومپوزيتور» فيلمى لوس- انجەلەس(ا ق ش) قالاسىندا وتكەن 4- كەزەكتى «Golden screen awards»  ماراپاتتاۋ شاراسىندا جىلدىڭ «ەڭ ۇزدىك كينوسى»، «ەڭ ۇزدىك مۋزىكا»، «ەڭ ۇزدىك ەر ادام ءرولى» جانە «ەڭ ۇزدىك ايەل ءرولى» سىندى 4 نوميناتسيا بويىنشا ماراپاتتالدى.

ايتا كەتەرلىگى، «Golden screen awards» شاراسى China Film Co Production كورپوراتسياسى، Hollywood Reporter  جانە امەريكا كينو قاۋىمداستىعىنىڭ قولداۋىمەن 2016 -جىلدان بەرى وتكىزىلىپ كەلەدى. شارانىڭ باستى ماقساتى - قىتايلىق جانە شەتەلدىك كينو ستۋديانىڭ بىرىگىپ تۇسىرگەن ۇزدىك كينولارىن ماراپاتتاۋ.

ەسكە سالايىق، «كومپوزيتور» فيلمىنىڭ تۇساۋ كەسەرى اعىمداعى جىلدىڭ 17 - مامىر كۇنى ەلوردادا وتكەن بولاتىن. اتالعان فيلم الەمدىك ونەرگە ەلەۋلى ۇلەس قوسقان قىتايدىڭ تانىمال كومپوزيتورى شي شينحايدىڭ ءومىرى مەن ونەر جولىنا ارنالعان. ەكىنشى دۇنيەجۇزىلىك سوعىس جىلدارىندا (1941-1943 -جىلدار ارالىعىندا) كومپوزيتور قازاقستاندا تۇرىپ، قازاقتىڭ تالانتتى كومپوزيتورى باقىتجان بايقاداموۆپەن دوس بولعان. كارتينا ەكى ەل اراسىنداعى ىنتىماقتاستىق پەن كومپوزيتورلاردىڭ دوستىعى تۋرالى سىر شەرتەدى.

فيلمدى ش. ايمانوۆ اتىنداعى «قازاق فيلم» كينوستۋدياسى جانە قىتايلىق  كومپانيالارى بىرگە تۇسىرگەن.

فوتو: Instagram

اۆتور: مۇحتار قاليموللا ۇلى