سپورتپەن اينالىسۋ كۇيزەلىستەن ارىلۋعا قالاي كومەكتەسەدى؟

نۇر-سۇلتان. قازاقپارات - سپورتپەن اينالىسۋ تەك فيزيكالىق فورماعا عانا اسەر ەتەدى دەسەڭىز، قاتەلەسەسىز.

ومىردەگى قيىن دا، پروبلەماعا تولى كەزەڭدە جانىڭىزعا سپورتتان ارتىق سەرىك جوق. بۇل پىكىردى تەك سپورتشىلار عانا ەمەس، عالىمدار دا راستايدى.

سپورتپەن شۇعىلدانۋ ءسىزدىڭ بويىڭىزداعى توزىمدىلىكتى ارتتىرىپ قانا قويماي، ومىردەگى قيىندىقتاردى جەڭۋگە كومەكتەسەتىنىن بايقادىڭىز با؟ كەيبىر سپورتشىلاردىڭ ايتۋى بويىنشا، كۇندەلىكتى جاتتىعۋلار سپورت الاڭىنان تىس ۋاقىتتاردا دا ءوز ونىمدىلىگىن ساقتاپ، كوپ بولماسا، از پايداسىن تيگىزبەگەن. سونداي-اق سپورتپەن اينالىساتىندار قارىم-قاتىناستا دا جاڭعاقتاي بەرىك كەلەدى ەكەن.

ءبىر قىزىعى، تۇراقتى سپورت ءسىزدى باستىقتىڭ ايقايى نەمەسە ۋاقىت تىعىز كەزدە سابىرلىق پەن سالقىنقاندىلىقتى ساقتاي وتىرىپ، اسىعىس شەشىم قابىلداماۋعا ۇيرەتەدى. قارىم- قاتىناستاعى قيىندىقتاردىڭ دا كۇرمەۋى شەشىلە باستايدى.

بارلىق نارسە شارشاعانعا عانا بايلانىستى دەپ ويلاۋىڭىز مۇمكىن. جاتتىعۋلاردان قاتتى شارشاعاندىقتان بولماشى نارسەلەردى ۋايىمداۋعا ءالىڭىز قالمايدى. الايدا، شارۋا مۇنىمەن ءبىتتى دەگەن ءسوز ەمەس. زەرتتەۋگە سۇيەنسەك، سپورت ميدىڭ بەلسەندىلىگىن قالىپقا كەلتىرىپ، زەيىندى ارتتىرادى. سپورتپەن تۇراقتى تۇردە اينالىساتىن ادامدار جاتتىعۋلاردان ءبىرازعا دەيىن بوساڭسىعان كۇندەردە دە كۇيزەلىسكە قارسى تۇرا الادى.

سپورتپەن شۇعىلدانۋ ديابەتتى ەمدەپ، ينسۋلتتىڭ الدىن الاتىنىن، جۇرەك سوعىسىن قالىپقا كەلتىرىپ، گيپەرتونيا مەن وستەوپوروزدى ەمدەيدى دەگەندى ءجيى ەستيمىز. الايدا، اۋىر سپورت تۇرلەرىمەن شۇعىلدانۋ ومىردەگى قيىندىق اتاۋلىعا تاپ كەلگەندە مويىماۋعا جاعداي جاسايتىنىن ايتا بەرمەيتىنىمىز وكىنىشتى.

سپورتشىلارعا جاتتىعۋلار قالاي اسەر ەتتى

بۇل داعدى اسىرەسە اۋىر سپورت تۇرلەرىمەن اينالىساتىن ادامداردا جاقسى دامىعان. بۇل سپورتشىلار كوپشىلىك توزە بەرمەيتىن قيىندىقتارعا توتەپ بەرۋ ارقىلى ءناپاقاسىن تابادى. ايتۋلارىنشا، سپورت ولاردى كەز-كەلگەن ساتتە سىنا بەرمەيتىن بەرىكتىككە باۋلىعان.

امەريكالىق جەلاياق دەزيرە ليندەننىڭ ايتۋىنشا، ۇزاق قاشىقتىقتى جۇگىرىپ ءوتۋ كەزىندە جيعان تاجىريبەلەرى وعان ءتىپتى دەم جەتپەگەن ۋاقىتتا دا سابىرلىق ساقتاۋعا كومەكتەسكەن. وسىلايشا، اۋىر كەزەڭدە جىگەرىن جيىپ، ءوزىن ىشتەي سابىرعا شاقىرعان.

الەمدەگى بىلىكتى سەرفينگشىلەردىڭ ءبىرى نيك لەمبتىڭ پايىمداۋىنشا، قورقىنىش پەن قولايسىزدىق وعان ەڭ ۇلكەن تولقىنداردى ەڭسەرۋگە كومەكتەسكەن. بۇدان بولەك سپورتتىڭ بۇل ءتۇرى نيككە جىگەر مەن تۇلعالىق دامۋعا كۇش بەرگەن. نيك ءتىپتى، جىگەر سارقىلعان كەزدە دە، قايتا كۇش الىپ، ەڭسەڭدى تىكتەسەڭ، كەز- كەلگەن قيىندىقتى جەڭىپ شىعۋعا بولاتىنىنا سەنىمدى.

ەگەر، كەرى شەگىنسەڭ، وكىنەتىن بولاسىڭ. سول ءۇشىن باتىلدانا العا ۇمتىل!

نيك لەمب

الپينيست الەكس حوننولد قانداي دا بولسىن قيىندىقتى تۇراقتى جاتتىعۋلارمەن جەڭۋگە بولاتىنىنا ءشۇبا كەلتىرمەيدى. سەبەبى، «جاتتىعۋ كەزىندەگى نەبىر قيىندىقتاردى سەزىنگەننەن كەيىن، تاۋعا شىعۋدىڭ ءوزىن قورقىنىشتى دەپ ايتۋعا اۋزىڭ بارمايتىن بولادى» دەيدى. بۇل قاعيدانى ومىردە قولدانۋعا ابدەن بولادى.

امەريكالىق ۆەلوشاباندوز ەۆەلين ستيۆەنس ساعاتتىق رەكوردتى ورناتقان كەزدە، ەڭ قيىن ساتتەردە «مۇنىڭ ءبارى قاشان بىتەدى؟» دەپ كۇتپەي، كۇش سالىپ، قيىندىقتاردى بارىنشا سەزىنىپ، ولاردى جەڭۋگە تىرىسقان.

ەكسترەمال- فوتوگراف دجيممي چين قاۋىپتى جاعدايلاردا اقىلعا قۇلاق ءتۇرىپ، ناقتى جانە قيالداعى قاۋىپتى اجىراتىپ الۋعا كەڭەس بەرەدى.

ال، ك س ر و-نىڭ 16 دۇركىن چەمپيونى، الپينيست ۆالەري بالەزينمەن سۇحباتتاسۋدىڭ ءساتى تۇسكەن ادامدار ونىڭ توزىمدىلىگى كەز- كەلگەن جاعدايعا ءتان ەكەنىن اتاپ وتەدى: تاۋعا ورمەلەۋ كەزىندە دە، قاراپايىم ومىردە دە.

عالىمدار نە دەيدى؟

الايدا، بۇل دەگەنىڭىز، قاۋىپتى سپورت تۇرلەرىمەن اينالىسىپ، الەمدىك رەكوردتى جاڭارتۋعا ۇمتىلىڭىز دەگەندى بىلدىرمەيدى. دەنساۋلىق پسيحولوگياسى سالاسىن زەرتتەۋ بارىسىندا بۇرىن- سوڭدى مۇلدەم سپورتپەن اينالىسپاعان كوللەدجدىڭ ستۋدەنتتەرىنە اپتاسىنا ەكى نەمەسە ءۇش رەت سپورتزالعا بارۋعا كەڭەس بەرىلگەن. ناتيجەسىندە، زەرتتەۋگە قاتىسقان ستۋدەنتتەر جاتتىعۋلاردىڭ كۇندەلىكتى ومىرىنە جاقسى اسەر ەتكەنىن العا تارتادى. بۇدان بولەك، ستۋدەنتتەردىڭ بويىنان سترەسستىڭ ازايعانى، الكوگول، شىلىمنان باس تارتۋ نەمەسە تەمەكى مولشەرىن ازايتۋ ارەكەتتەرى بايقالعان. وعان قوسا ولار پايدالىراق تاعامداردى دا تۇتىنىپ، وقۋ ۇلگەرىمدەرىنىڭ ساپاسىن دا كوتەرە باستاعان.

ايتا كەتەرلىك تاعى ءبىر جايت، 2 ايلىق تۇراقتى جاتتىعۋدان كەيىن زەرتتەۋگە قاتىسۋشىلار اراسىندا وزدەرىن قاداعالاۋ كورسەتكىشى جوعارىلاعان. باسقاشا ايتقاندا، ستۋدەنتتەر وقۋ بارىسىنداعى ەڭ قيىن ساتتەردە دە سابىرلىق پەن جيناقىلىقتى تانىتا باستاعان. سونداي-اق، سپورت ولارعا كۇيزەلىستەن ارىلىپ قانا قويماي، اۋقىمى ۇلكەن اقپاراتتاردى وڭاي قابىلداۋعا جاردەمدەسكەن.

«The Power of Habit» اتتى كىتاپتىڭ اۆتورى چارلز داحيگتىڭ پىكىرىنشە، كۇندەلىكتى جاتتىعۋلار اۋەلى ءومىردىڭ ءبىر بولىگىنە اسەر ەتىپ، سودان كەيىن ءومىردىڭ باسقا تۇستارىن وزگەرتۋگە كىرىسەدى ەكەن. بۇل ادەتتەردىڭ كۇشتىلىگى سونشالىق، وزىمىزگە قاتىستى پىكىردى وزگەرتىپ، جاڭا مۇمكىندىكتەردى بايقاۋعا جول اشاتىن كورىنەدى.

ماسەلەن، Back on My Feet دەپ اتالاتىن قايىرىلىمدىلىق جوباسى ايتارلىقتاي ناتيجە كورسەتكەن. ول جوبا اياسىندا وتكەن مارافونعا 5000 نان استام ءۇيسىز ادام قاتىسقان. مارافونعا قاتىسقانداردىڭ 40 پايىزى جۇمىس تابۋعا مۇمكىندىك السا، 25 پايىزى تۇراقتى باسپاناعا قول جەتكىزگەن.

تاعى ءبىر ايتا كەتەرلىگى، ۇزاق قاشىقتىقتى جۇگىرىپ ءوتۋدى كۇندەلىكتى ادەتكە اينالدىرۋ اجىراسۋ، جاقىن ادامنىڭ ءولىمى سەكىلدى ءومىردىڭ قيىندىقتارىنا توتەپ بەرۋدى ۇيرەتەدى ەكەن.

باسقا ءبىر زەرتتەۋدىڭ ناتيجەسىندە تۇراقتى تۇردەگى جاتتىعۋلار كۇيزەلىستىڭ الدىن الىپ، تاپ كەلە قالعان جاعدايدا ەڭسەنى تىكتەۋگە كومەكتەسەدى ەكەن.

تاعى ءبىر مىسالدى كەلتىرە كەتەيىك.

ءبىرىنشى جارتى جىلدىقتىڭ باسىندا گەرمانياداعى كارلسرۋە تەحنولوگيالىق ينستيتۋتى ستۋدەنتتەردى ەكى توپقا بولگەن. توپتاردىڭ بىرىنە اپتاسىنا ەكى رەت جۇگىرىپ تۇرۋ تاپسىرماسى جۇكتەلگەن.

زەرتتەۋ باس-اياعى 20 اپتاعا جالعاسقان. ءبىر قىزىعى، سوڭعى 20 اپتا ستۋدەنتتەر ءۇشىن ەڭ قيىن كەز ەمتيحان تاپسىرۋ كەزىنە تاپ كەلگەن. وسى كەزدە، زەرتتەۋشىلەر ارنايى قۇرىلعىنىڭ كومەگىمەن ەكى توپتىڭ ستۋدەنتتەرىنىڭ جۇرەك قاعىسىن انىقتاپ، ەداۋىر ايىرماشىلىقتاردى بايقاعان.

ناتيجەسىندە، جۇگىرۋمەن اينالىسقان ستۋدەنتتەردىڭ كۇيزەلىسكە بەرىلۋ دەڭگەيى جۇگىرمەگەن ستۋدەنتتەرگە قاراعاندا الدەقايدا تومەن ەكەنى انىقتالعان.

بايقاعاندارىڭىزداي، كەرەمەت ناتيجە الۋ ءۇشىن مىندەتتى تۇردە اسىرا سىلتەپ كۇش سالۋ كەرەك ەمەس ەكەن. جاي عانا وزىڭىزگە ۇنايتىن سپورت ءتۇرىن تاڭداپ، تۇراقتى تۇردە اينالىسساڭىز جەتىپ جاتىر. وسىلايشا جالقاۋلىقتى جەڭىپ، كوپتەن كۇتكەن ناتيجەگە قول جەتكىزەتىن بولاسىز.