+7 (701) 759 90 19
-18 °С : نۇر-سۇلتان
6 °С : الماتى
USD 387.14 EUR 428.18
RUB 6.06 CNY 55.23
جاڭالىقتار

ەسبول نۇراحمەت. تاۋسىلماس ءتۇن

8 قاراشا 18:27
:ءبولىسۋ
ەسبول نۇراحمەت. تاۋسىلماس ءتۇن

نۇر-سۇلتان.قازاقپارات - بار ۇستەلشەسىنە تاقاۋ قويىلعان بيىك ورىندىققا قىرىنداي جايعاسقان سۇلۋ ءوڭدى ايەل بارمەنگە قيىلا قاراپ، يەگىمەن تالعاتتى نۇسقادى، سوسىن الدە نە دەپ سۇراعانداي بولدى.

باعانادان بەرى نەشە رەت كوزىمەن ءسۇزىپ وتكەنىن بۇل دا بايقاعان. بارمەن وزگەشە ءبىر اۋەسقويلىق كەيىپپەن جىميدى دا، ايەلدىڭ قۇلاعىنا اۋىزىن تاقادى. تالعات اڭگىمەنىڭ ءوزى تۋرالى بولىپ جاتقانىن جاقسى ءتۇسىندى، ايەل كوزىن اۋدارىپ- توڭكەرىپ بۇعان تاعى ءبىر نازار اۋدارعان ساتتە بۇل دا ىڭعاي تانىتا جىميىپ قويدى، ءبىراق تۇرعان ورىنىنان قوزعالمادى. ايەل قىسقا يۋبكاسىنان ءاپپاق سانى، ۇزىن، ءتۇزۋ اياقتارى كەزەك جالتىلداپ بۇعان قاراي جاقىندادى. الدە ءبىر ۇرعاشى ارىستاننىڭ جەمتىگىنە جاقىنداعانى سەكىلدى، مىسىقشا باسىپ تاياپ كەلەدى، اش ارىستاننىڭ ىرىلى تالعاتتىڭ قۇلاعىنا انىق ەستىلگەندەي بولدى. انە- مىنە باس سالماقشى، جاقىنداي تۇسكەن سايىن ءارى قورقىتا، ءارى ەلىكتىرە، قىزىقتىرا ءتۇستى.. .

تالعات ادەتتەگىشە تولقۋىن باسىپ، ساباسىنا ءتۇسىپ ۇلگەردى. ەندى ءوزىن ايبارلىراق سەزىندى، جانىنا جاقىن كەلگەن جاس ايەلگە سەلقوس قانا كوز سالدى.

- ءسىزدى وسى باردىڭ ەڭ مەرگەن اڭشىسى دەيدى، ەڭ قىمبات جانە سۇلۋىن عانا اتادى دەسەدى.. .

تالعاتقا ايەل ءوزىنىڭ ويىن وقىپ تۇرعانداي سەزىلدى. بۇكىل دەنەسىمەن بۇرىلىپ قارادى:

- ولار كوبىندە نىساناعا ءوزى ىلىگەدى، - دەپ ايەلگە جوعارىدان تومەن قاراي ءسال عانا ەزۋ تارتا قارادى. ايەل قيىلا قولىن ۇسىندى:

- اسەل.

- تالعات.

- قۋانىشتىمىن.

- مەن دە.

اسەل بارمەندى شاقىرىپ سۋسىن قۇيعىزدى. بارمەن اسەلگە تەكيلا، تالعاتقا سىرا قۇيدى.

- وسىنى ىشكەن سوڭ شىعىپ كەتەيىك، - دەدى اسەل.

- وسىنشا اسىعىس پا؟

- ءيا. ايەل سىرلى ەزۋ تارتتى.

- جارايدى، اڭگىمەنىڭ ازداۋ بولعانى جاقسى.. .

ەكەۋى بوكالدارىن قاعىستىردى دا قاعىپ سالدى.

ايەل الدىعا ءتۇسىپ تالعاتتىڭ قولىنان تارتتى. تالعاتتىڭ كوزى ونىڭ قىسقا، تار يۋبكامەن ايشىقتالا كورىنگەن بوكسەسىنە ءتۇستى. ايەل مول ادىمداعان سايىن بوكسەسى بۇلتىڭداپ، ءارى- بەرى ويناقشىدى. تالعات ونىڭ سپورتپەن ءجيى شۇعىلداناتىنىن اڭعاردى، اشىق بىلەگى دە جۇپ- جۇمىر، شىمىر كورىندى. تۇتاس ءمۇسىنى ءمىنسىز بولماسا دا ءوڭىن بەرمەپتى.

دۇرسىلدەگەن مۋزىكا، جارق- جۇرق ەتكەن ەلەكتر شامى، ەلىگە بيلەگەن كوپ ادامنىڭ اراسىنان تاق- تۇق ەتكەن بيىك وكشەلى قىزىل تۋفلي تالعاتتى سىرتقا قاراي باستادى. سىرتقى كيىمدەرىن كيگەن سوڭ اسەل اۆتوتۇراقتاعى وگىزدەي لەكسۋستىڭ جانىنا الىپ كەلدى. اياز قارىعان اق قار ءار باسقان سايىن سىقىرلاي ءتۇستى.

- سەن ءىشتىڭ عوي، قالاي رولگە وتىراسىڭ؟

- الاڭداما، ەڭ باستىسى ەشكىمدى قاعىپ كەتپەسەڭ بولدى.. .

- ال قاعىپ كەتسەڭ شە؟

- ونىڭ دا ءبىر ءجونى بولادى دا.. .

- ءولتىرىپ الساڭ شە؟

- ءتىپتى جاقسى، وڭاي ءىز جاسىراسىڭ.. .

ايەل تالعاتتىڭ تاڭدانىستى جۇزىنە قاراپ، سىقىلىقتاي كۇلدى. كۇلكىسىن سۇيكىمدى ەتپەك بوپ، بارىنشا بوياعانىمەن، كەكسە ايەلدىڭ تاجىريبەلى داۋىسى اڭعارىلىپ تۇردى. «داۋىس الدامايدى» دەدى تالعات ىشىنەن.

- ەشتەڭەگە الاڭداما، ماعان سەرىك بولساڭ بولدى، تالعاتجان، - ايەل سەنىمدى جاۋاپ قاتتى.

تالعات بۇگىنگى ءتۇننىڭ وزگەشەلەۋ بولاتىنىن ىشتەي سەزىندى. ءبىراق ەشنارسەگە الدىن- الا باس قاتىرىپ جاتپايتىن، ول شىنىمەن دە الاڭداعان جوق. لەكسۋس 570 كولىگى ورنىنان ىتقي قوزعالدى.

***

كولىك قالانىڭ ەڭ ءبىر قۇپيا كوشەلەرىن باسىپ ءوتىپ، قالتارىستاعى ۇلكەن كوتتەدجدىڭ الدىنا كەلىپ توقتادى.

- وتە جايلى ورىن، - دەدى ايەل. ماڭدايشاسىنا «تۇمان» دەپ ءىرى ارىپتەرمەن جارقىراتا جازىپتى، الدىڭعى قابىرعادا كولبەي ورناتىلعان «كاراوكە» دەگەن جازۋ ءبىر جانىپ، ءبىر ءوشىپ تۇر.

جۇلدىز ءسونىپ، اسپان تۇتاس قاراڭعىلىققا شومىپتى. اسەل كوتتەدجدىڭ وڭ جاق قابىرعاسىنا قاراي ويىستى دا تومەن قاراي باسپالداقپەن ءتۇسىپ كەتتى، تالعات تا سوڭىنان ەردى. باسپالداق تاعانىنداعى تەمىر ەسىك ايقارا اشىلعان ساتتە، ىشتەن قىزىل- سارى شام جارىعىمەن بىرگە جىلى اۋا سىرتقا سەرپىدى. تىمىق تۇندە العاشقىدا ۇزارا سوزىلعان قوس كولەڭكە كولبەڭ- كولبەڭ ەتتى دە، جابىلعان ەسىكپەن بىرگە جوق بولدى.

ەسىكتىڭ ىشكى جاعىندا تۇرعان زور دەنەلى قارا كيىمدى جىگىت ايەلگە سالقىن عانا باس يزەپ، اماندىق جاسادى.

- ول مەنىمەن بىرگە، - دەدى اسەل تالعاتتى كوزىمەن نۇسقاپ. ءداۋ قارا ءتۇسىندىم دەگەن يشارات جاساپ وڭ قولىن ءسال جوعارى كوتەردى دە، قايتادان قۋسىرىپ الدى.

بۇلار شامى كۇڭگىرت تارتقان ۇزىن كوريدورمەن تۋرا ءجۇرىپ، تاعى ءبىر بۇرىشتى اينالعاندا وڭ جاقتا بار ۇستەلشەسى كەزىكتى.

- قوش كەلدىڭىز، اسەل، - دەدى ۇستەلشەنىڭ ارعى جاعىنداعى قويۋ قارا مۇرتتى جىگىت. قاسقا ماڭدايدان كوك جەلكەسىنە دەيىپ جاپ- جالتىر، قوس قاپتالىنداعى از شاشى ءارى بۇيرا، ءارى قويۋ ەكەن.

- بىزگە ادەتتەگىدەي بولسىن، - دەدى اسەل الدە ءبىر سىرلى اۋەنمەن.

- توعىزىنشى ءنومىر، - دەپ بارمەن ودان ارمان جىمىڭداي ءتۇستى.

اسەل قۇندىز تونىنىڭ ەتەگى جەر سىزىپ، تاكاپپارلانا باسىپ العا قاراي جىلجي بەردى.

بۇلار ماڭدايشاسىندا «9» دەگەن جازۋى بار قوڭىر ەسىكتى اشىپ، تورگە وزدى. ۇساق- ۇساق اقشىل شامدار جارىق ءتۇسىرىپ تۇرعان شاعىن بولمەنىڭ تورىندە ۇزىن، ءارى كەڭ قوڭىر ديۆان، الاسا ۇستەل جانە ءبىر نەشە جۇمساق ورىندىق تۇردى. قارا كولەڭكەلەنگەن تۇكپىر جاقتان تاعى ءبىر ەسىكتىڭ سۇلباسى كورىندى. ەكەۋى سىرت كيىمدەرىن كيىمىلگىشكە ءىلدى دە، ديۆانعا كەلىپ جايعاستى. بۇلار جايعاسىپ بولام دەگەنشە، جاڭاعى قارا مۇرتتى بارمەن كەلىپ كىرىپ، كۇلىمدەي ءجۇرىپ كاراوكەي قوستى. سوسىن قالعان زاتتاردى قازىر اكەلەتىنىن ايتىپ شىعىپ كەتتى.

سالدەن سوڭ بولمەنىڭ جارىعى باسەڭدەپ، ۇستەل ۇستىنە ءبىر بوتەلكە Jameson ۆيسكيى، كولا، تىسكە باسار بىرنەشە سالات جانە اشىق پاكەتكە سالىنعان اق ۇناتقتار اكەلىنىپ قويىلدى.

- تۇكپىردە جاتىن بولمە بار، دۋش پەن اجەتحانا دا سوندا، - دەپ قارا مۇرت تاعى جىميدى دا، ىزەت كورسەتىپ شىعىپ كەتتى.

ولار ۆيسكيدەن باستادى.

- بۇگىنگى ءتۇنننىڭ قىزىقتى، ءارى ۇمىتىلماس ءتۇن بولۋى ءۇشىن! - دەپ توست ايتتى اسەل. ونىڭ جۇزىندە الدە ءبىر سىر جاتقانداي بولدى.

- ماعان كونياك تا جامان بولماس ەدى، - دەدى تالعات. سول ساتتە- اق انشەيىن ايتا سالعانىن ءتۇسىندى. ول دا اكەلىندى. ءبىر نەشە ريۋمكادان كەيىن قىزا باستاعاندارى بايقالدى. ولار كەزەك- كەزەگىمەن ءان ايتتى. تالعات انگە ونشا ناشار ەمەس ەدى، قوڭىرلاتىپ ءبىراز شىرقادى. ال اسەل ءتىپتى جاتىق ەكەن، داۋىسىنان الدە ءبىر جاعىمدى بوياۋ دا بايقالىپ تۇردى.

الدەن ۋاقىتتا اسەل سىقىلىقتاي كۇلدى.

- مۇمكىن جاتىن بولمەگە كىرىپ- شىققان سوڭ جالعاستىرارمىز، ءتۇن ءالى ۇزاق، - دەدى كوزىن اۋدارىپ- توڭكەرىپ.

- قارسى ەمەسپىن. تالعات اسەلدى شاپ بەرىپ ۇستاي الدى دا كوتەرىپ الا جونەلدى.. .

***

ءبىر ساعات شاماسىنان كەيىن ەكەۋى تاعى دا ۇستەل شەتىندە وتىردى. اسەل تەمەكى تۇتاتتى. تەمەكى ءتۇتىنىن قۇمارتا سورىپ، سوسىن راحاتتانا باياۋ سىرتقا ۇرلەدى. ەرنەۋى ءسال اجىمدەلە باستاعان، ءبىر كورگەنگە ءالى دە نازىك، تومپاقشا ەرىننەن سوزىلا شىققان كوك ءتۇتىن گوريزانتال باعىتپەن جايىلا بارىپ كوتەرىلىپ كەتتى.

- قانشاداسىڭ، تالعاتجان؟

- جيىرما التىدامىن.. .

- بۇل جۇمىسپەن اينالىسقانىڭا قانشا جىل بولدى؟

- 4 جىلدان اسىپ بارادى.

- تاجىريبەڭ بايقالىپ تۇر، - اسەل تاعى دا سىڭعىرلاي جونەلدى.

- تاجىريبە ودان كوپ ەرتە باستالعان، - تالعات پاڭدانا كۇلدى، - ۇناسا بولدى عوي.

- ۇناعاندا قانداي.. .

- ءوزىڭ قانشاداسىڭ؟

- قىزدىڭ جاسى ون سەگىز.. .

- شىنىڭدى ايتشى.. .

- قانشا بەرەسىڭ؟

- 37-38 شىعار؟

- وي، راحمەت! سولاي دەپ بىلسەڭ دە بولادى.

- 42-43 جاس پا؟

- ونى قايتەسىڭ؟

- جارايدى، قويدىم.

ەكەۋى تاعى ءبىراز ءۇنسىز وتىرىپ قالدى. تالعات كونياكتان، اسەل ۆيسكيدەن الدى. وسى از ۇنسىزدىك جاڭاعى كوڭىلدى اڭگىمەنى باسقا ارناعا بۇرىپ جىبەرگەندەي بولدى. اسەل بۋلىعىپ جىلاي باستادى. تالعاتتىڭ وڭىنەن شارشاعان بەينە بىلىنە قالدى. وعان ءبارى تۇسىنىكتى ەدى.

- نە بولدى دەپ سۇرامايسىڭ با؟ - دەدى اسەل مۇرىنىن پىرس- پىرس تارتىپ.

- نە بولعانىن ونسىز دا ءبىلىپ وتىرمىن عوي، تاستاپ كەتكەن كۇيەۋىڭ ەسىڭە ءتۇسىپ وتىرعان شىعار تەگى.. .

- جوووق! - دەپ سوزا داۋىستاپ جىبەرىپ، قايتا جىلادى.

- وندا سوعان ۇقساس تاعى ءبىر نارسە بولار، ايتشى ەندى، نە بولدى؟

اسەل سولق- سولق ەتىپ تاعى ءبىراز جىلادى.

- سەن مەنىڭ تاعدىرىمدى تۇسىنبەيسىڭ.. ..

- .. .. .

- جارايدى، ايتقىم كەلمەي قالدى، - ول كوز جاسىن بىردەن تىيىپ الا قويدى، - كەل، ونان دا مىنانىڭ قىزىعىن كورەيىك.

اسەل پاكەتتەگى اق ۇنتاقتى ۇستەل ۇستىنە توكتى دە، ادەمىلەپ جايمالاپ، سوسىن ۇزىن سىزىق بويىنا ءۇيدى. مۇرنىنىڭ ءبىر جاق تەسىگىن باس بارماعىمەن بىتەپ تۇرىپ، ەكىنشى تەسىگىمەن ۇزىن سىزىق بويىن قۋالاي ءسىمىردى. ءسويتتى دە اشىرقانا ايعايلاپ جىبەرىپ، كوزىن توبەگە سالىپ شالقالاي كەتتى. كەۋدەسى كوتەرىلىپ- باسىلىپ، ەنتىگە تىنىس الىپ، تاعى ءبىر ايعايلاپ الدى دا، باسىن كوتەردى.

- ەندى سەن، - دەدى دە تۋرا جاڭاعىداي ەتىپ تالعاتقا جايمالاپ بەردى. تالعات تا اسەلدى قايتالادى. ءبىراق ەسەسىنە پىسقىرىپ- تۇشكىرىپ قاقالىپ قالدى. اسەل ساقىلداي كۇلدى. تالعاتتىڭ ەكى كوزى جاساۋراپ، تاڭدانعان بەينەمەن از وتىرىپ قالدى دا «ۋھ» دەپ دەم شىعاردى. ەندى كوزى شىراداي جانىپ، بارشا زات انىق كورىنە باستادى. بۇنىڭ سوڭىنان كولا قوسىلعان ۆيسكيدان ەكى بوكالدى تارتىپ جىبەردى.

بۇلار وسىنى تاعى ءبىر- ءبىر قايتالادى. تالعات وزگە ءبىر الەمگە كىرىپ بارا جاتقانداي سەزىندى، كوز الدىنداعى زاتتاردىڭ ءبارى فورماسىن جوعالتىپ، سۇيىق ءبىر نارسەگە اينالىپ اعىپ بارا جاتقانداي بولدى. ءتىپتى ءوزىنىڭ قولى دا قورعاسىنشا بالقىپ، ەندى از بولسا جەرگە توگىلۋگە تاياپ بارا جاتتى. وسى كەزدە ەسىكتى اشىپ باعاناعى قارا مۇرتتى، قاسقا باس بارمەن كىردى.

- ءبىر نارسە كەرەك پە، اسەل حانىم؟

- مىنا قوقىستاردى جيناشى.. .

بارمەن بوساپ قالعان بوتەلكەنى كوتەرۋگە ەڭكەيگەن، تالعات وعان جالت قارادى:

- تۇلكى، - دەدى، كوز الدىندا ۇزىن مۇرتتى، ماڭدايى جاپ- جالتىر، قۇلاعى ءتىپ- تىك قارا تۇلكى پايدا بولا كەتتى، - تۇلكى!! - تۇلكى بۇعان مۇرتى ەدىرەيە اپپاق تىستەرى اقسيا قارادى، - كىش، كەت، تۇلكى.. .

اسەل ساقىلداي كۇلدى. تالعات وعان دا جالت قاراعانى سول ەكەن، اسەل دە سۇيرىك ءجۇندى، تىك قۇلاق قىزىل تۇلكىگە ۇقساپ شىعا كەلدى. ول ساقىلداي كۇلگەن سايىن ەسكى تەليەۆيزوردىڭ ەكرانىنداعى بەينەشە شۇبارلاپ بارىپ، بىردە ادامعا، بىردە تۇلكىگە اينالىپ كەتىپ تۇردى. تالعاتتىڭ كۇلكىسى كەلدى. قارقىلاي جونەلدى. بارمەن شىعىپ كەتتى. اسەل تاعى دا تەمەكى تۇتاتتى. وسى ءسات الدە ءبىر تىنىشتىق تاپقانداي تالعاتقا تەسىلە قارادى. تالعات جاڭاعى ەلەستەردەن ءالى ارىلا الار ەمەس. ونىڭ كوزى شۇبالاڭداپ سوزىلعان تەمەكى تۇتىنىنە ءتۇستى. ءتۇتىن اسەلدىڭ اۋىزىنان شىققان سوڭ كوتەرىلىپ بارىپ الدە ءبىر فورماعا يە بولا باستادى. تالعات تاڭدانا قارادى، ءارى كۇلكىسى كەلىپ، ارسالاڭداي بەردى. ءتۇتىن ەسەكتىڭ قۇلاعىنداي قوس قۇلاعى بار، تەكە ءمۇيىز، ەشكى ساقال كارى شايتانعا ۇقسادى. ەندى شايتان ساقىلداپ كۇلە باستادى، ونىڭ داۋىسى اۋىزىنان ۇساق- ۇساق نايزا بوپ اتىلىپ شىقتى. ۇساق نايزالار ەكپىندەتە كەلىپ، تالعاتتىڭ ميىنا قادالدى. نايزالاردىڭ قالاي ۇشىپ شىعىپ، ميىنا دەيىن قالاي جەتكەنىن، قالاي قادالعانىنا دەيىن تالعات اپ- انىق كوردى. اسەل تەمەكىنى بۋداقتاتقان سايىن، ءتۇتىن شايتاننىڭ كەيپىن انىقتاي ءتۇستى، ويتكەن سايىن شايتان قاتتى كۇلدى، ال كۇلگەن سايىن كۇلكىسى نايزاشا ۇشىپ تالعاتتىڭ ميىنا قادالا بەردى، قادالا بەردى. سوندا ميىنان ءىرىڭ ارالاس قان اعا باستادى، قان باس سۇيەگىنىڭ ءىشىن بويلاپ كەڭىردەگىنەن ءوتىپ اسقازانىنا قۇيىلدى. اسقازانىنىڭ تۇبىنەن باستاپ لەپىلدەي تولىپ، كوتەرىلە بەردى. وسى كەزدە تالعات لوقسىپ قۇسىپ جىبەردى. الدىنداعى ۇستەلدىڭ ءۇستى، ەدەن تۇگەلدەي جەگەن سالاتتىڭ قالدىعى مەن ىشكەن سىرا، اراق- شارابى ارالاسقان اشى قۇسىققا بىلعاندى. اسەل «اھ» دەپ اتىپ تۇردى دا، ىشەگىن ۇستاي بۇراتىلا كۇلدى.

باعاناعى قارا تۇلكى قايتا پايدا بولدى. ول ەندى ادامعا اينالا باستادى. تەگىس ەدەن قيسايىپ بارادى، تالعات قۇلاپ قالماۋ ءۇشىن ديۆاننىڭ جوعارعى جاق باسىنا جارماستى. اسەل ودان ءارى ساقىلداي ءتۇستى، ونىڭ داۋىسى الىستاپ، ۇڭگىر ىشىندەگىدەي جاڭعىرىعىپ وشكىندەي بەردى.. . تالعات قالعىپ كەتكەندەي بولدى.

ەسىن جيناي قالعاندا اسەل قولىن بۇنىڭ ىشقىرىنا سۇڭگىتىپ جىبەرگەنىن كوردى. تالعات ىرعالاڭداپ ارەڭ تۇردى دا دۋشقا كىرىپ، جۋىنىپ، ءسال تارتىپكە كەلدى.

ازدان كەيىن ەكەۋى تاعى دا ۇستەل باسىندا وتىردى. تالعاتقا بۇل ءتۇن ۇزاققا سوزىلىپ كەتكەن سەكىلدى كورىندى. اسەل باعاناعى اق ۇنتاقتان تاعى دا قايتالاتتى.

- ەندى شىعىپ كەتەيىك.. .

- قايدا؟

- باسقا جەر بار، بۇدان كورى ەركىنىرەك. تاكسي شاقىرىپ قويدىم، ەندى كولىك مىنە المايمىز.. .

- وسى جەر دە جامان ەمەس ەدى.. .

- كەتۋ كەرەك. مەنى تاۋىپ الدى.

- كىم؟ .. .

سۇراق جاۋاپسىز قالدى. ەكەۋى سىرتقا شىقتى. تاڭنان ءالى بەلگى جوق. تالعاتتىڭ باسى تاعى اينالا باستادى. ولار تاكسيگە وتىردى.

تاكسي ۇلكەن كوشەدەردىڭ بىرىنە شىقتى دا اعىلا جونەلدى.

- ول كورىپ قالدى، ەندى بىزدەن قالمايتىن بولدى، - دەدى اسەل ماشينانىڭ ارتقى تەرەزەسىنە ابىرجي قاراپ.

- ول كىم؟

- ك ن ب- شنيك.

- ول نە ىستەيدى؟

- مەنى اڭديدى.

- نەگە؟

- مەن ونىڭ باستىعىنىڭ ءبىرىنشى توقالىمىن.

- سوندا ونىڭ نەشە توقالى بار؟

- كوپ، ونى قايتەسىڭ، ودان دا مىنادان قۇتىلۋدى ويلاۋ كەرەك، ۇستاپ السا ەكەۋىمىز دە قۇريمىز، اسىرەسە ساعان جامان بولادى.

- مەن نە ىستەپ قويدىم؟

- سەن ونىڭ ەكىنشى ايەلىمەن كوڭىل كوتەرىپ ءجۇرسىڭ.. .

- جوق، سەن مەنىمەن كوڭىل كوتەرىپ ءجۇرسىڭ.. .

- ول ماڭىزدى ەمەس.. .

- ودان نەگە قاشاسىڭ؟

- كىمنەن؟

- كۇيەۋىڭنەن.. .

- سۇيمەيمىن.. .

- سۇيمەسەڭ نەگە تيەسىڭ؟

- .. . سەنىڭ شارۋاڭ ەمەس.. .

تالعات ەكى كوزى الاقتاپ، ماشينانىڭ ارتقى تەرەزەسىنە قارادى. وتىز مەتر شاماسىندا قاشىقتىق ۇستاپ، فارىن ءالسىز عانا جاعىپ، قارا ءتۇستى مەرسەدەس S class ىلەسىپ كەلەدى ەكەن. قارا مەرسەدەس ەكى ەزۋىنەن جالىن شاشقان قارا ايداھارعا ۇقساي باستادى، تالعات باعاناعى اق ۇنتاقتىڭ تاعى اسەر ەتە باستاعانىن ءتۇسىندى. ودان ءارى تۇتاس دۇنيە قۇبىلىپ جۇرە بەردى. ول الدىنا قاراپ وڭالىپ وتىردى. جاڭاعى قارا ايداھار ارعىماق جىلقىعا اينالدى. اسفالتتىڭ ءۇستىن تاسىرلاتا شاۋىپ، قۋىپ كەلە جاتىر. ءتىپتى اسفالتقا تيگەن تۇياق دىبىسىنا دەيىن قۇلاعىنا جەتتى. كەنەت وزدەرى مىنگەن تاكسي دە كۇرەڭ اتقا اينالىپ شىعا كەلدى، بۇل ەڭ ارتىنا مىنگەسىپ الىپتى، قۇلاپ قالارداي بولىپ اسەلدى قاتتى قۇشاقتاپ الدى. نەگە ەكەنى بەلگىسىز ەكەۋى جارىسا كۇلدى. كۇلكى اۋەنىمەن بىرگە بۇكىل دۇنيە ىدىراپ، تۇگەل فورماسىن جوعالتا باستادى. اسەل دە، ءوزى دە، تاكسي مەن قارا مەرسەدەستىڭ دە تەك بوياۋى عانا قالدى. انشەيىن كەڭىستىككە شاشا سالعان بوياۋلار ءبىرى قۋىپ، ءبىرى قاشىپ بارادى. بۇلار مىنگەن سۇرى ءتۇستى تاكسي مەن اسەلدىڭ قىزىل جانە قوڭىر ءتۇستى كيىمدەرى، تالعاتتىڭ اقشىل كيىمدەرى ارالاسىپ، تۇنگى كۇڭگىرت كەڭىستىكتە قالىقتاي ۇشىپ بارا جاتقان اق، قىزىل، سۇرى بوياۋلاردىڭ قوسىندىسىنا اينالدى. ال ارتقى جاقتا وزىنەن كۇڭگىرت سارى بوياۋ شاشىپ، قويۋ قارا بوياۋ جاقىنداپ كەلەدى. ول جاقىنداعان سايىن زورايىپ، ءبارىن جۇتىپ جىبەرەردەي كورىندى. كەلەسى ساتتە تاعى دا قارا ايداھار پايدا بولدى، جالىن شاشقان ايىر ءتىلىن جالاڭداتىپ، ۇشىپ كەلە جاتتى.. . ءوستىپ بىرىنەن كەيىن بىرىنە الماستى. وسىنىڭ ءبارىن تالعات بيىكتەن كورىپ كەلەدى. ول ءوزىنىڭ دە بىردە بوياۋعا، بىردە ادامعا اينالعان بەينەسىن سىرتىنان كوردى. ەكى كوزى عانا كەڭىستىككە ۇشىپ شىعىپ، ءبارىن باقىلاپ تۇرعان سەكىلدى.. .

ءبىر كەزدە تاكسي توقتاي قالدى. اسەل:

- تەز ءتۇس، قاش، - دەپ ايعاي سالدى. ءوزى دە بىرگە ءتۇسىپ جول شەتىندەگى باق ىشىنە قاراي جۇگىردى. تالعات سۇرىنە- قابىنا قاشىپ بارا جاتىپ، تاكسيدەن وزىپ بارىپ توقتاپ، قارا مەرسەدەستەن ءتۇسىپ جاتقان ەر ادامدى بايقاپ قالدى، قولىندا ناگانى بار ەكەن. تالعات جۇگىرىپ كەلدى دە ۇلكەن ءبىر تاستىڭ قالقاسىنا تىزەسىن قۇشاقتاپ وتىرا كەتتى. وسى كەزدە باعاناعى ادام دا قۋىپ جەتىپ، بۇعان ناگانىن وقتاپ تۇرعانىن سىرتىمەن سەزدى. اجال جەتتى دەپ ءتۇسىندى، كوز الدىنا سوناۋ ءبىر بالالىق شاعى، بۇلاق بويى ەلەستەي بەردى.. .

تارس ەتكەن مىلتىق داۋىسى ەستىلدى، ەندى تالعات بارشا ءومىرىن ءبىر- اق ساتتە كوز الدىنا كەلتىردى. ىلە- شالا جەلكە تۇسىنان قاتتى ءبىر سوققى تيگەندەي بولدى، ونىمەن بىرگە باس سۇيەگى شارت ەتىپ جارىلدى دا، ميى اتىلىپ شىعىپ، كەڭىستىككە باياۋ شاشىلا بەردى. باعاناعى كوز الدىنا ەلەستەگەن بارشا ەلەسى شاشىراعان ميىنىڭ ءار بولشەگىندە بىرگە شاشىراپ بارادى. بەينە اينانى سىندىرىپ جىبەرگەندە اينا بەتىندەگى كورىنىستەردىڭ كۇل- پارشا بولىپ ۇساقتالعانى سەكىلدى، ءبىر بولشەگىندە اناسىنىڭ، ءبىر بولشەگىندە بالالىق شاعىنىڭ، ەندى بىرىندە العاشقى ماحابباتىنىڭ بەينەسى، بالالىق ارمان، قۋانىشتى ساتتەر، تاعى- تاعىلار ءتۇن قۇشاعىنا ءسىڭىپ بارادى.. . شاشىراپ بارا جاتقان ەلەستەردى جيناعىسى كەلگەندەي قولىن قاۋمالاي سوزدى. ۇمسىنعان بەتى ەكپەتىنەن قۇلادى، بارشا ەلەستەر ءسونىپ، جوق بولدى. قاراڭعىلىق ورنادى.. .

بەتىنە شاشىپ جىبەرگەن قاردان سەلك ەتىپ ەسىن جينادى. ولمەپتى.

- مەن ونى اتتىم، - دەدى اسەل. جىگىت بۇنىڭ جانىندا ۇزىنىنان جاتىر، كەۋدەسى قان- قان. تالعات ورىنىنان اتىپ تۇردى، - ماڭدايى سەنىڭ جەلكەڭە ءتيىپ جىعىلدى، سودان سەن تالىپ قالدىڭ. قۇداي- اي، مەن ونى ءولتىرىپ قويدىم، مەن ءولتىرىپ الدىم.. ., - اسەل اپتىعىپ، قاتتى ايعايلاپ جىبەردى.

- نەگە اتتىڭ ونى؟

- سەنى ءولتىرىپ تاستايتىن ەدى عوي...

- مەن ەندى ءبارى ءبىر ولەم عوي...

اسەل جىلاپ جىبەردى. تالعات ەسىن تولىق جيناپ الدى. نە ىستەرىن بىلمەي، اينالاعا، اسپانعا قارادى، تاڭنىڭ ءالى بەلگىسى جوق. تاڭ اتسا بارىنەن قۇتىلاتىنداي سەزىنىپ ەدى.

- سەن كىمسىڭ ءوزى؟ قانداي قاتىنسىڭ؟

- ....

- كىمسىڭ دەيمىن، كۇيەۋىڭ كىم سونشا؟

- ول ك ن ب- نىڭ گەنەرالى. ەندى بىزگە ءومىر جوق.. .

- بىزگەڭ نە؟ ماعان نە قاتىسى بار؟

- ....

تالعات جىندانىپ كەتە جازدادى. اسەل سولقىلداپ جىلاۋىن قويار ەمەس.

- مەن كەتتىم، تۇك قاتىسىم جوق بۇعان...

- ءبارى ءبىر قۇتىلمايسىڭ...

تالعات جۇگىرە باسىپ الىستاي بەردى، «تاڭ اتسا ءبارى جاقسى بولار ما ەكەن؟ .. .» دەگەن ءبىر الدامشى ءۇمىت كوكجيەككە كوز سالدىرا بەردى...

اۆتورى: ەسبول نۇراحمەت



باستى سوزدەر: قوعام,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات