مىرزاگەلدى كەمەلدىڭ بيزنەس جايلى قاناتتى سوزدەرى

نۇر-سۇلتان. قازاقپارات - ءبىز جاڭا، جاقسى نارسەنى باستاۋ ءۇشىن ەڭ الدىمەن بىردەڭەنى جوعالتىپ، ءبىر نارسەدەن باستاۋىمىز كەرەك.

اۋرۋلار، جازاتايىم جاعدايلار، قارجى ساتسىزدىكتەرى، ماحاببات كۇيىنىشتەرى بەلسەندىلىكتى ارتتىرادى جانە ءبىزدى تاعدىرداعى بەتبۇرىستى كەزەڭگە يتەرمەلەيدى نەمەسە دالىرەك ايتقاندا، وسىلاردىڭ ارقاسىندا ءبىز بولاتىن وزگەرىستەرگە جىگەرلەنەمىز. سونىمەن، كەيدە تىزەنىڭ جاراقاتتانۋى نە وكپەنىڭ قابىنۋى ادامداعى مۇلگىپ جاتقان تۇيسىكتى وياتۋعا تۇرتكى بولادى. كەز كەلگەن وتپەلى باقىتسىزدىقتا عاجاپ جاڭا مۇمكىندىكتەر بۇعىپ جاتادى. دەمەك، ساتسىزدىكتەر، اپاتتار، تاعدىر سوققىلارى جاڭا مۇمكىندىكتەردى تۋعىزادى، پسيحولوگتاردىڭ پىكىرىنشە تاعدىر ءبىزدى اياۋسىز توقپاقتامايدى، ول ءبىزدى ويانۋىمىز ءۇشىن نۇقىپ جىبەرەدى. جاعدايعا وسى تۇرعىدان قاراعان ءجون.

ەكى ادام ءبىر-بىرىمەن شاعىم ايتۋ نەمەسە وسەكتەسۋ ءۇشىن كەزدەسپەۋى ءتيىس، ادامدار ءبىر- بىرىنە رۋحاني جاندار رەتىندە كەرەك، ادامدار اڭگىمەلەسۋ ارقىلى ءبىر-ءبىرىنىڭ رۋحىن كوتەرە الاتىن بولعاندىقتان، ودان ءلاززات الادى.

ادامدارمەن كەزدەسۋ كەزىندە ءوزىڭدى ەركىن سەزىنۋگە كومەكتەسەتىن التى ءادىس:

- كۇل، ەزۋ تارت؛

- ءوزىڭ تۋرالى ايت؛

- سۇحباتتاسىڭا ەڭكەيىڭكىرەپ تۇر؛

- سۇحباتتاسىڭا جاناس؛

- كوزىنە قاراپ تۇر؛

- باس يزەپ تۇر.

تاعى بىرنەشە كەڭەس:

- ءوزىڭدى تانىستىر؛

- تاۋەكەل ەت؛

- مەنى قابىل المايدى-اۋ دەپ كوڭىلىڭە الما؛

- جاڭا يدەيالاردان قاشپا؛

- ەسىمدەردى ۇمىتپا. بىرەۋدىڭ ەسىمىن ۇمىتىپ قالساڭ، قايتا سۇراۋدان قىسىلما؛

- باسقالارعا ءوزىڭ ءۇشىن ماڭىزدى نارسەنى ايت.

ءومىر قاعيدالارى:

- سوزدەن ىسكە كوشكەن ابزال؛

- ءوز سەنىمىڭدى دالەلدە، قورعاپ باق، بىراق ءوز قاتەلىكتەرىڭدى مويىنداي بىل، تەك سوندا عانا العا جىلجيسىڭ؛

- جاقىنىڭدى جاقسى كور جانە وعان بولاشاققا سىلتەمەي، قازىر كومەكتەس. وعان ءوز دەگەنىڭدى تاڭبا، ونىڭ مۇددەسىن ويلا»

- جاماندىق، قىزعانىش ويلاما: كەكشىلدىك سەزىمنەن ارىل. ادامدار ءبىر-بىرىنە باۋىر ەكەنىن جانە كوپ نارسەنى بەيبىت جولمەن شەشۋگە بولاتىنىن ۇمىتپا. قاجەت بولسا، السىزدەرگە جاقتاسىپ، زورلىقپەن كۇرەسۋگە دايىن بول.

مىنالاردىڭ توڭىرەگىندە ويلانا ءجۇرىڭىز:

- تىم سىپايى ەمەسپىن بە؛

- ادامدى قاجىتاتىنداي ەلگەزەك ەمەسپىن بە؛

- تىم كۇيگەلەك ەمەسپىن بە؛

- مويىنداۋعا اسا بەيىم ەمەسپىن بە؛

- ءوزىمنىڭ ۋايىمدارىم مەن رەنىشتەرىم تۋرالى كوپ اڭگىمەلەپ كەتپەيمىن بە نەمەسە، كەرىسىنشە، تىم ماقتانىپ جۇرگەنىم جوق پا؛

- مۇمكىن ءۇزىلدى-كەسىلدى، قاتتى داۋىستاپ، قىزبا سويلەيتىن شىعارمىن.