سىنىپتاستار جايلى «ارمانداستار» تەلەحيكاياسى كورسەتىلەدى

الماتى. قازاقپارات - الماتى قالاسىندا «حابار» اگەنتتىگى تاپسىرىسىمەن تۇسىرىلگەن «ارمانداستار» اتتى جاڭا تەلەحيكايانىڭ اشىق كورسەتىلىمى ءوتتى، دەپ حابارلايدى قازاقپارات.

تەلەحيكايانىڭ تەليەۆيزيالىق نۇسقاسى العاش 11 - قاراشا كۇنى ساعات 20.10-دا «حابار» تەلەارناسىنان كورسەتىلەدى.

«ارمانداستار» - مەكتەپ بىتىرگەندەرىنە 20 جىل تولۋىنا وراي ءوز اۋىلدارىندا، وزدەرى تۇلەپ ۇشقان مەكتەپ قابىرعاسىندا كەزدەسۋ كەشىن ۇيىمداستىرعان سىنىپتاستاردىڭ حيكاياسى. كىم دە كىم بۇل تۋىندىداعى ءار كەيىپكەردەن ءوزىن، جاقىندارىن جانە دوستارىن كورەتىن بولادى. ءبىزدى ءتۇرلى ءومىر بۇرالاڭدارى مەن قيلى تاعدىر جولدارى كۇتەدى. بالكىم، باز بىرەۋلەردىڭ ومىرىنە بۇل كەزدەسۋ - ۇلكەن وزگەرىستەر الىپ كەلۋى مۇمكىن. «ارمانداستار» - ومىردەگى دوستىق، وتباسى جانە ماحاببات سىندى قۇندىلىقتار تۋرالى تەلەحيكايا»، - دەدى «حابار» اگەنتتىگى باسقارما ءتوراعاسىنىڭ ءبىرىنشى ورىنباسارى رينات كەرتايەۆ ءىس شارا بارىسىندا.

سونداي- اق، ءىس- شاراعا جوبانىڭ پروديۋسەرى ءارى سسەناريسى - گۇلنۇر ماماساريپوۆا، سونداي- اق، باستى رولدەردى سومداعان كامشات جولدىبايەۆا، ماقپال يسابەكوۆا، بەرىك ايتجانوۆ، ازامات ساتىبالدى ي رۇستەم جانىمانوۆ قاتىستى.

«قىرىقتىڭ ار جاق، بەر جاعىنداعى ادامداردىڭ دا تاعدىرلارى سان قيلى بولادى، سونىڭ ءبارىن توعىستىراتىن ءبىر تەلەحيكايا تۇسىرگىم كەلدى. 20 جىلدىق كەزدەسۋ دەگەن ول تەك قانا سەبەپ قانا. ءبىر ءداۋىردىڭ ادامدارىن ۇزاق ۋاقىتتان كەيىن جۇزدەستىرۋ ارقىلى - ادامداردى ءومىر قالاي وزگەرتەتىنىن، ولاردىڭ تۇلعا رەتىندە قالىپتاسۋىنا قانداي فاكتورلاردىڭ اسەر ەتەتىندىگىن كورسەتكىم كەلدى»، - دەدى گۇلنۇر ماماساريپوۆا.

جاڭا تەلەحيكايادا سىنىپتاستاردىڭ ءرولىن كورەرمەنگە كوپتەن تانىس بەرىك ايتجانوۆ، كامشات جولدىبايەۆا، ازامات ساتىبالدى، الما ءادىل قىزى، نۇرگۇل نۋعىمانوۆا، رۇستەم جانىمانوۆ، اسىلبەك قاپايەۆ، دۋلىعا اقمولدا، ماقپال يسابەكوۆا، ەرعالي دۇيسەن، ءالىمحان مىرزاحان جانە سانيا ەرزات سومدايدى.