تاتۋ وتباسى قۇپياسى: سانانى تۇرمىس بيلەمەسىن دەسەڭىز

None
None
نۇر-سۇلتان. قازاقپارات - ەڭ باقىتتى جۇپتىڭ ءوزى كۇنىنە ءبىر مارتە بولسا دا ۇرىساتىن سەبەپ تابادى. نەگە تۇرمىستىق جاعدايلار وتباسىن ويراندايدى، قارىم قاتىناستا تەپە- تەڭدىكتى قالاي ساقتاۋعا بولادى؟

 بۇل سۇراقتار كەز كەلگەن ادامدى ويلاندىرادى. وتباسىلىق ءومىردى تۇمانداندىراتىن نە؟ جىگىت پەن قىز بوپ جۇرگەندە بارلىعى تاماشا بولادى، ۋاقىت وتە كەلە ءومىردىڭ كەلەسى كەزەڭىنە اياق باسىپ، بىرگە تۇرۋى كەرەك. وتباسىلىق ءومىردىڭ ىستىق، سۋىعى باسىلعاننان كەيىن ارادا تۇسىنىسپەۋشىلىك تۋىنداپ، بۇرىن كورمەگەن قىرلارىن تاني باستايدى. ايەلى ىدىستى جۋمايدى، كۇيەۋى قوقىستى توكپەيدى، جۇمىستان شارشاپ كەلگەندە ءۇي جينالمايدى.. . وسى سەكىلدى ۇساق- تۇيەكتەر جۇيكەنى جۇقارتىپ، نەگاتيۆ جينالا بەرەدى، ءبىر كۇنى بىرەۋى «جارىلادى».

ارينە، ۇرىس- كەرىس ءبىر عانا سەبەپتەن تۋىندامايدى. ءبىر شاڭىراق استىندا تۇرعاندا ەڭ كوپ كەزدەسەتىن ماسەلە - قارجىلىق جاعداي. پاتەر اقىسىن تولەۋ، كۇندەلىكتى ءىشىپ- جەۋىڭ، كيىم- كەشەگىڭ، كەرەك- جاراعىڭ - بارلىعىنا بىردەي اقشا كەرەك. ەسەپ جۇرگىزبەسە، قاجەتتىلىكتىڭ بارلىعىنا بىردەي جەتكىزۋ مۇمكىن ەمەس. وسىلاي تاعى دا جانجال شىعارۋعا سەبەپ تابىلادى. ايەلى «از اقشا تاباسىڭ» دەيدى، كۇيەۋى «بەرەكەسىن كەلتىرىپ جۇمساي المايسىڭ» دەيدى. وسىلاي كۇن سايىن ۇرىس- كەرىسپەن ءومىر سۇرۋدەن ەكەۋى دە شارشاپ، ەكى جاققا كەتىپ تىنۋى مۇمكىن. تۇرمىستىق جاعدايلارعا بايلانىستى كەلىسپەۋشىلىك تۋماۋى ءۇشىن بىرنەشە ەرەجە جاساۋعا بولادى. ەڭ باسىندا بارلىعىن اقىلداسىپ، اركىم ءوزى جاۋاپتى ىستەردى ءبولىپ العانى ءجون. ۇساق تۇيەكتەردىڭ جانىندا قارىم- قاتىناستى ساقتاپ قالۋ ماڭىزدى ەكەنىن ەستەن شىعارماي، ماسەلەنى ايقاي- شۋسىز شەشۋ.

ادامدار نەگە جانجالداسادى؟

 ماسەلە تۋعاندا بارلىعى بىردەي شەشىمىن تابۋعا تىرىسپايدى. كوپشىلىگى ءادىپتىڭ ارتىن باعىپ، سوڭىنا دەيىن شىداپ كەلەدى دە، شىدام شەگىنە جەتكەندە بارىپ شۋ شىعارادى. كەز كەلگەن تۇيتكىلدى ماسەلەنى دەرەۋ شەشىپ العان ءجون جانە ەسكى وكپە- نازدىڭ ءبارىن قوزعاماي، ەڭ ماڭىزدى دەگەن ماسەلەنى ءسوز ەتىپ، باسقا كەمشىلىكتەرىن بەتىنە باسپاي، ءبىر- بىرىنە ءمىن تاقپاي، ۇرىس- كەرىسسىز، باسەڭ داۋىسپەن سويلەسە وتىرىپ شەشىمىن تاپقان دۇرىس. ال قارجىلىق جاعدايعا كەلەر بولساق، تۇرمىس قۇرماي تۇرىپ شامامەن قانداي جاعدايدا ءومىر سۇرەتىنىڭدى بولجاپ، سول جايعا كوندىگە الاتىنداي بولعان كەزدە عانا شەشىم قابىلداۋ كەرەك. ەگەر بولشاق جارىڭىز اۋادان دا اقشا جاسايتىن ءىرى كاسىپكەر بولماسا، ۇيلەنگەننەن كەيىن ءبارى وزگەرەدى، اقشاسى كوبەيەدى دەپ ەرتەگى قۇراستىرۋدىڭ قاجەتى جوق.

Massaget.kz 

سوڭعى جاڭالىقتار