سەناتورلار «اۋىل-ەل بەسىگى» جوباسىنا ەنبەگەن ەلدى مەكەندەر ماسەلەسىن كوتەردى

نۇر-سۇلتان. قازاقپارات - پارلامەنت سەناتى اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتى ەلىمىزدىڭ ۇلتتىق ەكونوميكا، اۋىل شارۋاشىلىعى، يندۋستريا جانە ينفراقۇرىلىمدىق دامۋ مينيسترلىكتەرىنىڭ باسشىلارىمەن كەزدەسىپ، «اۋىل-ەل بەسىگى» ارنايى جوباسىن جۇزەگە اسىرۋ بارىسىن تالقىلادى، دەپ حابارلايدى قازاقپارات جوعارى پالاتانىڭ باسپا ءسوز قىزمەتىنە سىلتەمە جاساپ.

«كوپتەگەن اۋىلداردىڭ، اسىرەسە شەكاراداعى اۋىلدىق جەرلەردىڭ «اۋىل-ەل بەسىگى» جوباسىنا ەنبەگەنى ءبىزدى تولعاندىرىپ وتىر. ول جەردە دە ءبىزدىڭ ازاماتتارىمىز تۇرادى، ولار دا مەكتەپتەر مەن اۋرۋحانالارعا مۇقتاج»، - دەدى كوميتەت ءتوراعاسى ءالي بەكتايەۆ.

ۇلتتىق ەكونوميكا ءمينيسترىنىڭ ورىنباسارى ەرمەك الپىسوۆتىڭ ايتۋىنشا، 2027-جىلعا دەيىن جوبانى جۇزەگە اسىرۋعا 900 ميلليارد تەڭگە بولىنەدى. ونىڭ 70 پايىزى رەسپۋبليكالىق بيۋدجەتتەن، قالعان 30 پايىزى جەرگىلىكتى بيۋجەتتەن بولادى. اكىمدىكتەرمەن بىرلەسە وتىرىپ، جىل سوڭىنا دەيىن اۋىلدىق اۋماقتار مەن ەلدى مەكەندەردىڭ ءتىزىمى جاڭارتىلادى.

«جوسپار بويىنشا 2027-جىلعا دەيىن «اۋىل-ەل بەسىگى» جوباسىن جۇزەگە اسىرۋ قورىتىندىسى بويىنشا 7 ميلليون اۋىل تۇرعىنىنىڭ ءال-اۋقاتى جاقسارىپ، اۋىز سۋمەن، دامىعان ينفراقۇرىلىممەن قامتاماسىز ەتىلەدى»، - دەپ سەندىردى ە. الپىسوۆ.

اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ ءتوراعاسى ءالي بەكتايەۆ ءوز كەزەگىندە مينيسترلىك وكىلدەرىنە ەلدى مەكەندەرگە بارىپ، بولىنگەن قاراجاتتىڭ يگەرىلۋىن تەكسەرۋ جونىندە كەڭەس بەردى. سەناتور سونداي-اق كوميتەت باعدارلامانىڭ ورىندالۋىنا مونيتورينگ جۇرگىزەتىنىن اتاپ ءوتتى.