ەلوردادا جارىقتىڭ ءسونىپ قالۋىنا بايلانىستى قىلمىستىق ءىس قوزعالدى

نۇر- سۇلتان. قازاقپارات - ق ر ىشكى ىستەر مينيسترلىگى ەلوردانىڭ سول جاعالاۋىنداعى ءبىرقاتار كوشەدە جارىقتىڭ ءسونىپ قالۋىنا بايلانىستى قىلمىستىق ءىس قوزعادى، دەپ حابارلايدى قازاقپارات ءتىلشىسى.

«وزدەرىڭىز بىلەتىندەي، قاراشانىڭ 9 ىنان 10 نا قاراعان كۇنى ەلوردانىڭ سول جاعالاۋىندا اپات بولىپ، ءبىرقاتار مەملەكەتتىك نىسانداردا، تۇرعىن ۇيلەردە جارىق ءسونىپ قالعان بولاتىن. ت ج ك مەن قالا اكىمدىگىنىڭ جەدەل شارالارى بارىسىندا اقاۋلار جويىلدى. اپات جاعدايى بويىنشا نۇر- سۇلتان قالاسىنىڭ پوليسيا دەپارتامەنتى ق ر قىلمىستىق كودەكسىنىڭ 292-بابى بويىنشا (ءورت قاۋىپسىزدىگىن بۇزۋ) سوتقا دەيىنگى تەرگەۋ امالدارىن باستادى. سوتقا دەيىنگى تەرگەۋ امالدارىن جەدەل تەرگەۋ توبى قولىنا الدى. ءىس ىشكى ىستەر ءمينيسترىنىڭ باقىلاۋىندا» ، - دەدى ءى ءى م تەرگەۋ دەپارتامەنتىنىڭ باستىعى سانجار ءادىلوۆ.

ەسكە سالا كەتسەك، مەملەكەت باسشىسى قاسىم- جومارت توقايەۆ نۇر- سۇلتان قالاسىنىڭ سول جاعالاۋىندا ءبىرقاتار كوشەنىڭ ەلەكتر ەنەرگياسىنان اجىراتىلۋىنا بايلانىستى ۇكىمەتكە ارنايى كوميسسيا قۇرۋدى تاپسىرعان ەدى.

قاراشانىڭ 9 ىنان 10 نا قاراعان كۇنى ەلوردانىڭ سول جاعالاۋىندا اپات بولىپ، 9 كوپپاتەرلى تۇرعىن ءۇي كەشەنى، سونداي- اق اقوردا، پارلامەنت سەناتى، ءماجىلىس، مينيسترلىكتەر ءۇيى، ۇكىمەت ءۇيى، جوعارعى سوت، «ۋيۋت»، «كراۋن پلازا»، «تۇمار» (2 ءۇي)، «ارت حاۋس»، «ۆيۆا پلازا»، «الاتاۋ»، «نا ۆودنوم زەلەنوم بۋلۆارە»، «بايتەرەك» مونۋمەنتىن، «يزۋمرۋدنىي كۆارتال» بيزنەس ورتالىعىن، «كەرۋەن»، ۇلتتىق كىتاپحانا مەن ۇلتتىق مۇراعات عيماراتتارىنىڭ جارىعى وشكەن بولاتىن.