USD 429.57 EUR 447.35
RUB 6.94 CNY 63.23
جاڭالىقتار

قىزىلوردالىق وقۋشى كۇرىش ونىمدىلىگىن ارتتىراتىن عىلىمي- جوبا ازىرلەدى

6 قاراشا 08:08
:ءبولىسۋ
قىزىلوردالىق وقۋشى كۇرىش ونىمدىلىگىن ارتتىراتىن عىلىمي- جوبا ازىرلەدى

قىزىلوردا. قازاقپارات - قىزىلوردا وبلىسىنىڭ جاس ونەرتاپقىشى نۇرجانبەك قۇرمانبەك كۇرىشتىڭ ءوسىمىن بەس ەسە ارتتىراتىن عىلىمي-جوبانى ۇسىندى، دەپ حابارلايدى قازاقپارات ءتىلشىسى.

نۇرجانبەك قۇرمانبەك قىزىلوردا قالاسىنداعى نازاربايەۆ زياتكەرلىك مەكتەبىنىڭ 8-سىنىبىندا وقيدى. ول جاڭا جوبانى مەكتەپ زەرتحاناسىندا سىناقتاپ وتكىزىپ كوردى. وندا «فيتوپ تىڭايتقىشى» دەپ اتالاتىن بيولوگيالىق پرەپارات قولدانىلدى. اتالمىش تىڭايتقىش كۇرىش داقىلىنىڭ وسۋىنە وڭ اسەر ەتەدى. تاجىريبە ناتيجەسىندە تىڭايتقىش كۇرىشتىڭ ءوسۋىن 5 ەسەگە جانە ونىمدىلىگىن 3-4 پايىزعا ارتتىراتىنى انىقتالدى.

«بۇل پرەپاراتتى پايدالانۋ ەكونوميكالىق تۇرعىدان ءتيىمدى. سونداي-اق، ول سىر ءوڭىرىنىڭ كليماتتىق جاعدايىنا دا قولايلى»، - دەدى نۇرجانبەك قۇرمانبەك.

جاقىندا ول الماتىدا وتكەن رەسپۋبليكالىق عىلىمي جوبالار سايىسىنا قاتىسىپ، ءۇشىنشى ورىنعا يە بولدى. سايىس بارىسىندا قىزىلوردا قالاسىنداعى نازاربايەۆ زياتكەرلىك مەكتەبىنىڭ باسقا دا وقۋشىلارى جۇلدەلى ورىندارعا قول جەتكىزدى. اتاپ ايتقاندا، ارايلىم ومىربەك قىزى «ەتنومادەنيەت تانۋ» سەكسياسىندا جوبا قورعاپ، 1 - ورىنعا تابان تىرەدى. ال ۆلاديمير ۋسولتسيەۆتىڭ «C#» باعدارلامالاۋ تىلىندە لاندشافت گەنەراتورى ەكىنشى ورىن الدى. سونداي-اق 11-سىنىپ وقۋشىسى باقنۇر امانگەلدىنىڭ تۇركىتانۋشى يشتۆان قوڭىر ماندوكيدىڭ ءومىرى مەن قازاق ادەبيەتىنە قوسقان ۇلەسىن زەرتتەۋ ناتيجەسى ءۇشىنشى ورىنعا لايىقتى دەپ تانىلدى.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات