اسحات ايماعامبەتوۆ الماتىلىق وقۋشىنىڭ حاتىنا جاۋاپ بەردى
«نۇرباقىت، سەنىڭ پرەزيدەنت قاسىم- جومارت توقايەۆقا جازعان حاتىڭدى وقىدىم. مەملەكەت باسشىسى حالىق ۇنىنە قۇلاق اساتىن مەملەكەت تۇجىرىمداماسىن ۇسىندى جانە بىزگە - مەملەكەتتىك قىزمەتشىلەرگە وزەكتى سۇراقتارعا دەر كەزىندە جاۋاپ بەرۋدى تاپسىردى. سەنىڭ پىكىرىڭدى باعالايمىن، ءبىراق مەنىڭ موينىما ەلىمىزدىڭ بارلىق وقۋشىلارى ءۇشىن جاۋاپكەرشىلىك ارتىلعان. ءبىلىم مينيسترلىگىنىڭ جۇمىسى سەنىڭ جانە دوستارىڭنىڭ ءبىلىمدى ازامات بولىپ وسۋىنە، قازاقستاننىڭ دامۋىنا ۇلەس قوسۋعا باعىتتالعان»، - دەپ جازدى مينيستر Facebook جەلىسىندەگى رەسمي پاراقشاسىنا.
مينيستر مەكتەپ باعدارلاماسىنداعى بارلىق ءپاننىڭ ماڭىزدى ەكەنىن اتاپ ءوتتى.
«ءبىر ءپاندى وقۋ ءۇشىن ەكىنشى ءپاندى ءبىلۋ قاجەت. «جاراتىلىس تانۋ» - وتە قىزىقتى ءپان، ول سەنى قورشاعان ورتامەن تانىستىرادى. ال «ولكە تانۋ» ءوزىڭ تۋىپ- وسكەن ايماقتىڭ تاريحىن باياندايدى. ءسال تىرىسساڭ، وقۋ جىلىنىڭ سوڭىنا دەيىن وسى پاندەردەن جاقسى ناتيجە كورسەتەرىڭە سەنىمدىمىن. كانيكۋلعا كەلسەك، سەن وقيتىن مەكتەپ باعدارلاماسى كانيكۋل كۇندەرى جەتكىلىكتى بولاتىنداي، كەلەسى توقسانعا دەيىن دەمالا الاتىنداي ەتىپ قۇرىلعان»، - دەدى ا. ايماعامبەتوۆ.
سونىمەن بىرگە، وقۋشىلار باراتىن سپورتتىق ۇيىرمەلەر مەن ورتالىقتاردىڭ سانى ارتادى.
«سەنىڭ سپورتقا دەگەن تالپىنىسىڭدى قولدايمىن. قازىر سەنىڭ قالاڭدا سپورتتىق ۇيىرمەلەر جۇمىس ىستەيدى، ءبىز ولاردىڭ سانىن كوبەيتىپ جاتىرمىز. ودان بولەك، الماتىدا وقۋشىلار سارايى، وقۋشىلار ءۇيى بار، مۇنداي سارايلاردى دا كوپتەپ تۇرعىزامىز. سەن سەكىلدى بالالار سپورتقا قىزىعۋشىلىعىن جوعالتپاۋى ءۇشىن، سپورتتىق، شىعارماشىلىق، كوركەم ۇيىرمەلەرمەن قامتىلۋى ءۇشىن ولاردىڭ جۇمىسىن جەتىلدىرەمىز. نۇرباقىت، بالكىم سەن چەمپيون نەمەسە تانىمال عالىم بولارسىڭ. ءبىراق، ەڭ باستىسى - جاقسى ادام جانە ەلىمىزدىڭ لايىقتى ازاماتى بولىپ ەر جەتۋىڭە تىلەكتەسپىن»، - دەپ لەبىز ءبىلدىردى مينيستر.
ايتا كەتەيىك، الماتى قالاسى №138 گيمنازيانىڭ 4-سىنىپ وقۋشىسى نۇرباقىت عالىمجان پرەزيدەنتكە حات جازعان بولاتىن. وندا نۇرباقىت كانيكۋلدىڭ ازدىعىن جانە كەيبىر پاندەردىڭ قىزىق ەمەستىگىن سىناعان.
اۆتور: ايجان سەرىكجان قىزى