ەلوردادا دەمالىس كۇندەرى قايدا بارۋعا بولادى؟

نۇر-سۇلتان. قازاقپارات - ەلوردادا دەمالىس كۇندەرى ءبىرقاتار مادەني- ويىن-ساۋىق شارالارى ۇيىمداستىرىلادى، دەپ حابارلايدى قازاقپارات قالا اكىمدىگىنىڭ سايتىنا سىلتەمە جاساپ.

الداعى دەمالىس كۇندەرى نۇر-سۇلتاندا ەلوردالىق كوماندالاردىڭ قاتىسۋىمەن بىردەن ەكى ماتچ وتەدى.

«كورمە» زالىندا SuluExpo 2019 سۇلۋلىق يندۋسترياسىنىڭ 18-حالىقارالىق كورمەسى باستالدى. قوناقتاردى رەسپۋبليكالىق اۋقىمداعى چەمپيوناتتار، وڭىرلىك دەڭگەيدەگى كونكۋرستار، وزەكتى تاقىرىپتار بويىنشا كونفەرەنسيالار كۇتۋدە. تانىمال شەبەرلەردىڭ قاتىسۋىمەن بارلىق باعىتتاعى ماستەر-كلاستار، قازاقستان مەن رەسەيدىڭ ۇزدىك سۇلۋلىق ساراپشىلارىنىڭ وقۋ سەمينارلارى، ترەنينگتەر كورمەنىڭ ءسانىن كىرگىزەدى. سونىمەن قاتار، كورمە الاڭىندا ءوز سالاسىنىڭ بەدەلدى ماماندارىنىڭ فورۋمدارى، سونداي-اق ديرەكتورلار مەن سۇلۋلىق يندۋسترياسى ماماندارىنا ارنالعان «Sulu Boom» لوتەرەيا ويىنى وتەدى. ءىس-شارا 9- قاراشاعا دەيىن جالعاسادى، بيلەتتى باراتىن كۇنى تىركەۋ ورنىنان الۋعا بولادى.

سەنبى، ياعني 9- قاراشا كۇنى «سارىارقا» ۆەلوترەگىندە «استانا» پرەزيدەنتتىك باسكەتبول كلۋبى مەن تسموكي- مينسك باسكەتبول كلۋبى كەزدەسەدى. جانكۇيەر قاۋىمدى قىزىقتى ويىن كۇتىپ تۇر. سەبەبى بۇل ەكى كوماندانىڭ اراسىنداعى تەكە-تىرەس ءاردايىم تارتىستى وتەدى. «استانا - تسموكي مينسك» ماتچىنا بيلەتتەردى ونلاين ساتىپ الۋعا بولادى، قۇنى 200 تەڭگەدەن باستالادى. ويىن ۋاقىتى 15:00 دە.

كۇندىز «استانا ارەنا» ستاديونىندا فۋتبولدان «استانا» كومانداسى پاۆلوداردىڭ «ەرتىسىمەن» كەزدەسەدى. قازاقستان پرەمەر-ليگاسى اياسىندا وتەتىن ويىن 10- قاراشا كۇنى ساعات 15:00 دە باستالادى. بيلەت قۇنى - 500 تەڭگەدەن.

سول كۇنى كەشكە بەيبىتشىلىك جانە كەلىسىم سارايىنىڭ زالىندا قازاقستان رەسپۋبليكاسىنىڭ ەڭبەك سىڭىرگەن قايراتكەرى تۇرسىنبەك قاباتوۆتىڭ «تۇرسىنبەك قاباتوۆ 40 جىل» اتتى جەكە ءازىل-سىقاق كونسەرتى وتەدى. ءازىل كەشى ساعات 18:00 دە باستالادى. بيلەتتىڭ ەڭ تومەنگى باعاسى - 3000 تەڭگە.