ەڭبەك ءمينيسترى: ءار ادام بيزنەس باستاي الادى

پاۆلودار. قازاقپارات - ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ پاۆلودار وبلىسىندا «ەڭبەك» مەملەكەتتىك باعدارلاماسىنىڭ قاتىسۋشىلارىمەن كەزدەستى.

بۇل تۋرالى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ حابارلايدى.

سونداي-اق، ق ر ەڭبەك جانە حالىقتى الەۋمەتتىك قورعاۋ ءمينيسترى قارتتار مەن مۇگەدەكتەردى الەۋمەتتىك وڭالتۋ ورتالىعى مەن جۇمىسپەن قامتۋ ورتالىعىندا بولدى. كەزدەسۋلەر بارىسىندا ءبىرجان نۇرىمبەتوۆ ق ر پرەزيدەنتى قاسىم-جومارت توقايەۆتىڭ قازاقستان حالقىنا جولداۋىنىڭ نەگىزگى باعىتتارىن ءتۇسىندىرىپ، جۇمىسسىزدار مەن مۇگەدەكتىگى بار ازاماتتاردى مەملەكەتتىك قولداۋ شارالارى تۋرالى ەگجەي-تەگجەيلى ايتىپ بەردى.

ءبىرجان نۇرىمبەتوۆ پاۆلودارعا كەلگەننەن كەيىن بىردەن «ارداگەرلەر ءۇيى» قارتتار مەن مۇگەدەكتەردى الەۋمەتتىك وڭالتۋ ورتالىعىنا كەلدى. ۇيىمنىڭ جۇمىسكەرلەرىمەن جانە مۇگەدەكتىگى بار ادامدارمەن اڭگىمەلەسۋ بارىسىندا مينيستر مۇگەدەكتىگى بار ازاماتتارعا قامقور بولۋ ءارقاشان قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنىڭ جۇمىسىنداعى باستى باسىمدىقتاردىڭ ءبىرى بولىپ قالا بەرەتىنىن اتاپ ءوتتى.

«وڭالتۋ قىزمەتتەرى - مۇگەدەكتەردىڭ قوعام ومىرىنە تولىققاندى قاتىسۋىنىڭ قاجەتتى قۇرامداس بولىگى. الەۋمەتتىك قىزمەت كورسەتۋ جۇيەسىن جاڭعىرتۋ، قىزمەتتەر مەن وڭالتۋ وبەكتىلەرىنىڭ ساپاسى مەن قولجەتىمدىلىگىن ارتتىرۋ ماقساتىندا 2020-جىلدىڭ 1- قاڭتارىنان باستاپ قازاقستاندا الەۋمەتتىك قىزمەتتەر پورتالى ىسكە قوسىلادى. بۇل تەحنيكالىق وڭالتۋ قۇرالدارىن جانە ارنايى الەۋمەتتىك قىزمەتتەردى ۇسىنۋدىڭ بيزنەس-پروتسەستەرىنىڭ ۋاقىتىن ولاردى پرواكتيۆتى فورماتتا تاعايىنداۋ ارقىلى 8 ايدان 1-2 اپتاعا دەيىن قىسقارتادى. پورتال سونىمەن قاتار وڭالتۋ قىزمەتتەرى مەن قۇرالدارىنىڭ الۋشىلاردىڭ جەكە قاجەتتىلىكتەرىنە سايكەس كەلمەۋ ماسەلەلەرىن شەشەدى، ويتكەنى مۇگەدەكتەر تاۋارلار مەن قىزمەتتەردىڭ قاجەتتى ءتۇرىن ءوز بەتىنشە تاڭداي الادى»، - دەدى ءبىرجان نۇرىمبەتوۆ.

جۇمىس ساپارى بارىسىندا ەڭبەك جانە حالىقتى الەۋمەتتىك قورعاۋ ءمينيسترى مەملەكەت تاراپىنان قارجىلاي كومەك الىپ، ءوز ءىسىن بەلسەندى دامىتا باستاعان ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسىنىڭ قاتىسۋشىلارىنا ەرەكشە نازار اۋداردى.

«بيىل بۇكىل ەلدە ميكروكرەديت بەرۋگە 83 ميلليارد تەڭگە جانە گرانتتار ءۇشىن 18 ميلليارد تەڭگە ءبولىندى. ءبىزدىڭ باعالاۋىمىز بويىنشا 20 مىڭ ادام ميكروكرەديت الۋى كەرەك، ال ءبىز 38 مىڭ ادامعا گرانت بەرگىمىز كەلەدى. «ەڭبەك» مەملەكەتتىك باعدارلاماسى بارلىق وڭىرلەردە ىسكە اسىرىلۋدا، ءبىراق مەن پاۆلودار وبلىسى گرانتتار مەن ميكروكرەديتتەر بەرۋ بويىنشا الدىڭعى قاتارلى ايماقتاردىڭ ءبىرى بولىپ سانالاتىنىن اتاپ وتكىم كەلەدى. مۇندا جىلدىق جوسپار ورىندالدى. بۇل ءتيىستى قىزمەتتەر ءتۇسىندىرۋ جۇمىسىن دۇرىس جۇرگىزىلگەنىن، ادامدار بۇل قۇرالدار تۋرالى حاباردار بولىپ، ءوز بيزنەستەرىن دامىتادى دەگەندى بىلدىرەدى. بۇل حالىق كىرىسىنىڭ وسۋىنە اكەلۋى كەرەك»، - دەدى ءبىرجان نۇرىمبەتوۆ.

«ەڭبەك» مەملەكەتتىك باعدارلاماسىنىڭ قاتىسۋشىلارىمەن كەزدەسكەن مينيستر بۇگىندە جاپپاي كاسىپكەرلىكتى دامىتۋ قۇرالدارىن قولدانۋدىڭ وڭ اسەرى بايقالعانىن اتاپ ءوتتى.

«پاۆلودار ماڭىنداعى اۋىلداردىڭ بىرىندە «ەڭبەك» مەملەكەتتىك باعدارلاماسىنىڭ مۇمكىندىكتەرىن پايدالانۋدىڭ جاقسى ۇلگىسى بار. بۇگىن مەن شامامەن 5 ميلليون تەڭگە ميكروكرەديتكە 9 سيىر ساتىپ الىپ، قازىر بيزنەسىن كەڭەيتىپ جاتقان جەكە كاسىپكەرمەن سويلەستىم، ول جەر ساتىپ العىسى كەلەدى. ول جۇمىسشىلاردى جالداۋدى جوسپارلاپ وتىر، ولار ونىڭ تۇراقتى تابىسى جوق اۋىلداستارى بولادى. بۇل مەملەكەتتىك باعدارلاماعا قاتىسۋشىنىڭ ءوز ءىسىن دامىتىپ، باسقالارعا جۇمىس ۇسىنۋىنىڭ جارقىن مىسالى. مەن جۇمىسسىزداردى مەملەكەت بەرەتىن مۇمكىندىكتەردى پايدالانۋعا شاقىرامىن. ءار ادام بيزنەس باستاي الادى»، - دەدى ول.

پاۆلودارداعى جۇمىسپەن قامتۋ ورتالىعىنىڭ قىزمەتكەرلەرى ءبىرجان نۇرىمبەتوۆكە «ەڭبەك» مەملەكەتتىك باعدارلاماسىنىڭ بارلىق باعىتتارىنىڭ ورىندالۋ بارىسى تۋرالى حابارلادى. ولاردىڭ اقپاراتى بويىنشا، ۇستىمىزدەگى جىلدىڭ 10 ايىندا جۇمىسپەن قامتۋدى ىنتالاندىرۋ شارالارىمەن 10179 ازامات قامتىلدى، ونىڭ ىشىندە 6685 ادام تۇراقتى جۇمىس ورىندارىنا، 337 ادام الەۋمەتتىك جۇمىس ورىندارىنا، 290 جاس ازامات جاستار پراكتيكاسى جانە 656 جۇمىسسىز ادام قوعامدىق جۇمىسقا جىبەرىلدى.

سونىمەن قاتار، مەملەكەتتىك باعدارلامانىڭ 1925 قاتىسۋشىسى وقۋعا جىبەرىلدى، ونىڭ ىشىندە 358 ادام ت ج ك ب- دا، 1195 ادام قىسقا مەرزىمدى كۋرستاردا، 372 ادام «بيزنەس باستاۋ» جوباسى بويىنشا كاسىپكەرلىك نەگىزدەرىنە وقيدى.

354,1 ميلليون تەڭگە سوماسىنا 34 شاعىن نەسيە جانە 183 گرانت بەرىلدى. ەڭبەك رەسۋرستارىنىڭ ۇتقىرلىعىن ارتتىرۋ باعدارلاماسى بويىنشا قالاعا 34 ورالمان جانە قازاقستاننىڭ وڭتۇستىك وڭىرلەرىنەن وتباسى كەلدى.

ءوز كەزەگىندە مينيستر جۇمىسپەن قامتۋ ورتالىعى قىزمەتكەرلەرىنىڭ نازارىن ق ر پرەزيدەنتىنىڭ قازاقستان حالقىنا جولداۋىندا ايتىلعان كوپبالالى جانە تابىسى از وتباسىلاردى كاسىپكەرلىككە تارتۋ جونىندەگى تاپسىرماسىن ىسكە اسىرۋعا اۋداردى.

«مەملەكەت باسشىسىنىڭ جولداۋىندا الەۋمەتتىك اسپەكتىلەرگە - ەڭ الدىمەن كوپبالالى جانە تابىسى از وتباسىلارعا وتباسىلىق بيزنەس اشۋعا باسا نازار اۋدارا وتىرىپ، بيزنەستى قولداۋدىڭ جاڭا نىساندارىن بەلسەندى تۇردە ەنگىزۋ قاجەتتىلىگىن بەلگىلەپ ءوتتى. سوندىقتان جۇمىسپەن قامتۋ ورتالىعىنىڭ قىزمەتكەرلەرى وسى وتباسىلاردىڭ ەڭبەككە قابىلەتتى مۇشەلەرىن ناتيجەلى جۇمىسقا تارتۋعا ەرەكشە نازار اۋدارۋى كەرەك، ول ءۇشىن گرانتتار مەن ميكروكرەديتتەر بەرۋدى قاراستىراتىن «ەڭبەك» مەملەكەتتىك باعدارلاماسىنىڭ قۇرالدارىن بەلسەندى پايدالانۋ قاجەت»، - دەدى ول.

ايتا كەتسەك، ءبىرجان نۇرىمبەتوۆتىڭ كەزدەسۋى قازاقستان رەسپۋبليكاسى پرەمەر-ءمينيسترىنىڭ ورىنباسارى بەردىبەك ساپاربايەۆتىڭ پاۆلودار وبلىسىنا جۇمىس ساپارى اياسىنداعى شارالاردىڭ ءبىرى.