قازاقستاندا سىبايلاس جەمقورلىقتى باقىلاۋ ايتارلىقتاي جاقساردى — دۇنيەجۇزىلىك بانك
WGI التى ينديكاتوردى قامتيدى: «سىبايلاس جەمقورلىقتى باقىلاۋ»، «ۇكىمەتتىڭ تيىمدىلىگى»، «زاڭنىڭ ۇستەمدىگى»، «رەتتەۋشى ورتانىڭ ساپاسى»، «ساياسي تۇراقتىلىق»، «مەملەكەتتىڭ ەسەپ بەرۋى».
كورسەتىلگەن بارلىق باعىتتاردى جيناقتايتىن جيىنتىق يندەكس نەمەسە ءبىرىڭعاي رەيتينگ جوق - ءاربىر ينديكاتور جەكە باعالانادى.
WGI دەرەكتەردى كورسەتۋ تاسىلدەرىنىڭ ءبىرى - پايىزدىق رانگ شكالاسى. ول ەڭ تومەن كورسەتكىشتەرى بار ەلدەردىڭ پايىزىن انىقتاۋ ارقىلى قالعاندارىنىڭ اراسىندا جەكە مەملەكەتتىڭ جاعدايىن كورسەتەدى.
2018-جىلدىڭ قورىتىندىسى بويىنشا قازاقستان «سىبايلاس جەمقورلىقتى باقىلاۋ» ينديكاتورى (س ج ب ي) بويىنشا ايتارلىقتاي ىلگەرىلەۋگە قول جەتكىزدى.
مالىمەتتەر 13 دەرەككوزدىڭ نەگىزىندە ەسەپتەلدى، ولاردىڭ ىشىندە Bertelsmann Stiftung, Freedom House, Economist Intelligence Unit, PRS Group, World Justice Project, IHS Markit, IMD، World Economic Forum, V- Dem جانە Transparency International (الەمدىك سىبايلاس جەمقورلىق بارومەترى) سياقتى كومپانيالاردىڭ زەرتتەۋ ناتيجەلەرى بار.
زەرتتەۋلەرى «سىبايلاس جەمقورلىقتى باقىلاۋ» ينديكاتورىن قۇرايتىن كوپتەگەن ۇيىمداردىڭ قازاقستاننىڭ سوڭعى جىلداعى سىبايلاس جەمقورلىققا قارسى كۇرەستەگى كۇش-جىگەرىن وڭ باعالاعانىن ايتا كەتكەن ءجون.
مىسالى، PRS Group جەلىسى بويىنشا سوڭعى جىلدا قازاقستاندا سىبايلاس جەمقورلىققا قارسى ءىس-قيمىل بويىنشا كورسەتكىش 2 ەسەگە ءوستى، ال IMD جاھاندىق باسەكەگە قابىلەتتىلىك رەيتينگىسىندە وسىنداي ينديكاتور بويىنشا قازاقستان ءۇشىن رەكوردتىق كورسەتكىش بولىپ تابىلاتىن 29-ورىنعا يە بولدى، ول وتكەن جىلمەن سالىستىرعاندا 10 پوزيتسياعا كوتەرىلدى.
1996-جىلى WGI- ءدىڭ وسى ينديكاتورىن ولشەۋ باستالعان ساتتەن باستاپ قازاقستاننىڭ سوڭعى جىلى عانا ايتارلىقتاي جوعارى كورسەتكىشكە قول جەتكىزگەنىن اتاپ وتكەن ءجون. «سىبايلاس جەمقورلىقتى باقىلاۋ» ينديكاتورىنىڭ پايىزدىق رانگى 36,06 پايىزدى قۇرادى، ياعني الەمنىڭ وسىنشا مەملەكەتتەرىنىڭ سىبايلاس جەمقورلىقتى باقىلاۋ دەڭگەيى قازاقستانعا قاراعاندا ناشار. ءبىر جىل بۇرىن كورسەتكىش ايتارلىقتاي تومەن بولدى -19,71 پايىز.
بۇل قازاقستاننىڭ وسىعان دەيىنگى بۇل رەيتينگكە ەنگەن ەڭ جاقسى ناتيجەسى بولعانىن اتاپ وتكەن ءجون.
پوستكەڭەستىك كەڭىستىك ەلدەرىنىڭ اراسىندا قازاقستان رەسەي (21,15 پايىز)، ۋكراينا (18,27 پايىز)، ازەربايجان (21,63 پايىز)، مولدوۆا (25,96 پايىز) قىرعىزستان (16,35 پايىز)، وزبەكستان (12,50 پايىز) جانە تۇرىكمەنستانعا (8,17 پايىز) قاراعاندا ايتارلىقتاي جوعارىدا تۇر.