سانانى سەرگەلدەڭگە سالاتىن سەزىمدەر

نۇر-سۇلتان. قازاقپارات - قانشا جەردەن باقىتتى بولساق تا، جۇرەگىمىزدىڭ تۇبىندە ءبىر كۇدىك تۇرادى.

ول كۇدىك كوپ ۇزاماي ۇلكەن قورقىنىشقا اينالۋى مۇمكىن. ساناداعى سانسىز سەزىمدەر كەيدە ءوزىڭدى سەرگەلدەڭگە دە سالىپ جاتادى. سەرگەلدەڭگە سالماس ءۇشىن ولاردان ارىلۋ كەرەك.

قورقىنىش قاماۋدا قالدىرادى، ءۇمىت بوستاندىققا شىعارادى. قانداي دا ءبىر قورقىنىشقا بوي الدىرماۋدىڭ الدىن الۋ كەرەك.

نەگىزىندە ءبىز قورقاتىن دۇنيەلەردىڭ كوپ بولىگى جۇزەگە اسپايدى. ءتىپتى جۇزەگە اسىپ جاتقان جاعدايدا ونىمەن كۇرەسۋگە قاۋقارىمىز جەتەدى. سوندىقتان دا ءسىز بەن ءبىزدىڭ قورقىنىشىمىز نەگىزسىز. قورقىنىشتىڭ باستى سەبەبى بىرەۋ عانا: جالعان دالەلدەر شىنايى بولىپ كورىنەدى. وسى ورايدا سانانى سەرگەلدەڭگە سالاتىن كەيبىر سەزىمدەر جايلى ايتا كەتكەندى ءجون ساناپ وتىرمىز.

ءمىنسىز كورىنۋ سەزىمى

ومىردە ءمىنسىز كورىنۋ مۇمكىن ەمەس. ءمىنسىز بولۋ دا وڭاي ەمەس. تەك جەتىستىككە جەتەر جولداعى توككەن تەر مەن قۇلشىنىس قانا سەنى تورگە شىعارا الادى.

جالعىزدىق سەزىمى

ءوزىڭدى دۇنيەدە جالعىز سەزىنۋ - جالقاۋلىقتىڭ بەلگىسى. جالعىز كەتىپ، ەشتەڭە جاساعىڭ كەلمەيدى. الايدا سەن جالعاندا جالعىز ەمەسسىڭ. سەنىڭ جاناشىرلارىڭ كوپ. جالعىزدىق - ۋاقىتشا سەزىم عانا. مۇنداي سەزىمدى باستان كەشكەن جاعدايدا تەزىرەك ارىلۋعا ۇمتىل.

ءوزىڭدى وزگەلەرگە قارىز سەزىنۋ

سەن ەشكىمگە باعىنىشتى، نەمەسە تاۋەلدى ەمەسسىڭ. ءوز ەركىندىگىڭدى تۇمشالاما. ەشكىمگە قارىز دا ەمەسسىڭ. باستىسى - قۋانىشقا باستار جولدى تابا ءبىل.

كۇتۋ سەزىمى

كۇتە- كۇتە كۇنىڭدى وتكىزبە. ء«ۇمىتسىز - شايتان» دەگەنمەن دە، ىسكە كىرىسپەسەڭ جالعان ۇمىتتەن نە پايدا؟! جاڭا جوسپار قۇرىپ، جاڭا ماقساتتارعا ۇمتىل.

تورىعۋ سەزىمى

كەيدە جانىمىز قۇلازىپ، تورىعاتىنىمىز راس. مۇنداي cەزىمدى باستان كەشىرمەۋدىڭ ءبىر جولى - كۇندەگى جوسپارىڭىزدى بىركەلكى قۇرماي، وزگەرتىپ تۇرىڭىز. بوس ۋاقىتىڭىزدا سەرۋەندەڭىز، جاقىن ادامدارىڭىزدىڭ ۇيىنە قوناققا بارىڭىز.

قورقىنىش سەزىمى

قورقاقتىق تانىتا بەرۋگە بولمايدى. ءىستى باستاۋدا تاۋەكەلگە ءجيى بارىڭىز. قول قۋسىرىپ وتىرعاننان تۇك شىقپايدى. قورقاقتىق - جالقاۋلىقتىڭ ءبىر ءتۇرى.

قابىلەتسىزدىك سەزىمى

ادامنىڭ قولىنان كوپ دۇنيە كەلەدى. «مىنانى مەن جاساي المايمىن» - دەپ ءوزىڭدى وزگەدەن ەشقاشان تومەن ساناما. «قابىلەتىم جەتپەيدى» - دەپ قول قۋسىرما. ونى جاساۋ سەنىڭ دە قولىڭنان كەلەدى. تەك تاجىريبە مەن ءبىلىمىڭدى ارتتىرساڭ بولعانى.

جاۋاپتى بولۋ سەزىمى

ءبىر دۇنيەگە سەن ءوزىڭدى جاۋاپتى سەزىنبەۋىڭ كەرەك. جاۋاپتى بولۋدى تەك ناقتى دەرەكتەر مەن تاپسىرمالارا ارقىلى عانا سەزىن. وزگە جاۋاپتى بولۋ سەزىمىنەن اۋلاق بول.

رەنىش سەزىمى

ەشكىمگە ەشقاشان رەنجي كورمە. رەنجىگەن كۇننىڭ وزىندە بىلدىرتۋگە تىرىسپا. سەبەبى وزگەلەر سەنىڭ تەز رەنجييتىنىڭدى ءبىلىپ السا، قايتا- قايتا رەنجىتۋگە قۇمار بولادى. بۇل - سەنىڭ ەڭ وسال تۇسىڭ بولۋى دا مۇمكىن.

ۇيالۋ سەزىمى

«ۇيالماعان بۇيىرماعاندى الادى» - دەگەن. كوپ تۇستا ۇيالىپ، بولماسا قىسىلىپ، ءوزىڭدى تەجەپ قالما. قاتەلىگى ءۇشىن وزگەلەردى ۇيالتپا.

عاشىقتىق سەزىم

ماحابباتتى ءبىر ءسات ەستەن شىعارا تۇرۋدى ۇيرەن. ول سەن ءۇشىن دۇنيەدەگى ەڭ ماڭىزدى سەزىم بولۋى بەك مۇمكىن. الايدا عاشىقتىق سەزىمنەن دە بيىك تۇراتىن دۇنيەلەر بولۋى دا عاجاپ ەمەس. سۇيگەنىم قارامادى، نەمەسە تاستاپ كەتتى دەپ كوپ تورىعۋدىڭ قاجەتى جوق.

تاڭداۋ جاساي الماۋ سەزىمى

كەيدە ويىمىز سان ساققا كەتىپ، تاڭداۋ جاساي الماي جاتامىز. ناتيجەسىندە وزگەنىڭ اقىلى مەن كومەگىنە جۇگىنەمىز. ارينە، وزگەلەردىڭ ايتقانىن دا تىڭداۋعا بولادى. دەسە دە ءوزىڭ تاڭداۋ جاساۋ مەن شەشىم شىعارۋعا ۇيرەنگەنىڭ دۇرىس. وزگەلەردىڭ كوپ تىڭدايتىن بولساڭ، جەكە تۇلعا رەتىندە تاڭداۋ جاساۋدان قالاسىڭ. بولماسا جالعىز قالعاندا شەشىم شىعارا الماي سەندەلەسىڭ.