يسپانيادا دوپ تەبەتىن قازق بالاسى دانيەل سايلاۋبەك

نۇر-سۇلتان.قازاقپارات - «دوستار» فۋتبول كلۋبىندا ءتالىم العان دانيەل سايلاۋبەك يسپانيانىڭ «حەتافە» فۋتبول كلۋبىنا بارىپ، ءارتۇرلى تۋرنيرگە قاتىسىپ، تالانتىمەن كوزگە تۇسكەن.

بويىنداعى ەرەكشە قابىلەتىن بايقاعان يسپانيالىق باپكەرلەر دانيەلدى «حەتافە» فۋتبول كلۋبىنا الىپ قالدى. جازعى دەمالىستا الماتىعا ورالعان كەيىپكەرىمىزبەن اڭگىمەلەسۋدىڭ ءساتى تۇسكەن ەدى.

 - فۋتبولعا قىزىعۋشىلىعىم سەگىز جاسىمنان باستالدى. جاڭادان اشىلعان «دوستار» فۋتبول كلۋبىنا باعىمدى سىناپ كورۋگە بارىپ، كوماندا قاتارىنا قوسىلدىم. فۋتبولدىڭ قىر- سىرىن «دوستار» كومانداسى ساپىندا ءجۇرىپ ۇيرەندىم. جاسىل الاڭعا العاش شىققاننان باستاپ ۇلكەن ماقسات قويىپ، قازاقتىڭ اتىن شىعاراتىن الەمگە ايگىلى فۋتبولشى بولعىم كەلدى. اللاعا شۇكىر، ارمانىمىزعا جەتەلەيتىن العاشقى قادامدى ءساتتى باستادىق.

 دانيەلدىڭ بويىنداعى دارىندى باپكەرلەر بىردەن بايقاپ، تالانتىن ۇشتاۋ ءۇشىن يسپانياعا اپارادى. ونى يسپانياداعى «حەرەس» فۋتبول كلۋبىندا ءارتۇرلى تۋرنيرگە قاتىستىرادى. يسپانيالىق ماماندار دانيەلدىڭ تالانتىنا ءتانتى بولىپ، «حەرەس» ساپىنا الىپ قالعان.

- يسپانياعا بارعاننان كەيىن ءارتۇرلى كلۋبتا باعىمىزدى سىناپ، ءبىراز تۋرنيرگە قاتىستىق. جان- جاقتان كەلگەن جەتكىنشەكتەردى جيناپ، ءبىر كوماندا جاساقتادى. ءسويتىپ حەرەس قالاسىنداعى ەڭ ۇزدىك كوماندانىڭ ءبىرى سانالاتىن «حەرەس» كومانداسىنا قارسى ونەر كورسەتتىم. جاقسى جاعىمنان كوزگە ءتۇسىپ، ءبىر جىلعا كەلىسىمشارتقا وتىرىپ، «حەرەس» كومانداسى ساپىندا ونەر كورسەتۋگە مۇمكىندىك الدىم. العاشقى ويىندا دۋبل اۆتورى اتانىپ، ءبىر ناتيجەلى پاس بەردىم. ونىڭ ۇستىنە «حەرەستە» ەڭ ۇزدىك ويىنشىلار ونەر كورسەتكەندىكتەن، دەڭگەيىمدى دالەلدەۋىم كەرەك بولدى. ويتكەنى سولارمەن تەڭ دارەجەدە ويناسام، جەرگىلىكتى سپورتشىلاردىڭ كولەڭكەسىندە قالىپ قوياتىنىمدى ءبىلدىم. جارتى جىلداي ۋاقىتىم UEFA- دان كوماندا ساپىندا ويناۋعا رۇقسات قاعازىن الۋعا كەتتى. ودان بولەك، ويىن بارىسىندا قولىمدى سىندىرىپ، ەكى ايداي ەمدەلدىم.

جاراقاتىنان ايىققان دانيەل ءارتۇرلى كلۋبتارعا بارىپ، باعىن سىنايدى. بارسەلونا قالاسىنداعى «سانتوس» فۋتبول كلۋبى دانيەلدى قاتارىنا قوسىپ، نەگىزگى قۇرامنان ورىن بەرگەن.

 - UEFA تاراپىنان رۇقسات قاعازىن العاننان كەيىن ءارتۇرلى كلۋبقا ءوزىمنىڭ دەڭگەيىمدى كورسەتۋگە باردىم. بارسەلونا قالاسىنداعى «سانتوس» كومانداسى ءبىر اي سىناق مەرزىمىن بەردى. وسى ۋاقىت ارالىعىندا باپكەردىڭ كوزىنە ءتۇسىپ، نەگىزگى قۇرامنان ورىن بەردى. بەسىنشى نومىرمەن وڭ قاپتالداعى قورعاۋشى پوزيتسياسىندا وينايمىن. 16 جاسقا دەيىنگى جاستار اراسىنداعى كوماندامەن ءبىر جىلعا كەلىسىمشارتقا وتىردىق. بارلىق ويىندا نەگىزگى قۇرامدا الاڭعا شىعىپ، 90 مينۋتتىق ماتچتار وتكىزدىم. قورعاۋشى قىزمەتىن اتقارسام دا، ءبىر رەت گول سوعىپ، ءتورت رەت ناتيجەلى پاس بەردىم. تەك ءتۋرنيردىڭ سوڭىنا قاراي جاراقات الىپ، نەگىزگى قۇرامداعى ورنىمدى جوعالتىپ الدىم. العاشقى ماۋسىمدا ەكىنشى ديۆيزيوندا ونەر كورسەتتىك. وكىنىشكە قاراي، سول ديۆيزيوندا قالۋعا ءبىر ۇپاي جەتپەي، ءۇشىنشى ديۆيزيونعا تۇستىك. ەندى قايتادان ناتيجەمىزدى جاقسارتىپ، ەكىنشى، ودان ارى ءبىرىنشى ديۆيزيونعا جولداما الۋعا بارىمىزدى سالامىز. كوماندامنىڭ جەڭىسكە جەتۋى ءۇشىن جاسىل الاڭدا جانىمدى سالۋعا دايىنمىن.

 دانيەل كوماندا ساپىنداعى ەڭبەكقور ويىنشى بولعانىمەن، فيزيكالىق تۇرعىدان باسقالارعا قاراعاندا السىزدەۋ ەكەن. دەگەنمەن ءارتۇرلى دارۋمەن ءىشىپ، فيزيكالىق الەۋەتىن ارتتىراتىن جاتتىعۋلار جاساپ ءجۇر.

 - شىنى كەرەك، كومانداداعى ويىنشىلاردىڭ ءبارى مەنەن گورى ىرىلەۋ، ءارى فيزيكالىق تۇرعىدان مىعىم. دەگەنمەن جاتتىعۋ بىتكەن سوڭ، باپكەرمەن جەكە قالىپ، تاعى دا بىرگە جۇمىس ىستەپ، تاپسىرمالار الامىن. بۇل ارەكەتىم جاتتىقتىرۋشىما قاتتى ۇناسا كەرەك، ىلعي بارىنشا قولۇشىن بەرىپ، اقىل- كەڭەسىن ايتادى. ەڭبەكقورلىعىممەن باپكەردىڭ كوڭىلىنەن شىعىپ، سەنىمىنە كىردىم. العاشقى كۇندەرى جاتتىعۋ بارىسىندا دا ءبىراز قينالدىم. ويتكەنى ءبىزدى تەك 90 مينۋتقا دايىنداسا، بۇل جاقتا 120 مينۋتتىق ويىندارعا دايىندايدى. ياعني ەكى ەسە كوپ جاتتىعۋ جاساپ، تەر توگەمىز. سوندىقتان كۇنىگە تاڭەرتەڭ جاعاجايدا جۇگىرۋدى ادەتكە اينالدىردىم. جۇگىرگەننەن اياعىڭنىن بۇلشىقەتتەرى قاتايىپ، جاراقات الىپ قالۋدان ساقتاناسىڭ. ەلگە كەلگەلى ارنايى مامانداردىڭ كۋرسىنا جازىلىپ، شىنىعىپ، سالماق قوسىپ جاتىرمىن.

يسپانياعا العاش كەلگەندە كەيىپكەرىمىزدىڭ باسىنان نەشە ءتۇرلى قيىندىق پەن قىزىق وتكەن. سولاردىڭ ءبىرى - ءتىل ماسەلەسى. دانيەلگە يسپان تىلىنەن بولەك، كاتالون ءتىلىن دە مەڭگەرۋگە تۋرا كەلگەن.

- حەرەس قالاسىندا تۇرعانداعى ءبىرىنشى جىلى ءتىل ماسەلەسىنەن اسا قيىندىق بولمادى. ويتكەنى بريتان كوللەدجىندە بارلىق ءپاندى اعىلشىن تىلىندە وقىدىق. ال بارسەلونا قالاسىنا اۋىسقاننان كەيىن ءتىل جاعىنان كىشكەنە قينالدىم. بارسەلونادا ءبارى كاتالون تىلىندە سويلەيدى، مەكتەپتەر دە تەك كاتالونشا وقىتادى. سوندىقتان كاتالون ءتىلىن مەڭگەرۋگە تۋرا كەلدى. جاتتىعۋدان قولىم تيگەندە، كىتاپ وقىپ، ءتىل ۇيرەنۋگە كوڭىل بولەمىن. قازىر اعىلشىن، ورىس، تۇرىك، يسپان، كاتالون تىلدەرىن بىلەمىن. سونىمەن قاتار، فرانسۋز جانە يتاليان ءتىلىن ۇيرەنۋدى جوسپارلاپ ءجۇرمىن. بولاشاقتا مۇنىڭ دا ءبىر پايداسى تيەر دەپ ويلايمىن.

 دانيەل سپورتتىق مانسابىن ەۋروپادا جالعاستىرىپ، قازاقتىڭ اتىن شىعاراتىن الەمگە ايگىلى فۋتبولشى بولعىسى كەلەدى. مۇنداي جەتىستىككە جەتۋگە مۇمكىندىگى بار ەكەنىن جاسىرمادى.

 - ەۋروپادا كەز كەلگەن تۋرنيرگە فۋتبول اگەنتتەرى كەلىپ، تالانتتى جاستاردى ىزدەيدى. وسىنداي اگەنتتەردىڭ كوزىنە ءتۇسىپ، شەبەرلىگىڭمەن ءتانتى ەتسەڭ، بولاشاعىڭ جارقىن بولۋى مۇمكىن. ماعان بارسەلوناداعى «سان- اندرە» كومانداسى ۇنايدى، سول كوماندادا ونەر كورسەتكىم كەلەدى. ولاردىڭ ويىن ۇلگىسى وتە جوعارى دەڭگەيدە، ويىنشىلار ءبىر- ءبىرىن جاقسى تۇسىنەدى. ءدال «بارسەلونانىڭ» تاكتيكاسىنداي جۇيەمەن وينايدى. ودان بولەك، مەيىرجان، دامير، الىبەك ەسىمدى قازاق دوستارىم دا وسى كوماندانىڭ قاتارىنا قوسىلىپ جاتىر. شىنى كەرەك، سپورتتىق مانسابىمدى ەۋروپادا جالعاستىرعىم كەلەدى. ويتكەنى مۇندا باسەكە وتە جوعارى جانە مۇمكىندىك تە كوپ. ءوزىمدى جان- جاقتى دامىتىپ، جەتىلدىرۋىم كەرەك.

دانيەل قازاقستان پرەمەر- ليگاسىنداعى ويىنداردى دا تاماشالايتىنىن، «قايرات» كومانداسىنىڭ جانكۇيەر ەكەنىن ايتتى.

 - الەمدىك كوماندالاردان «بارسەلونانىڭ» جانكۇيەرىمىن. بارسەلونادا جۇرگەندە «ەسپانول» كومانداسىنا قارسى ماتچتى تاماشالاپ، كەرەمەت اسەر الدىم. «بارسەلونا» كومانداسىنىڭ بۇرىنعى ويىنشىسى، كوماندا كاپيتانى بولعان ءحاۆيدىڭ ويىنى ەرەكشە ۇنايدى. سونداي- اق جاس تا بولسا، الەمگە اتى تانىلعان كيليان مباپپەنى ۇلگى تۇتامىن. ال قازاقستاندىق كلۋبتاردان «قايراتتىڭ» ويىنى قاتتى ۇنايدى. كوماندانىڭ تاكتيكالىق جۇيەسى، پاسپەن وينايتىندىعى، ويىنشىلاردىڭ الاڭدا ءبىرىن- ءبىرى سەزىنە بىلەتىندىگى جاقسى جەتىلگەن. سونداي- اق كوماندا ساپىنداعى باۋىرجان يسلامحان مەن ەركەبۇلان سەيداحمەتتىڭ ويىن ۇلگىسىن ەرەكشە اتاپ وتۋگە بولادى. باۋىرجان اعامىز پاستاردى كەرەمەت بەرىپ، كوماندالاسىنىڭ كوزگە تۇسۋىنە كوپ مۇمكىندىك جاسايدى. ال ەركەبۇلاننىڭ دريبلينگى جاقسى، كەز كەلگەن ويىنشىنى الداپ كەتە الادى. ءبىراق ول دا مەن سياقتى ارىق، فيزيكالىق تۇرعىدان السىزدەۋ. سول ءۇشىن دە «ۋفا» كومانداسى ساپىندا جاراقات الىپ قالدى. بالكىم، بولاشاقتا وسى اعالارىمىزبەن ءبىر كوماندادا وينايتىن شىعارمىز، كىم بىلەدى؟

الەمگە ايگىلى فۋتبولشى بولۋدى ارماندايتىن دانيەلگە ارمانىنا جەتۋىنە تىلەكتەسپىز!

 zhasorken.kz