قىزىلوردادا كونە قالاشىق تۋرالى كورمە ۇيىمداستىرىلدى

قىزىلوردا. قازاقپارات - قىزىلوردا وبلىستىق تاريحي-ولكەتانۋ مۋزەيىندە «قىشقالا قازىناسى» اتتى كورمە ۇيىمداستىرىلدى، دەپ حابارلايدى قازاقپارات ءتىلشىسى.

اتالمىش يگى شارا تۇڭعىش پرەزيدەنت - ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسى اياسىندا جۇزەگە اسىرىلدى.

ورتا عاسىرلىق قىشقالا شاھارى شامامەن ХІІІ-ХҮ عاسىرلاردا ءومىر سۇرگەن. كونەنىڭ كوزىندەي قاستەرلى مەكەن سىرداريا اۋدانى، قوعالىكول اۋىلىنان شىعىسقا قاراي 2 شاقىرىم جەردە ورنالاسقان. قالاشىقتا العاشقى زەرتتەۋ 1899-جىلى سىردىڭ تومەنگى اعىسىنداعى قالالاردى زەردەلەگەن ۆ. كاللاۋردىڭ باستاماسىمەن ىسكە اسقان.

وتكەن جىلدان باستاپ قىشقالادا بەلگىلى عالىم ماديار ەلەۋوۆتىڭ باسشىلىعىمەن ارحەولوگيالىق قازبا جۇمىستارى قولعا الىندى. اتالمىش شارا بارىسىندا قيما ورنەكتەن سالىنعان كەسەنە مەن ەكى نەگىزگى عيماراتىنىڭ ورنى تولىقتاي اشىلدى. قالادا ىشكى ساۋدا دامىعانى اڭعارىلادى. 30 گەكتارعا جۋىق اۋماقتى الىپ جاتقان شاھاردىڭ سولتۇستىك شەتىندە قىشتان سوعىلعان ۇلكەن سارايدىڭ قالدىقتارى ساقتالعان. بۇل جەردىڭ شەبەرلەرى كوپتەگەن سان الۋان شارۋاشىلىق، تۇرمىستىق جانە قۇيما قىشىن دايىنداعان. جەكەلەگەن ءۇي-جايلاردىڭ كوشەگە قارايتىن الدىڭعى بەتتەرى ويىپ جاسالعان كىرپىشتەرمەن اشەكەيلەنگەن. ءىرى ساۋدا ورتالىعى بولعاننان كەيىن، ءتۇرلى مادەنيەت، سان الۋان ونەر تۇرلەرى وسى قالاشىقتا توعىسقان دەپ بولجام ايتۋعا بولادى. قىشقالادا زەرگەرلىك شەبەرحانانىڭ بولعانى تۋرالى ارحەولوگيالىق ايعاقتار بار.

وبلىستىق تاريحي-ولكەتانۋ مۋزەيىندەگى تانىمدىق كورمەنى قالا تۇرعىندارى مەن قوناقتار كەلىپ تاماشالادى. شەتەلدىك مەيماندار قاتارىندا قىتايدان كەلگەن جيھانكەزدەر بار.