قاسىم- جومارت توقايەۆ رەسەيدە نازاربايەۆ مەكتەبىنىڭ فيليالىن اشۋدى ۇسىندى
«مادەني- گۋمانيتارلىق سالاداعى ىنتىماقتاستىقتىڭ دا ماڭىزى زور. بۇل رەتتە كەلەشەگى الەۋەتتى سالالاردىڭ قاتارىنا سپورتتىق ءبىلىم، سپورتتىق مەديتسينا، بىرلەسكەن وقۋ- جاتتىعۋ جيىندارىن وتكىزۋ، اۋەسقوي جانە كاسىبي سپورت تۇرلەرىن دامىتۋ جۇمىستارىن اتاپ وتۋگە بولادى. وسىعان بايلانىستى سپورت سالاسىنداعى بىرلەسكەن ءۇش جىلدىق باعدارلامانى ازىرلەۋدى ۇسىنامىز»، - دەدى پرەزيدەنت ومبىدا ءوتىپ جاتقان «شەكارا ماڭى ىنتىماقتاستىعىن دامىتۋدىڭ وزەكتى ماسەلەلەرى» اتتى قازاقستان مەن رەسەي اراسىنداعى XVI ءوڭىرارالىق ىنتىماقتاستىق فورۋمىندا.
مەملەكەت باسشىسى سونىمەن قاتار، عىلىم سالاسىنداعى ىنتىماقتاستىقتىڭ دا بولاشاعى جارقىن ەكەنىنە سەنىم ءبىلدىردى.
«اسىرەسە، فۋندامەنتالدى عىلىمداعى سەرىكتەستىكتى نىعايتۋ كەرەك. قازاقستاننىڭ استاناسىندا باۋمان اتىنداعى ۋنيۆەرسيتەت بازاسىندا فيزيكا- ماتەماتيكالىق مەكتەپ اشۋ باستاماسىن قولدايمىز. سونىمەن بىرگە، رەسەيدىڭ شەكارالاس وڭىرلەرىنىڭ بىرىنە نازاربايەۆ زياتكەرلىك مەكتەبىنىڭ فيليالىن اشۋعا دا بولادى. ول مەكتەپتە ءبىلىم بەرۋ دەڭگەيى وتە جوعارى ءارى جەتەكشى ەلدەردىڭ ستاندارتتارىنا ساي كەلەدى»، - دەدى ول.
ەسكە سالا كەتسەك، پرەزيدەنت بۇگىن «شەكارا ماڭى ىنتىماقتاستىعىن دامىتۋدىڭ وزەكتى ماسەلەلەرى» اتتى قازاقستان مەن رەسەي اراسىنداعى XVI ءوڭىرارالىق ىنتىماقتاستىق فورۋمىنا قاتىسۋ ءۇشىن ومبىعا ۇشىپ كەلگەن بولاتىن.
اۆتور: ايان بەكەن ۇلى