داريعا نازاربايەۆا مەملەكەتتىك قىزمەت كورسەتۋ سالاسىندا ءتارتىپ ورناتۋعا شاقىردى

نۇر-سۇلتان. قازاقپارات - سەنات ءتوراعاسى داريعا نازاربايەۆا پالاتا وتىرىسىندا مەملەكەتتىك قىزمەت كورسەتۋ ماسەلەلەرى بويىنشا زاڭ جوباسىن قاراۋ بارىسىندا مەملەكەتتىك ورگاندارداعى سىبايلاس جەمقورلىقتىڭ كوپتەگەن دەرەكتەرى تۋرالى ايتىپ، وسى سالادا ءتارتىپ ورناتۋعا شاقىردى.

بۇل تۋرالى جوعارى پالاتانىڭ باسپا ءسوز قىزمەتىنە سىلتەمە جاساپ قازاقپارات حابارلايدى.

سەنات باسشىسى زاڭ جوباسىن تالقىلاۋ بارىسىندا «Transparency International» حالىقارالىق ۇيىمىنىڭ «قازاقستانداعى سىبايلاس جەمقورلىق جاعدايىنىڭ مونيتورينگى» بايانداماسىنداعى مالىمەتتەردى كەلتىردى، وندا پوليتسيا، مەملەكەتتىك جوعارى وقۋ ورىندارى، كوللەدجدەر، بالاباقشالار، سوت، قالا قۇرىلىسىن باقىلاۋ، جەر قاتىناستارى، حالىقتى جۇمىسپەن قامتۋ جانە الەۋمەتتىك قورعاۋ باسقارمالارى، اسكەري كوميسسارياتتار، كوشى-قون قىزمەتى كوش باستاپ تۇرعانى ايتىلادى. باياندامادا سونىمەن قاتار سىبايلاس جەمقورلىق سەبەپتەرىنىڭ العاشقى وندىعى اراسىندا مامانداردا ەمدەلۋ جانە قابىلداۋىندا بولۋ؛ جۇمىسقا ورنالاسۋ؛ جەر تەلىمىن الۋ جانە رەسىمدەۋ؛ بالانى بالاباقشاعا ورنالاستىرۋ جانە تاعى باسقا ماسەلەلەر بار.

«جۇرتشىلىق ونى تەزىرەك راسىمدەۋ ءۇشىن عانا تولەيدى. قازىر ءبىز «سيفرلىق قازاقستان» باعدارلاماسىن بەلسەندى تۇردە جۇزەگە اسىرىپ وتىرمىز. دەگەنمەن، باياندامادا كەلتىرىلگەن مالىمەتتەر بىزدە ءبارى جاقسى ەمەس ەكەنىن كورسەتەدى»، - دەپ تۇيىندەدى د. نازاربايەۆا.

سەنات باسشىسى وسىعان بايلانىستى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترىنىڭ ورىنباسارى ابىلايحان وسپانوۆتان «بۇل باعىتتا قانداي جۇمىستار اتقارىلۋدا؟ ۇزاققا سوزىلۋى جانە مەرزىمدەرگە بايلانىستى نە بولادى؟ بارلىق ءبىلىم بەرۋ مەكەمەلەرىندە اقپاراتتاندىرۋدى جەدەلدەتۋ ءۇشىن نە ىستەۋ كەرەك؟» - دەپ سۇرادى.

سۇراققا جاۋاپ بەرە كەلىپ ا. وسپانوۆ قازىرگى كەزدە مەملەكەتتىك قىزمەتتەردى وڭتايلاندىرۋ جانە اۆتوماتتاندىرۋ بويىنشا 500 گە جۋىق جول كارتاسى بەكىتىلگەنىن حابارلادى. «بۇل جۇمىستار جالعاسىن تابۋدا، ءار ەكى اپتا سايىن ءبىزدىڭ كوميسسيانىڭ وتىرىسى بولادى، بارلىق ەسكەرتۋلەر قارالادى»، - دەدى ول.

مەملەكەتتىك قىزمەتتەر كورسەتۋدەگى اۋرە-سارساڭ مەن مەرزىمىنىڭ ساقتالماۋىنا بايلانىستى پروبلەمالاردى شەشۋ جونىندە قانداي شارالار قولدانىلعانى تۋرالى سەنات ءتوراعاسىنىڭ ساۋالىنا مەملەكەتتىك قىزمەت ىستەرى اگەنتتىگى ءتوراعاسىنىڭ ورىنباسارى مارات داۋەشوۆ جاۋاپ بەردى. «تاجىريبە كورسەتىپ وتىرعانداي، مەملەكەتتىك ورگاندار مۇنداي قىزمەتتەردى كولەڭكەدەن شىعارۋعا مۇددەلى ەمەس. 2015-جىلدان باستاپ تىزىلىمگە 170 جاڭا مەملەكەتتىك قىزمەت ەنگىزىلدى، ونىڭ ىشىندە اگەنتتىكتىڭ باستاماسىمەن 77 قىزمەت ۇسىنىلدى»، - دەدى ول.

تالقىلاۋ قورىتىندىسى بويىنشا پارلامەنت سەناتى مەملەكەتتىك قىزمەت كورسەتۋ ماسەلەلەرى بويىنشا زاڭناماعا تۇزەتۋلەردى قابىلدادى.