اقمولادا الاياق ايەل «قارجى پيراميداسىن» قۇرىپ، ءوزى شەتەل اسىپ كەتكەن
بۇل تۋرالى پ د باستىعى، گەنەرال-مايور ارمانبەك بايمۋرزين ازاماتتاردى جەكە قابىلداۋىندا ايتتى، دەپ حابارلايدى قازاقپارات ءتىلشىسى ۆەدومستۆونىڭ باسپا ءسوز قىزمەتىنە سىلتەمە جاساپ.
«وتكەن جىلى كوكشەتاۋ قالاسىندا تۇراتىن ەكى ايەل الاياق قىز قۇرعان «قارجى پيراميداسىنان» جاپا شەككەن. كۇدىكتى WhatsApp مەسسەندجەرى ارقىلى بىرنەشە توپ اشىپ، جوباعا اقشا سالۋ ارقىلى تابىس تابۋعا بولاتىنىن ايتىپ، جۇرتتى تارتقان. الاياقتىڭ سوزىنە سەنىپ قالعان تۇرعىندار ايتقان سوماسىن اۋدارعان. الايدا، «قارجى پيراميداسىن» قۇرۋشى وسى كۇنى رەسەي اۋماعىندا ءجۇر، ال سالىمشىلار وعان سالعان اقشاسىن دا، ۇستەمە تابىسىن دا قايتارىپ العان جوق. الدانعانىن تۇسىنگەن ايەلدەرمەن بىرگە وزگە زارداپ شەگۋشىلەر دە پوليتسياعا ارىز جازىپ، كومەك سۇرادى»، - دەيدى ۆەدومستۆودان.
ارىزدانۋشىلاردىڭ ءسوزىن تىڭداي كەلە ارمانبەك بايمۋرزين «قارجى پيراميداسىن» قۇرعان كۇدىكتىلەردى ۇستاۋ ءۇشىن ارنايى تەرگەۋ توبى قۇرىلعانىن، سونداي-اق، ءىستىڭ بارىسىن جەكە باقىلاۋىنا العانىن اتاپ ءوتتى.
ونىڭ ايتۋىنشا، قازىرگى كەزدە تەرگەۋشىلەر تاراپىنان قولدانىستاعى زاڭناما شەڭبەرىندە كەشەندى تەرگەۋ شارالارى جۇزەگە اسىرىلۋدا. زارداپ شەككەندەر تەرگەۋ شارالارىنىڭ بارىسى تۋرالى ءبىلىپ وتىرا الادى.
«ءوڭىردىڭ كەز كەلگەن تۇرعىنى پوليتسيا دەپارتامەنتىنىڭ باستىعىنا قۇقىق قورعاۋ ورگاندارىنىڭ جۇمىسىنا قاتىستى ءوز ساۋالىن قويىپ، ءتيىستى جاۋابىن الا الادى»، دەپ تولىقتىردى ۆەدومستۆودان.