چەمپيوندار ليگاسى: «بارسەلونا» ءوز الاڭىندا قارسىلاسىمەن تەڭ ءتۇستى
اتالمىش تۋرداعى باستى ويىننىڭ ءبىرى F توبىنداعى يسپانيانىڭ «بارسەلونا» جانە چەحيانىڭ «سلاۆيا» كوماندالارى اراسىندا بولدى. كەزدەسۋ يسپان جەرىندە وتكىزىلدى. دەگەنمەن، يسپان فۋتبولشىلارى قارقىندى ويىنىمەن كوزگە تۇسە العان جوق. ەكى اپتاداي بۇرىن قوس كوماندا چەحيادا باق سىناسقان ەدى. اتالمىش كەزدەسۋدە «بارسەلونا» 2:1 ەسەبىمەن جەڭىسكە جەتكەن ەدى. سوعان قاراماستان، ولاردىڭ ويىن ورنەگىنە سىن ايتۋشىلار از بولعان جوق.
«سلاۆيا» ازۋلى قارسىلاسىنا بۇگىن دە تەگەۋرىندى قارسىلىق تانىتا ءبىلدى. يسپاندىق كلۋبتىڭ شابۋىلىنا لايىقتى توتەپ بەردى. ناتيجەسىندە، ويىننىڭ ءبىرىنشى كەزەڭىندە قوس كوماندانىڭ دا قاقپاسىنا گول سوعىلعان جوق. ويىن 0:0 ەسەبىمەن تەڭ اياقتالدى. ءتورت ويىننان كەيىن ولار سەگىز ۇپاي جيناپ، ءوز توبىندا كوش باستاپ كەلەدى.
ەندى «بارسەلونا» ەكى ويىن وتكىزەدى. الدىمەن، ءوز الاڭىندا 27- قاراشادا گەرمانيانىڭ «بورۋسسيا دورتمۋند» كومانداسىن قابىلداسا، 10- جەلتوقساندا يتاليادا «ينتەرمەن» كەزدەسەدى.
سونداي-اق، بۇگىن رەسەيدە سانكت-پەتەربۋرگتىڭ «زەنيت» كلۋبى G توبىندا ءوز الاڭىندا گەرمانيانىڭ «رب لەيپتسيگ» كومانداسىمەن كەزدەسىپ، ولاردان 0:2 ەسەبىمەن جەڭىلىپ قالدى. ويىننىڭ 45-مينۋتىندا نەمىس كلۋبى ساپىنان ديەگو دەممە مەرگەندىك تانىتسا، 63-مينۋتتا مارسەل زابيتتسەر ەسەپتى ۇلعايتا ءتۇستى. وسىلايشا، «زەنيت» تۋرنير كەستەسىندەگى جاعدايىن ءبىرشاما قيىنداتىپ الدى. ەندى ولار جارىستى جالعاستىرۋ ءۇشىن قالعان ەكى ويىندا جەڭىسكە جەتۋى قاجەت. ولار 27- قاراشادا فرانسيانىڭ «ليون» كومانداسىن قابىلداسا، 10- جەلتوقساندا پورتۋگاليادا «بەنفيكامەن» شەبەرلىك بايقاسادى.
بۇگىن چەمپيوندار ليگاسىندا E، F، G، H توپتارىندا ويىندار وتكىزىلەدى. جانكۇيەرلەر ولاردىڭ اراسىنان انگليانىڭ «ليۆەرپۋل» جانە بەلگيانىڭ «گەنك» كلۋبتارى اراسىنداعى كەزدەسۋگە ەرەكشە كوز تىگىپ وتىرعانى بەلگىلى.