داۋرەن ابايەۆ: ازاماتتىق قوعامدى دامىتۋ سالاسىندا تەرەڭ رەفورما جۇرگىزۋگە نيەتتىمىز
مينيستر قازاقستان وزىندىك جۇيەلى شارالاردى قولعا الىپ جاتقانىن تىلگە تيەك ەتتى.
«ءبىز ەكونوميكانى سيفرلاندىرۋدى قولعا الدىق. بۇل پروتسەسكە جاستاردى كەڭىنەن تارتىپ جاتىرمىز. قازاق حالقىنىڭ ءداستۇرلى قۇندىلىقتارىن قازىرگى زاماننىڭ كوزقاراسىمەن ۇيلەستىرۋ ءۇشىن «رۋحاني جاڭعىرۋ» باعدارلاماسى جۇزەگە اسىرىلۋدا. ءۇشىنشىسى - قازاقستان پرەزيدەنتى حالىققا قۇلاق اساتىن مەملەكەتتىڭ تۇجىرىمداماسىن جاريالادى. ونىڭ نەگىزىندە بيلىك پەن ادامنىڭ ادىلەت، اشىقتىق جانە سەنىم قاعيداتتارى اياسىنداعى ءوزارا ءىس-قيمىلى جاتىر»، - دەدى داۋرەن ابايەۆ.
مينيستر قازاقستاندا جۇزەگە اسىرىلىپ جاتقان «پرەزيدەنتتىك كادر رەزەرۆى» جوباسى مەملەكەتتىك جۇيەنىڭ باسقارۋشىلىق قۇرامىن جاس، شىعارماشىل جاستاردىڭ ەسەبىنەن جاڭارتۋعا باعىتتالعانىن اتاپ ءوتتى. ونىڭ ايتۋىنشا، 2020-جىل - قازاقستاندا ۆولونتەرلەر جىلى دەپ جاريالانعان.
«بۇگىن ۇلى وتان سوعىسىنداعى جەڭىستىڭ 75 جىلدىعى قارساڭىندا قازاقستاندىق-رەسەيلىك ۆولونتەرلىك جوبالاردى جۇزەگە اسىرۋ تۋرالى كەلىسىمگە قول قويىلدى. بۇل - ۇرپاعىنىڭ بەيبىت ءومىرى ءۇشىن جانىن بەرگەن جانداردىڭ ۇرپاعى - بىزدەر ءۇشىن اسا ماڭىزدى باعىت. سونىمەن بىرگە ءبىز بىرلەسكەن جوبالاردىڭ تاقىرىپتارىن كەڭەيتۋدى ۇسىنامىز»، - دەدى د. ابايەۆ.
ول ۆولونتەرلىك جاستاردىڭ جۇمىسقا ورنالاسۋىنىڭ ءبىر ءتۇرى ەكەنىن، ونىڭ وزەكتىلىگى ارتا تۇسەتىنىن جەتكىزدى.
«مەملەكەت جۇمىستان تىس ۋاقىتتا ازاماتتى سمارتفونمەن عانا وڭاشا قالدىرماۋى كەرەك. بۇل ۇنەمى نارازىلىقتى، اڭگىمەلەسۋشىنى تىڭداي الماي، داۋ ءۇشىن پىكىرتالاسقا بەيىم بولۋدى، باسقا ادامداردىڭ قۇزىرەتى مەن ناتيجەلەرىن باعالاماۋدى ءومىر سالتىنا اينالدىرۋى مۇمكىن. وكىنىشكە قاراي، پوپۋليستىك ۇراندار مەن دەماگوگتار تۇرىندەگى جەلىلىك مازمۇن ءدال وسىعان نەگىزدەلگەن. وسىعان بايلانىستى ءبىز پرەزيدەنتتىڭ اتىنان ازاماتتىق قوعامدى دامىتۋ سالاسىندا تەرەڭ رەفورمالار جۇرگىزۋگە نيەتتىمىز جانە رەسەيلىك ارىپتەستەرىمىزبەن بىرگە جۇمىس ىستەۋگە دايىنبىز»، - دەپ تۇيىندەدى د. ابايەۆ.