پەتروپاۆلدا قايىر سۇراعان بالالاردى انىقتاۋ ماقساتىندا رەيد ءوتىپ جاتىر

پەتروپاۆل. قازاقپارات - پەتروپاۆلدا يۋۆەنالدىق پوليتسەيلەر جاسوسپىرىمدەر اراسىندا قايىر سۇراۋ فاكتىلەرىن انىقتاۋ ماقساتىندا رەيد وتكىزدى، دەپ حابارلايدى قازاقپارات ءتىلشىسى.

سولتۇستىك قازاقستان وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، رەيدكە پوليتسەيلەردەن بولەك بارلىق مۇددەلى ۆەدومستۆولاردىڭ وكىلدەرى: قالالىق اكىمدىكتىڭ كامەلەتكە تولماعاندار ىستەرى جونىندەگى كوميسسياسىنىڭ وكىلى، پروكۋراتۋرا قىزمەتكەرلەرى، جۇمىسپەن قامتۋ جانە الەۋمەتتىك باعدارلاما، ءبىلىم بولىمدەرىنىڭ ماماندارى قاتىستى.

يۋۆەنالدىق پوليتسيا بولىمشەسىنىڭ باستىعى ەلميرا ابۋشەۆانىڭ سوزىنشە، كامەلەتكە تولماعاندار ءىسى جونىندەگى ينسپەكتورلاردىڭ مىندەتى - قايىر سۇراۋعا يتەرمەلەگەن سەبەپ پەن سالداردى انىقتاپ، ولاردى جويۋعا كومەكتەسۋ.

رەيدكە شىققان توپ حالىق كوپ شوعىرلانعان «تايگا»، «پيراميدا»، «راحمەت» ساۋدا ۇيلەرىنىڭ، «التىن ارمان» جانە «كوتەرمە ساۋدا ورتالىعى» بازارلارىنىڭ ماڭىن، سونداي-اق ۆوكزال ماڭى الاڭى مەن مەشىت ماڭىن تەكسەردى. ناتيجەسىندە ساداقا جينايتىن جاشىگىمەن جۇرگەن ءتورت ءجاسوسپىرىم انىقتالدى.

پوليتسەيلەر بالالاردىڭ اتا-اناسىمەن حابارلاسىپ، الەۋمەتتىك پەداگوگتاردىڭ جانە پروكۋراتۋرا قىزمەتكەرىنىڭ قاتىسۋىمەن ولاردان جاۋاپ الىندى. جاسوسپىرىمدەر اۋىر ناۋقاستى بالالاردىڭ ەمىنە اقشا جيناۋمەن اينالىساتىن قايىرىمدىلىق قورىنىڭ ازاماتتىق بەلسەندىلەرى ەكەن. بارلىق قۇجاتتارى مەن ءتيىستى كەلىسىمشارتى قولدارىندا بار.

جىل باسىنان بەرى قالانىڭ يۋۆەنالدىق پوليتسيا قىزمەتكەرلەرى 120 دان استام رەيدتىك ءىس- شارا وتكىزدى. ناتيجەسىندە ىشكى ىستەر ورگاندارىنا 743 كامەلەتكە تولماعان جاس ءوسپىرىم جەتكىزىلدى. الداعى ۋاقىتتا دا كامەلەتكە تولماعاندار ءىسى جونىندەگى ينسپەكتورلاردىڭ پروفيلاكتيكالىق رەيدتەرى جالعاسادى.

اۆتور: اقەركە داۋرەنبەك قىزى