قازاقستان مەن رەسەي مەملەكەتتىك شەكارانى بەكىتتى
قازاقستان مەن رەسەي اراسىنداعى شەكارانىڭ ۇزىندىعى - 7,5 مىڭ شاقىرىم. ونى دەماركاتسيالاۋ بويىنشا جۇمىستىڭ 86 پايىزدان استامى اياقتالعان.
ەكى كورشى مەملەكەتتىڭ شەكارانى بەكىتكەنى تۋرالى اقپارات تاراتقان «دوجد» تەلەارناسى «ەكى جاق يماشيەۆ گاز-كوندەنسات كەنىشىن تەپە-تەڭ ءبولىستى» دەپ جازدى.
ماسكەۋ مەن استانا 2005-جىلى مەملەكەتتىك شەكارا تۋرالى كەلىسىمگە قول قويعان. سول ۋاقىتتان بەرى ونى ديليميتاتسيالاۋ جانە دەماركاتسيالاۋ جۇمىسى باستالعان.
ەكى مەملەكەتتىڭ شەكارانى بەكىتكەنى تۋرالى اقپارات قازاقستان پرەزيدەنتى قاسىم-جومارت توقايەۆتىڭ ومبىداعى 16- ءوڭىرارالىق ارىپتەستىك فورۋمىنا قاتىسىپ جاتقان كەزدە پايدا بولدى. فورۋم اياسىندا توقايەۆ رەسەي پرەزيدەنتى ۆلاديمير پۋتينمەن كەزدەسىپ، ەكى باسشى ساۋدا-ەكونوميكالىق قارىم-قاتىناس ماسەلەلەرىن تالقىلاعان. كەزدەسۋ سوڭىندا توقايەۆ پەن پۋتين شەكارا ماڭى ىنتىماقتاستىعىن دامىتۋ، شەكاراداعى وتكىزۋ بەكەتتەرىنىڭ جۇمىسى جانە وزگە سالالارعا قاتىستى بىرنەشە قۇجاتقا قول قويعان.
قاسىم-جومارت توقايەۆ پرەزيدەنت رەتىندە رەسەيگە وسىمەن ءۇشىنشى رەت بارىپ وتىر. قازاقستاندى 30 جىلعا جۋىق باسقارعان 79 جاستاعى نۇرسۇلتان نازاربايەۆ ناۋرىز ايىندا پرەزيدەنتتىكتەن كەتكەننەن كەيىن پرەزيدەنت بولعان توقايەۆ بۇدان بۇرىن نازاربايەۆ بەلگىلەگەن باعىت-باعداردى جالعاستىراتىنىن بىرنەشە رەت قايتالاعان. كورشى رەسەيمەن تىعىز قارىم-قاتىناس ورناتقان قازاقستان - ۇجىمدىق قاۋىپسىزدىك شارتى ۇيىمى جانە ەۋرازيا ەكونوميكالىق وداعىنا (ە ا ە و) مۇشە. كەيبىر باقىلاۋشىلاردىڭ پىكىرىنشە، رەسەي پوستسوۆەتتىك كەڭىستىكتە ماسكەۋ ىقپالىن كۇشەيتۋ ءۇشىن ە ا ە و- نى قۇرال رەتىندە قولدانادى.
«ازاتتىق»