ءاليحان بايمەنوۆ: قاعاز تولتىرۋ، ەسەپ بەرۋ سياقتى جۇمىستار ءالى دە مۇعالىمنىڭ كوپ ۋاقىتىن الادى
ونىڭ ايتۋىنشا، ءبىلىم جۇيەسىندەگى ۇستاز بەن شاكىرت ادامزات وركەنيەتىنىڭ دامۋىندا وتە ماڭىزدى ءرول اتقارادى.
«بۇگىنگى كۇننىڭ ۇستازى جاڭا تەحنولوگيالار زامانىندا وركەنيەتتىك ميسسياسىن اتقارۋى ءۇشىن وعان دەگەن سەنىم بولۋى كەرەك. ونىڭ ابىرويىن كوتەرەتىن قادامدار جاسالۋى ءتيىس. ءبىزدىڭ ءبىلىم بەرۋ جۇيەسىندەگى ۋنيۆەرسيتەتتەر مەن مەكتەپتەر ءوزىن- ءوزى باسقارۋ جۇيەسىنە كوشكەنى ءجون. سوندا تالاپقا ساي جاڭا باعدارلامالار جۇزەگە اسىرىلادى. ءبىلىم مينيسترلىگى ءوز ميسسياسىن وقۋ ورىندارى مەن حالىقتىڭ بىلىمگە دەگەن قاجەتتىلىگىن وتەۋ دەپ بەلگىلەۋى كەرەك. ءبىزدىڭ ءبىلىم بەرۋ جۇيەسى وسى باعىتتا دامىسا، وندا جاڭا تەحنولوگيالاردى دا دۇرىس پايدالانامىز. سەبەبى جاڭا تەحنولوگيالار - قۇرال»، - دەيدى ءاليحان بايمەنوۆ.
ال، تۇپكى ماقسات - بىلىكتى، تاربيەلى، ادامزاتتىڭ ورتاق قۇندىلىقتارىن بويىنا سىڭىرگەن، ەلدى بولاشاققا باستاپ جۇرەتىن مامان تاربيەلەۋ.
«مىنە، وسى تۇرعىدان العاندا قانشاما جاڭا تەحنولوگيانى ەنگىزگەنىمەن، قۇندىلىقتار جانە ورتا قالىپتاستىرۋ ماسەلەسى تۇر. باسقارۋ جۇيەسىن وزگەرتۋ ءبىر كۇندىك شارۋا ەمەس. «باتپانداپ كىرگەن مىسقىلداپ شىعادى» دەگەن ءسوز بار. ءالى دە بولسا مۇعالىم ساباق بەرىپ، ءبىلىم الۋمەن قاتار ءتۇرلى قاعاز تولتىرۋ، ەسەپ بەرۋگە كوپ ۋاقىت بولەدى. بۇل جۇمىستار ونىڭ كوپ ۋاقىتىن، ەنەرگياسىن الادى. وقۋ ورىندارى دا تالاي ەسەپ قۇجاتتارىن تولتىرادى. رەكتوردى، ديرەكتوردى تاعايىندادىڭىز با، وعان سەنىم بولۋى كەرەك. مىسالى، ەلورداداعى مينيسترلىكتەگى ينسپەكتورعا دەگەن سەنىم رەكتورعا ارتىلعان سەنىمنەن جوعارى بولماۋى كەرەك. رەكتور مۇعالىمدەرگە تولىق سەنىپ، ونى جۇمىس ناتيجەسى بويىنشا باعالاۋى ءتيىس»، - دەيدى استانا مەملەكەتتىك قىزمەت حابى (ACSH) باسقارۋشى كوميتەتىنىڭ ءتوراعاسى.
اۆتور: ءلايلىم ءالىم