ايۋپ پايعامبار قيسساسى
ونى ەستىگەن ءىبىلىستىڭ جىنى كەلەدى. ول ايۋپتىڭ سابىرىن تۇگەسپەك بولادى. ونى جوقتىقپەن، بايلىقپەن، مانساپپەن ازعىرادى. شايتاننىڭ بۇل ايلاسى ايۋپقا اسەر ەتپەپتى. ءتىپتى ايەلىن ارباپ، وتباسى مەن دوستارىنىڭ اراسىنا دا وت سالادى. ايۋپ سوندا دا سىر بەرمەپتى. ءىبىلىس كۇنىنە مىڭ ءتۇرلى بالە شاقىرسا دا، ايۋپ تاعات جاساپ، وتىرا بەرەدى. ءىبىلىس وعان:
- ايۋپ، بالاڭ ءولدى! - دەيدى.
- قۇداي ءوزى بەردى، ءوزى الدى. ەشكىم ماڭگى ءتىرى جۇرمەيدى. وزەكتى جانعا ءبىر ءولىم، - دەيدى.
- مالىڭدى جۇت الدى.
- «مال ءبىر جۇتتىق» دەگەن. اللا بەرگەنىن السا دا، ەندى بەرەرىن الماسىن.
- ەندى نە ءىشىپ- جەيسىڭ؟
- اشتان ولگەننىڭ مولاسى جوق. مالعا تالاسىپ ولگەننىڭ مولاسى كوپ.
- ەل- جۇرت سەن تۋرالى وسەك ايتىپ جاتىر.
- جاقسىعا ءسوز ەرەدى.
- پاتشا سەنى ولتىرەمىن دەدى. قاش.
- اجال - اقىماق ءۇشىن التاۋ، اقىلدى ءۇشىن بىرەۋ.
- بۇيتە بەرسەڭ، جالعىز قالاسىڭ.
- قابىردە بارلىق ادام جالعىز جاتادى، - دەيدى.
ءتوزىمى تاۋسىلعان ءىبىلىس ونىڭ بەتىنەن شاپالاقپەن تارتىپ جىبەرەدى. سايتاننىڭ قولى تيگەن جەرگە جارا شىعىپتى. وعان شىبىن ۇيمەلەپ، قۇرتتار قاپتايدى. جارا جايىلىپ، بۇكىل دەنەسىن ءىرىڭ باسادى. ەل-جۇرتى «ايۋپ الاپەس بولدى» دەپ شوشيدى. ءىبىلىس ولارعا:
- الاپەس - جۇقپالى اۋرۋ. ونى جىراققا شىعارىپ تاستاڭدار، - دەپ اقىل ايتادى. شاھار جۇرتى ءبىراۋىزدان كەلىسىپ، ونى ەلدەن قۋادى. جان جارى راحيما عانا وعان ادال بولىپ، قاسىندا قالادى. اۋرۋى ونان سايىن مەڭدەپ، قۇرتتار ايۋپتىڭ ەتىن جەپ تاۋىسۋعا اينالادى. ءبىراق ونىڭ جۇرەگى مەن ءتىلى ءبىر ءسات توقتاماستان اللاعا ماقتاۋ ايتىپ، جاراتۋشىنى ۇلىقتاپ جاتا بەرىپتى. دەنەسىنەن تۇسكەن قۇرت بولسا، ونى جەردەن الىپ:
- اللا ساعان مەنىڭ ەتىمدى ريزىق ەتىپتى. نەسىبەڭنەن ايرىلما، - دەپ قۇرتتى جاراسىنا قايتا سالادى ەكەن. ايۋپتىڭ سابىرلىلىعىن كورىپ، سايتاندار تۇڭىلەدى. ولار ىبىلىسكە كەلىپ:
- ءبىز ايۋپتى جەڭە المادىق. سىرى نەدە؟ - دەپ سۇرايدى. ءىبىلىس:
- ونىڭ ءتىلى مەن جۇرەگى اللانى ەسكە الىپ، رۋحى نۇرلانىپ تۇر. ءبىر قۇرتتى تىلىنە، ءبىر قۇرتتى جۇرەگىنە سال. اللانىڭ ەسىمىنەن قۋات الۋ توقتاعاندا، سابىرى سىنادى، - دەپ اقىل بەرەدى.
سايتاندار سولاي ىستەيدى. ءبىر قۇرتتى تىلىنە، ءبىر قۇرتتى جۇرەگىنە سالادى. سول كەزدە عانا ايۋپ اللاعا ارىز قىلادى:
- ۋا، ۇلىق اللا! ساعان زىكىر ايتىپ، ەسىمدەرىڭنەن قۋات الاتىن ەدىم. مىنا ەكى قۇرت تۇبىمە جەتەدى. ۋا، اللا، پارمەن وزىڭنەن بولسىن، - دەيدى. سوندا اللا:
- ءاي، ايۋپ، سىناق ساعاتى ءبىتتى. وكشەڭمەن جەردى تەپ، - دەيدى.
ايۋپ جەردى تەپكەندە، جەر جارىلىپ، سۋ شىعىپتى. سۋ سارقىراپ، ارىققا اينالىپتى. اللا:
- سۋعا شومىل، - دەپ ءامىر بەرەدى. ايۋپ قىرىق كۇن سۋعا شومىلعاندا، جاراسى جازىلىپ، ءتانى شيرايدى. قۇرتتار تەگىس قىرىلىپ، ەكى قۇرت عانا ءتىرى قالادى. ايۋپ:
- ۋا، اللا، مىنا ەكەۋى ولمەدى عوي، - دەيدى. اللا:
- ءتىل مەن جۇرەككە تۇسكەن قۇرتتار عوي. ولارعا مەنىڭ كوركەم ەسىمدەرىمنىڭ شاراپاتى جۇقتى. ولاردىڭ مارتەبەسى - ءبىر بولەك. زىكىردىڭ شاراپاتىنان ولاردى ساعان جاردەمشى ەتەمىن. ءبىرى بال اراسىنا اينالادى. ەكىنشىسى سۇلىك بولىپ سۋدا قالسىن. بال اراسىنىڭ ۋى دا، بالى دا شيپا. سۇلىك اۋرۋدىڭ ارام قانىن سورادى، - دەيدى.
سول مەزەتتە قۇرتتاردىڭ ءبىرى سۇلىككە، ءبىرى بال اراسىنا اينالادى. بال اراسى پەيىشتىڭ بۇلاعىنان شىققاندىقتان، قاسيەتتى جاندىكتەردىڭ بىرىنە اينالعان ەكەن. قۇران كارىمنىڭ ءبىر (ناحل) سۇرەسى بال اراسىنىڭ اتىمەن اتالادى. «سابىر ءتۇبى سارى التىن» دەگەن وسىدان قالىپتى دەسەدى.
«الديدەن ەپوسقا دەيىن» كىتابىنان