قاسىم- جومارت توقايەۆ ۆلاديمير پۋتينمەن كەزدەستى

None
None
ومبى. قازاقپارات - قاسىم- جومارت توقايەۆ پەن ۆلاديمير پۋتين ومبىداعى ەكىجاقتى كەزدەسۋ بارىسىندا مەملەكەتتەر اراسىنداعى قاتىناستاردى دامىتۋدا ءوڭىرارالىق ىنتىماقتاستىق فورۋمدارىن وتكىزۋدىڭ ماڭىزدىلىعىن اتاپ ءوتتى، دەپ حابارلايدى قازاقپارات ءتىلشىسى.

 «ءبىزدىڭ تۇڭعىش پرەزيدەنتىمىز نۇرسۇلتان نازاربايەۆ پەن سىزدەردىڭ كۇش- جىگەرلەرىڭىزدىڭ ارقاسىندا بۇل مەحانيزم تولىقتاي ىسكە قوسىلىپ، ءوڭىرارالىق فورۋم ايماقتىق دەڭگەيدە ءوزارا ارەكەتتەسۋدىڭ ءتيىمدى قۇرالى رەتىندە ءوزىن جاقسى جاعىنان كورسەتتى. ءبىزدىڭ ەلدەرىمىزدىڭ وڭىرلەرى اراسىنداعى تاۋار اينالىمى - جالپى ساۋدانىڭ 10 پايىزىنان اسۋىنىڭ ءوزى وتە ماڭىزدى. بۇل كورسەتكىشتىڭ ءوسىپ كەلە جاتقانىن دا اتاپ ءوتۋ كەرەك»، - دەدى قازاقستان پرەزيدەنتى.

مەملەكەت باسشىسى ءوز سوزىندە وندىرىستىك كووپەراتسيا مەن اۋىل شارۋاشىلىعى سالاسىنداعى ىنتىماقتاستىقتا ۇلكەن جەتىستىكتەرگە قول جەتكىزىلگەنىن ايتتى.

«ءوز تاراپىمنان بۇدان دا جوعارى ناتيجەگە جەتۋ ءۇشىن بار كۇشىمدى سالامىن. ءوڭىرارالىق ىنتىماقتاستىق فورۋمى وتە ءتيىمدى، جەمىستى، ارينە، ونى بولاشاقتا دامىتۋ ءۇشىن بار كۇش- جىگەرىمىزدى سالۋىمىز كەرەك»، - دەدى قاسىم- جومارت توقايەۆ.

ءوز كەزەگىندە رەسەي پرەزيدەنتى ۆلاديمير پۋتين ءوڭىرارالىق ىنتىماقتاستىق فورۋمى - بۇل قازاقستان مەن رەسەيدىڭ ايماقتارىن بىرىكتىرەتىن ءداستۇرلى شارا ەكەنىن اتاپ ءوتتى.

«2003 -جىلى بۇل شارا ءدال ومبىدا باستالعان ەدى. بۇل تۇرعىدا بۇگىنگى كەزدەسۋدىڭ بەلگىلى ءبىر سيمۆوليزمى بار. ءبىزدىڭ ەلدەر اراسىنداعى قاتىناس تابىستى تۇردە بەكىپ كەلەدى. وتكەن جىلى تاۋار اينالىمىنىڭ ءوسىمى 14 پايىزدى قۇرادى. ينۆەستيتسيالار دا ءوسىپ كەلەدى. ەندى بۇل تۋرالى كوبىرەك سويلەسۋگە مۇمكىندىك الامىز. ءبىز ۇنەمى كەزدەسىپ تۇرامىز. دەگەنمەن، ءارقاشان ءبىزدىڭ ەرەكشە نازارىمىزدى تالاپ ەتەتىن تاقىرىپتار بارشىلىق»، - دەدى ۆ. پۋتين.

ەسكە سالا كەتسەك، پرەزيدەنت بۇگىن «شەكارا ماڭى ىنتىماقتاستىعىن دامىتۋدىڭ وزەكتى ماسەلەلەرى» اتتى قازاقستان مەن رەسەي اراسىنداعى XVI ءوڭىرارالىق ىنتىماقتاستىق فورۋمىنا قاتىسۋ ءۇشىن ومبىعا ۇشىپ كەلگەن بولاتىن.

اۆتور: ايان بەكەن ۇلى

سوڭعى جاڭالىقتار