قازاقستان مەن بەلگيا اراسىنداعى ساياسي كونسۋلتاتسيا وتەدى
بۇل جايىندا ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى قازاقپارات ءتىلشىسى.
«قازاقستاندىق دەلەگاتسيانى سىرتقى ىستەر ءمينيسترىنىڭ ورىنباسارى رومان ۆاسيلەنكو باسقارادى. ال بەلگيالىق تاراپتان كەلىسسوزدەرگە بەلگيا سىرتقى ىستەر مينيسترلىگىنىڭ ەكىجاقتى ىستەر جونىندەگى باس ديرەكتورى انيك ۆان كالستەر قاتىسادى. كەلىسسوزدەر بارىسىندا تاراپتار قازاقستان مەن بەلگياداعى وزەكتى ىشكى ساياسي جاعدايدى، ەكىجاقتى ساۋدا- ينۆەستيتسيالىق ىنتىماقتاستىقتىڭ پەرسپەكتيۆالارىن، وڭىرلىك قاۋىپسىزدىك ماسەلەلەرىن تالقىلايدى» ، - دەدى ايبەك سمادياروۆ.
ونىڭ ايتۋىنشا، بريۋسسەلگە ساپار اياسىندا رومان ۆاسيلەنكو قازاقستان مەن وزبەكستاندا اۋعان قىزدارىن وقىتۋ جونىندەگى ەۋرووداق باعدارلاماسىنىڭ ۇلىقتاۋ راسىمىنە قاتىسادى.
سونداي- اق، ەۋروپالىق ينتەگراتسيالىق قۇرىلىمدار وكىلدەرىمەن ءبىرقاتار ەكىجاقتى كەزدەسۋ وتكىزەدى.