شارىن ۇلتتىق پاركىندە قىزىل كىتاپقا ەنگەن سىلەۋسىن كوزگە ءتۇستى

نۇر-سۇلتان. قازاقپارات - شارىن مەملەكەتتىك ۇلتتىق تابيعي پاركىنىڭ ماماندارى جابايى اڭداردى تىركەۋ بارىسىندا ۇلكەن بۇعۇتتى تاۋىنىڭ ماڭىنداعى فوتوتۇزاققا تۇركىستان سىلەۋسىنى ءتۇسىپ قالعان، دەپ حابارلايدى قازاقپارات ءتىلشىسى.

ۆيدەونى ق ر ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ باسپا ءسوز حاتشىسى ساكەن دىلداحمەت Facebook پاراقشاسىندا جاريالادى.

«مىسىق تۇقىمداستاردىڭ بۇل ءتۇرى قازاقستاننىڭ قىزىل كىتابىنا ەنگەن. قازاقستان فاۋناسىندا كەزدەسەتىن سىلەۋسىننىڭ ءۇش ءتۇرىنىڭ بىرىنە جاتادى. ⅩⅨعاسىردىڭ سوڭىندا جەتىسۋ ولكەسىندە سىلەۋسىندەر كوپ بولعان. ول كەزدەرى جىلىنا 200 سىلەۋسىن اۋلاناتىن. وتكەن عاسىردىڭ 40-50-جىلدارى جىلىنا 20-30 سىلەۋسىن تەرىسى دايىندالىپ كەلگەن. 1976-جىلى ونى اۋلاۋعا تىيىم سالىندى»، - دەيدى ساكەن دىلداحمەت.

تۇركىستان سىلەۋسىنى قارى قالىڭ جەردە تىرشىلىك ەتەدى. ازىق ىزدەپ، ءبىرشاما جەرگە اۋىپ كەتۋى مۇمكىن. تۇندە بەلسەندى. كەيدە جالعىز دا جۇرە بەرەدى.

«ءبىر تۋعاندا ەكى-ۇشتەن تۋادى. نەگىزگى ازىعى - قويان، سۋىر، ەلىك، قابان، تاۋەشكى. ءۇي جانۋارلارىن دا اۋلاي بەرەدى»، - دەپ جازادى ول.