تالدىقورعاندا جاپون ەلىنىڭ جوباسى جۇزەگە استى

تالدىقورعان. قازاقپارات - تالدىقورعاندا «اسار» سپورتتىق- وڭالتۋ ورتالىعى جاپون ەلشىلىگىنىڭ ارنايى گرانتىن جەڭىپ الىپ، قوندىرعىلارىن جاڭارتتى.

 كۇنشىعىس ەلىنىڭ ەلشىسى جوبانىڭ ناتيجەسىن پىسىقتاۋ ءۇشىن ارنايى كەلدى، دەپ حابارلايدى قازاقپارات ءتىلشىسى.

2017 -جىلى جاپون ەلىنىڭ «ءشوپ تامىرى» باعدارلاماسى اياسىندا تالدىقورعانداعى «اسار» سپورتتىق- وڭالتۋ ورتالىعى 82 مىڭ ا ق ش دوللارى كولەمىندە ارنايى گرانت ۇتىپ العان بولاتىن. بۇل قارجىعا ورتالىق مۇمكىندىگى شەكتەۋلى جاندارعا ارنالعان ءتۇرلى قۇرال جابدىقتار الدى. جاتتىعۋ قۇرالدارى جول كولىك اپاتتارىندا، باسقا دا وقىس جاعدايلاردا زاقىم العان ادامداردى وڭالتۋعا باعىتتالعان. وڭىردەگى مۇمكىندىگى شەكتەۋلى جانداردى قايتا قاتارعا قوسۋ ماقساتىندا اشىلعان ورتالىق كومەگىنە 500 دەن استام ادام جۇگىنگەن. 80 ادام اياعىنان تىك تۇرىپ، قايتا ءجۇرۋ مۇمكىندىگىنە يە بولدى.

جاپونيانىڭ قازاقستانداعى توتەنشە جانە وكىلەتتى ەلشىسى تاتسۋحيكو كاساي قالاعا ارنايى كەلىپ، جوبانىڭ ناتيجەلەرىمەن تانىستى. جاپون ەلى ءارتۇرلى باعىتتا 100 دەن اسا جوباسىن قازاقستاندا جۇزەگە اسىردى. ەكى ەل اراسىنداعى الەۋمەتتىك سالاداعى ىنتىماقتاستىق الداعى ۋاقىتتا دا ءوز جالعاسىن تاپپاق.

«بۇل — وتە جاقسى باعدارلاما. ناۋقاستار ساۋىعىپ، اياعىنا تۇرىپ كەتىپ جاتىر. مۇنداي جاندار قازاقستاندا دا، ءبىزدىڭ ەلدە دە بار. سوندىقتان ولاردى وڭالتىپ، قاتارىمىزعا قوسۋ ءبىزدىڭ ورتاق مىندەت. ءبىز الداعى ۋاقىتتا دا بايلانىسىمىزدى ۇزبەي بىرگە جۇمىس ىستەي بەرەمىز دەگەن سەنىمدەمىن» ، - دەدى ەلشى تاتسۋحيكو كاساي.

«100 جاڭا ەسىم» جوباسىنىڭ العاشقى قارلىعاشى ەلدوس بايالىشبايەۆ «اسار» وڭالتۋ ورتالىعىنىڭ نەگىزىن قالاپ، باستامانىڭ دامۋىنا بارىنشا ۇلەس قوسىپ كەلەدى. ءوزى دە جول اپاتىنان زارداپ شەگىپ، ارباعا تاڭىلعان ازامات وبلىس ورتالىعىندا زاماناۋي وڭالتۋ ورتالىعىن اشۋدى جوسپارلاپ وتىر.