الماتى وبلىسىندا ەكى رەت سوتتالعان ايەل سۇيىكتىسىن اتىپ ءولتىردى

تالدىقورعان. قازاقپارات - الماتى وبلىسىندا ەكى رەت ءىستى بولعان ايەل ادام ءولتىردى دەگەن كۇدىكپەن تاعى ۇستالدى.

46 جاستاعى ازاماتشا ءوزىنىڭ كوڭىلدەسىن اتىپ ءولتىردى دەگەن ايىپپەن تەرگەلىپ جاتىر، دەپ حابارلايدى قازاقپارات ءتىلشىسى.

پوليتسيا قىزمەتىنىڭ مالىمەتىنشە، 5- قاراشاعا قاراعان ءتۇنى قاراتال اۋدانىنداعى شارۋا قوجالىقتاردىڭ بىرىنەن 38 جاستاعى ەر ادامنىڭ مۇردەسى تابىلدى. مارقۇم ۇشتوبە قالاسىنىڭ تۇرعىنى ەكەنى انىقتالدى. ول قوجالىقتا ءارتۇرلى جۇمىس ىستەگەن. ادام ولىمىنە بايلانىستى قىلمىستىق ءىس قوزعاعان ءتارتىپ ساقشىلارى كۇدىكتى رەتىندە ايەل ادامدى ۇستادى.

«قوجالىقتا ايەل ادامنىڭ جۇمىس ىستەگەنى بەلگىلى بولدى. ول مارقۇم بولعان ەر اداممەن ءۇش جىلدان بەرى بىرگە تۇرىپ كەلگەن. وقيعا ورنىنان قاشىپ كەتكەن ازاماتشا ۇشتوبە قالاسىندا ۇستالدى. 1973-جىلعى كۇدىكتى بۇعان دەيىن دە ادام ءولتىرىپ، ەسىرتكى ساقتاعانى ءۇشىن سوتتالعان. قازىر ول قاماۋعا الىندى»، - دەدى قاراتال اۋداندىق پوليتسيا ءبولىمىنىڭ باسشىسى راۋان ابدرايموۆ.

كۇدىكتىنىڭ سوزىنشە، ول سۇيىكتىسىمەن جانجالداسىپ قالعان. سوڭىندا ەش جەردە تىركەلمەگەن اڭشى مىلتىعىمەن ونى اتىپ تاستاعان.

اتالعان فاكتىگە سايكەس ق ر ق ك- ءنىڭ 99-بابى (ادام ءولتىرۋ) بويىنشا سوتالدى تەرگەۋ ءجۇرىپ جاتىر.