نەلىكتەن مەكتەپتە جاقسى وقىعانداردىڭ جولى بولا بەرمەيدى؟

None
None
نۇر-سۇلتان. قازاقپارات - بالا كەزىمىزدەن جاقسى وقۋدى، جوعارى ءبىلىمدى بولۋدى، ءبىلىمسىز كۇن كورە المايتىنىمىزدى ايتىپ، سانامىزعا قۇيىپ كەلدى.

باي بولۋ ءۇشىن، تابىستى بولۋ ءۇشىن مىندەتتى تۇردە ءبىلىم قاجەت دەپ سەندىرگەنى سونشالىق، مەكتەپتى التىن بەلگىگە اياقتاپ، قىزىل ديپلوم الۋعا بارىنشا تىرىسىپ باقتىق. ال شىنداپ كەلگەندە ۇزدىك وقۋشىلار كادىمگى كوپشىلىكتەن ەشقانداي ايىرماشىلىعى بولماي، كەرىسىنشە ورتاشا جالاقىعا كۇنىن زورعا كورىپ جۇرگەن ادامعا اينالادى. مۇنىڭ سەبەبى نەدە؟ نەگە كەرىسىنشە ەڭ ناشار دەيتىن وقۋشىلار تابىستى كاسىپكەرلەرگە اينالىپ، مۇرنىن ءشۇيىرىپ، باي بولىپ شىعا كەلەدى؟

ەڭ الدىمەن جۇمىس بەرۋشى ءسىزدىڭ مەكتەپتەگى اتتەستاتىڭىزعا قارامايتىنىن ءبىلىڭىز. وعان كەرەگى تەك ءسىزدىڭ تاجىريبەڭىز بەن كاسىبي داعدىلارىڭىز. ءتىپتى ديپلومداعى بەستىكتەردەن قاراعاندا، كومپيۋتەردى ءبىلۋىڭىز بەن سپورتتىق جەتىستىكتەرىڭىز ماڭىزدىراق ءرول اتقارادى.

ەشتەڭە دە ماڭگى ەمەس. ءسىزدىڭ مەكتەپتە العان ءبىلىمىڭىز بەن جاتتاعاندارىڭىز ەسىڭىزدەن شىعىپ كەتۋى مۇمكىن. سەبەبى ءسىز ونى كۇندەلىكتى قايتالاپ وتىرمايسىز عوي. ونىڭ ورنى باسقا دا كۇندەلىكتى ادەتكە اينالعان داعدىلار مەن ءىس- ارەكەتتەرگە، اقپاراتتارعا تولا باستاعاندا ەسكىرگەن اقپاراتتار ەرىكسىز ساناڭىزدان وشەدى. سوندىقتان تەوريالىق بىلىمگە قاراعاندا پراكتيكالىق بىلىمگە كوبىرەك نازار اۋدارىڭىز.

مەكتەپ سىزگە ەشقانداي پراكتيكالىق ءبىلىم بەرمەيدى. مەكتەپتە العان ءبىلىمىڭىز ومىرىڭىزگە ەشقانداي كادەگە جاراماۋى مۇمكىن. قايتا مەكتەپتەن تىس اينالىسقان سۇيىكتى ءىسىڭىز جەتىستىككە جەتۋگە سەپتىگىن تيگىزۋى مۇمكىن.

ءسىز مەكتەپتى ۇزدىك اياقتاپ، تاعى 4 جىل جوعارعى وقۋ ورنىندا وقىپ، مامان يەسى بولىپ شىعىپ جۇمىسقا ورنالاسا الماي جۇرگەنىڭىزدە ءسىزدىڭ مەكتەپتە ەڭ ناشار وقىعان، جوعارعى وقۋ ورنىنا تۇسە الماعان سىنىپتاسىڭىز جاي عانا 3 اي شاشتاراز ماماندىعىن وقىپ، سول ۋاقىت ارالىعىندا ءسان سالونىنىڭ يەسى بولىپ وتىرماسىنا كەپىلدىگىڭىز بار ما؟

ۇزدىك وقۋشى بولۋ ومىردە كەزدەسەتىن سترەسستىك سيتۋاتسيالارعا داعدىلاندىرمايدى. كەرىسىنشە ءسىزدى تەك ماقتاۋقۇمارلىققا ۇيرەتۋى مۇمكىن.

ۇزدىك وقۋشى ەرەجە جاتتاپ بەستىك الۋعا ابدەن داعدىلانىپ كەتەدى. ال ەكىگە وقيتىن وقۋشىلار نەمەسە ءبىلىمى ناشار بولعان وقۋشىلار ومىردە وڭتايلى شەشىم قابىلداۋعا بەيىم بولادى. سەبەبى جاتتاماعان نەمەسە وقىماعان ءۇي تاپسىرماسى ءۇشىن جازالانباۋ ءۇشىن ادەتتەن تىس شەشىمدەر قابىلداۋىنا تۋرا كەلەدى. بۇل ولاردىڭ ميىن جاتتىقتىرىپ، ۇلكەن ومىردە دە كومەكتەسەدى.

وقىمىستىلار ادەتتە كوپ سويلەمەيدى. ال ومىردە جەتىستىككە جەتۋ ءۇشىن وراتورلىق قابىلەت قاجەت- اق.

الايدا بۇل مەكتەپتى مۇلدە وقىماسىن نەمەسە ناشار وقىسىن دەگەن ءسوز ەمەس. كەرىسىنشە مەكتەپتەگى بىلىممەن قاتار ءوزىڭىزدى جان- جاقتى دامىتۋعا بار كۇش- جىگەرىڭىزدى سالساڭىز، مىندەتتى تۇردە ۇلكەن جەتىستىكتەرگە قول جەتكىزەرىڭىز انىق.

سوڭعى جاڭالىقتار