قازاقستاندا بىلىكتىلىك سەرتيفيكاتى ديپلومنان جوعارى بولۋى كەرەك - مينيستر

None
None
نۇر- سۇلتان. قازاقپارات - مەملەكەتىمىزدە ەكونوميكا سۇرانىسىنا ساي ماماندار دايىنداۋ كەرەك دەسەك - ەلىمىزدە ۇلتتىق بىلىكتىلىك جۇيەسىن قالىپتاستىرۋىمىز قاجەت. بۇل تۋرالى كاسىپتىك ستاندارتتاردى ازىرلەۋ جونىندەگى باسقارۋشى كوميتەتتىڭ وتىرىسىندا ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.

«ۇلتتىق بىلىكتىلىك جۇيەسى ءۇش بولىمنەن تۇرادى. ءبىرىنشى، جۇمىس بەرۋشىنىڭ جۇمىسقا الاتىن ادامنىڭ بىلىمىنە، داعدىسىنا قوياتىن تالابى. سول تالاپتى «كاسىپتىك ستاندارت» دەپ اتايمىز. ەكىنشى، كاسىپتىك ستاندارتتى ازىرلەگەننەن كەيىن وعان ءبىزدىڭ ءبىلىم بەرۋ ستاندارتتارى مەن باعدارلامالارى بەيىمدەلۋى كەرەك. سوندا ءبىلىم بەرۋ وشاقتارى بيزنەستىڭ، ەكونوميكانىڭ سۇرانىسىنا ساي ماماندار دايىندايدى. سوندا عانا ەلىمىزدە سۇرانىسقا ساي، ءبىلىمدى، بىلىكتى ماماندار دايىندالادى. ۇلتتىق بىلىكتىلىك جۇيەسىنىڭ ءۇشىنشى بولىگى - العان ءبىلىمدى تاۋەلسىز باعالاۋ، ياعني سەرتيفيكاتتاۋ»، - دەيدى ءبىرجان نۇرىمبەتوۆ.

ونىڭ ايتۋىنشا، ديپلوم - ءبىلىمدى راستايتىن قۇجات، ءبىراق دامىعان مەملەكەتتەردە ماماننىڭ ديپلومىنا قارامايدى.

«دامىعان ەلدەردە ماماننىڭ ديپلومىنا قارامايدى. ولار بىلىكتىلىكتى راستايتىن تاۋەلسىز ورتالىقتارعا جىبەرەدى. ول ورتالىق بىلىكتىلىگىن راستايتىن سەرتيفيكات بەرەدى. سەرتيفيكاتتىڭ قۇنى ديپلومنان جوعارى. ءبىز وسىنداي جۇيەنى قالىپتاستىرۋ ۇستىندەمىز»، - دەيدى مينيستر.

سونداي- اق، جيىندا دۇنيەجۇزىلىك بانكتىڭ زەرتتەۋى بويىنشا، ەكونوميكامىزدى تولىق قامتۋ ءۇشىن 550 كاسىپتىك ستاندارت قاجەت ەكەندىگى ايتىلدى.

«بىلتىر وسى جوبا ارقىلى 70 كاسىپتىك ستاندارت ازىرلەندى. بيىل جىل سوڭىنا دەيىن 480 ستاندارتتى ازىرلەۋىمىز كەرەك. ءبىز ەكونوميستەر مەن زاڭگەرلەردى عانا دايىنداپ جاتىرمىز. بۇل - ۇلكەن پروبلەما، سەبەبى ەڭبەك نارىعىنىڭ سۇرانىسى باسقاشا. زەرتتەۋ جۇمىستارىنىڭ ناتيجەسىندە ەڭبەك نارىعىنىڭ % 75 سۇرانىسى جوعارى ءبىلىمدى ماماندارعا ەمەس، ورتا ارنايى كاسىبي ءبىلىم ماماندارىنا ەكەنى انىقتالعان»، - دەيدى ول.

ونىڭ ايتۋىنشا، ءار ادام بالاسى جوعارى ءبىلىم العانىن، ەكونوميست، زاڭگەر بولعانىن قالايدى، ءبىراق ەڭبەك نارىعىندا سۇرانىس باسقاشا.

«ءبىزدىڭ ماقسات - ماماندىقتاردى سول سۇرانىسقا سايكەس كەلتىرۋ. ءار سالانىڭ ەرەكشەلىگى ءارتۇرلى، ءبىراق تالابى ءبىر: «سول سالاداعى ماماندار قانداي بولۋ كەرەك؟ » دەگەن تالاپتاردى كاسىپتىك ستاندارتتارعا ەنگىزۋ. كاسىبي ستاندارتتى مەملەكەتتىك ورگاندار عانا ەمەس، دۇنيەجۇزىلىك بانكپەن بىرلەسە ىستەيتىن جوبا اياسىندا جەكە مەنشىك كومپانيالار دا جاسايدى»، - دەيدى مينيستر.

اۆتور: زارينا قاھارمان

سوڭعى جاڭالىقتار