مۇقاعالي ماقاتايەۆ تۋرالى فيلمنىڭ كورىنىستەرى الماتىدا ءتۇسىرىلىپ جاتىر
الماتىنىڭ قاق ورتاسىندا قولشاتىرمەن تولىپ جۇرگەن ادامدار، تۇرعىنداردىڭ نازارىن اۋداردى. كەيىن بۇل جەردە اقيىق اقىن مۇقاعالي ماقاتايەۆ تۋرالى فيلم ءتۇسىرىلىپ جاتقاندىعى بەلگىلى بولدى.
رەداكسيامىزعا قالا تۇرعىندارى ابىلايحان كوشەسىنەن تولە بي - بوگەنباي باتىرعا دەيىنگى كوشەنىڭ جابىلعانىن ايتىپ، سۋرەتتەرىن جىبەردى. «قازاقفيلم» كينوستۋدياسى بۇل اقپاراتتى راستادى.
مۇزبالاق اقىنعا ارنالعان كوركەم فيلمنىڭ رەجيسسەرى - بولات قالىمبەتوۆ. ونىڭ ايتۋىنشا، جاڭا كينوكارتينادا اقىن ءومىرىنىڭ سوڭعى جىلدارى ايشىقتالماق. كورەرمەن مۇقاعالي ماقاتايەۆتىڭ ەسەيگەن شاعىمەن، قازاق ك س ر جازۋشىلار وداعى وتىرىسىندا اقىننىڭ تاعدىرى شەشىلگەن ساتىمەن تانىسادى.
بۇل فيلم اقىن عانا ەمەس، ادامنىڭ تاعدىرى جايىندا بولماق.
فيلمنىڭ سەناريىن جۇسىپبەك قورعاسبەك، بولات قالىمبەتوۆ، عازيز ناسىروۆ جازدى.
بۇعان دەيىن ءتۇسىرىلىم وسكەمەن مەن سانكت- پەتەربوردا بولدى.
الماتىداعى ءتۇسىرىلىم اياقتالعان سوڭ، شىعارماشىلىق توپ الماتى وبلىسىنا جول تارتپاق.