رەسەي پرەزيدەنتى پاۆلودارلىق تۇرعىندى دوستىق وردەنىمەن ماراپاتتادى
بۇل تۋرالى قازاقپارات قازاقستاننىڭ ر ف- داعى ەلشىلىگىنە سىلتەمە جاساپ حابارلايدى.
ماراپاتتالعانداردىڭ اراسىندا پاۆلودار وبلىستىق «سلاۆيان مادەني ورتالىعى» قوعامدىق بىرلەستىگىنىڭ باسقارما ءتوراعاسى تاتيانا كۋزينا بار. ول دوستىق وردەنىنە لايىق دەپ تانىلدى. ناگرادانى رەسەي پرەزيدەنتى ۆلاديمير پۋتين تابىستادى.
«رەسەي مەن شەتەلدىك سەرىكتەستەر اراسىنداعى قارىم-قاتىناستى دامىتۋعا سۇبەلى ۇلەس قوسىپ وتىرعان بارشا شەتەلدىك دوستارىمىزعا العىس بىلدىرەمىن. ءاۋ باستا ورىس مادەنيەتى جانە ورىس مەملەكەتى كوپ ۇلتتى جانە كوپكونفەسسيالى رەتىندە اياققا تۇرعان بولاتىن»، - دەدى سالتاناتتى شارا بارىسىندا ۆ. پۋتين.
ءوز كەزەگىندە تاتيانا كۋزينا كرەمل ساحناسىندا ەلدەردىڭ بىرلىگى تۋرالى ايتا كەلە، ابايدىڭ قارا سوزىنەن ءۇزىندى كەلتىردى.
«باس-باسىڭا ءبي بولساڭ، مانار تاۋعا سىيماسسىڭ، باس القاڭىز بار بولسا، جانعان وتقا كۇيمەسسىڭ»، دەگەن. سوندىقتان جەر بەتىندە تارشىلىق بولماسىن، قازاقستاندا دا، رەسەيدە دە بەيبىتشىلىك پەن دوستىق بولسىن. ءبىزدىڭ ەلدەرىمىز كوپ ۇلتتى جانە مۇنى ساقتاپ قالۋ اسا ماڭىزدى. قازاقستان مەن رەسەي الەمدەگى ەڭ جاقىن مەملەكەتتەر ەكەنىن ارىپتەستەرىمىزبەن ءاردايىم ايتىپ وتىرامىز. ءبىز دوستىقتى ساقتاي الدىق، ءبىز ۇلى بابالارىمىزدىڭ لايىقتى ۇرپاعىمىز!»، - دەدى ول.