ۇكىمەت «اۋىل - ەل بەسىگى» باعدارلاماسىن ىسكە اسىرۋدىڭ جاڭا تەتىكتەرىن ماقۇلدادى

نۇر-سۇلتان. قازاقپارات - بۇگىن ۇكىمەت وتىرىسىندا «اۋىل - ەل بەسىگى» باعدارلاماسىن ىسكە اسىرۋدىڭ جاڭا تەتىكتەرى ماقۇلداندى، دەپ حابارلايدى قازاقپارات ءتىلشىسى.

«ەلباسى نۇرسۇلتان نازاربايەۆتىڭ «Nur Otan» پارتياسىنىڭ 18-سەزىندە بەرگەن تاپسىرماسىنا سايكەس «اۋىل - ەل بەسىگى» جوباسىن ىسكە اسىرۋ باستالدى. بۇل جوبانى ءتيىمدى ىسكە اسىرۋ وڭىرلىك باعدارلامالارعا جاقسى نەگىز بولادى. پرەزيدەنت قاسىم-جومارت توقايەۆ 15- قازاندا وتكەن جينالىستا وسى ماسەلە بويىنشا ناقتى جۇمىس ۇيىمداستىرۋ كەرەكتىگىن اتاپ ءوتتى. ونىڭ نەگىزگى ماقساتى - اۋىل تۇرعىندارىنىڭ ءومىر ساپاسىن جاقسارتۋ، اۋىلدىق ەلدى مەكەندەردىڭ ينفراقۇرىلىمىن جاڭعىرتۋ، ولاردى وڭىرلىك ستاندارتتار جۇيەسىندە پارامەترلەرگە جەتكىزۋ»، - دەدى تالقىلانعان ماسەلە جايىندا قورىتىندى ءسوز سويلەگەن ق ر پرەمەر-ءمينيسترى اسقار مامين.

ونىڭ ايتۋىنشا، جاڭا ادىستەمە بويىنشا 3477 پەرسپەكتيۆالى اۋىل ىرىكتەلىنىپ الىندى. ولاردا 6,6 ميلليون ادام، ياعني، اۋىل تۇرعىندارىنىڭ 85 پايىزى تۇرادى. بۇعان قوسا 2020-2026-جىلدارى جوبانى قارجىلاندىرۋ كولەمى ۇلعايتۋ ماسەلەسى پىسىقتالدى. بارلىعى 900 ميلليارد تەڭگەنى قۇراپ وتىر. جوبانى ىسكە اسىرۋ اياسىندا 7 جىلدىڭ ىشىندە اۋىل ينفراقۇرىلىمىن جاقسارتۋ، 7 مىڭ شاقىرىمنان استام اۋىلدىق جولداردى، ينجەنەرلىك جەلىلەردى سالۋ جانە جوندەۋ، ساپالى اۋىز سۋمەن قامتاماسىز ەتۋ، ءبىلىم بەرۋ، دەنساۋلىق ساقتاۋ، مادەنيەت جانە سپورت نىساندارىن سالۋ، سونىمەن قاتار 130 مىڭ جاڭا جۇمىس ورىندارىن قۇرۋ ارقىلى شامامەن 7 ميلليون اۋىل تۇرعىنىنىڭ تۇرمىس ساپاسىن جاقسارتۋ كۇتىلەدى.

«2019-2020-جىلدارى شامامەن 300 دەن استام دامۋ الەۋەتى جوعارى اۋىلداردى تولىق جاڭعىرتۋ جوسپارلانعان. بۇل اۋىلدىق اۋماقتار جالپى ەلدىڭ دامۋىنا كۇشتى سەرپىن بەرەدى. جوبانىڭ باستاپقى قارقىنى جاقسى. ونى ىسكە اسىرۋدى بەلسەندى جالعاستىرۋ قاجەت. جالپى جوبانى ىسكە اسىرۋدىڭ اتالعان تاسىلدەرىن ماقۇلداۋدى ۇسىنامىن»، - دەدى ۇكىمەت باسشىسى.