شەكارادان زاڭسىز وتكەن قىتاي ازاماتتارىنا قاتىستى شەكارا قىزمەتىنىڭ ديرەكتورى تۇسىنىك بەردى

نۇر- سۇلتان. قازاقپارات – ق ر شەكارا قىزمەتىنىڭ ديرەكتورى دارحان ءدىلمانوۆ شەكارادان زاڭسىز وتكەن قىتاي ازاماتتارى مۇراگەر ءالىم ۇلى مەن قاستەر مۇساقانعا قاتىستى تۇسىنىك بەردى، دەپ حابارلايدى قازاقپارات ءتىلشىسى.

 دارحان ءدىلمانوۆتىڭ سوزىنە قاراعاندا، تەرگەۋ امالدارىنان كەيىن شەكارادان زاڭسىز ءوتۋ فاكتىسى بويىنشا سوت بولادى. اتالعان ازاماتتارعا قاتىستى بۇدان باسقا ايىپ تاعىلىپ وتىرعان جوق. بۇل كۇدىكتىلەرگە ءبىر جىل باس بوستاندىعىنان ايىرۋ نەمەسە شارتتى جازا دا قولدانىلۋى مۇمكىن.

«مەملەكەتتىك شەكارانى بۇزۋ شىعىس قازاقستان وبلىسى زايسان شەكارا وتريادى ۋچاسكەسىندە تىركەلدى. قىتاي ازاماتتارى شەكارانى زاڭسىز قيىپ وتكەن جەردى وزدەرى كورسەتتى. ءبىز وسى مالىمەتتەردى تىركەدىك، سول جەردە انىقتالعان زاتتاي ايعاقتار دا بار. ولار بۇل زاتتار وزدەرىنە تيەسىلى بولعانىن راستادى»، - دەدى د. ءدىلمانوۆ.

مۇنداي جاعداي وتە سيرەك كەزدەسەتىنىنە توقتالعان ول، «مەملەكەتتىك شەكارا وتە بەرىك ەكەنىن اتاپ وتكىم كەلەدى. بۇل تۇرعىدا ادامي فاكتور ورىن الۋى مۇمكىن. سايكەسىنشە، ءبىز ءتيىستى تەكسەرۋدى جۇرگىزىپ جاتىرمىز. وسى ورايدا مەملەكەتتىك شەكارانى كۇزەتۋ بويىنشا كەيبىر قادامداردى وزگەرتەمىز.

ونىڭ ايتۋىنشا، اتالعان وقيعادان قازاقستان شەكارا قىزمەتى قىزمەتتىك تەكسەرۋ جۇرگىزدى.

«ءتيىستى تەكسەرۋ جۇرگىزىلدى، بارلىعى ءتيىستى جازاسىن الادى. لاۋازىم يەلەرى جازاعا تارتىلادى. ولار قاتارداعى ساربازدار ەمەس، ياعني لاۋازىمدى ادامدار. وسى ورايدا شەكارا بەكەتىنىڭ باسشىسى، شەكارا كومەنداتۋراسىنىڭ كومەندانتى بار. «زايسان» ءبولىمىنىڭ كومانديرى قىزمەتىنەن شەتتەتىلدى»، - دەدى د. ءدىلمانوۆ.

بۇدان بۇرىن حابارلانعانداي، 10 - قازاندا قىتاي ازاماتتارى مۇراگەر ءالىم ۇلى مەن قاستەر مۇساقانعا قاتىستى ق ر قىلمىستىق كودەكستىڭ 392-بابى 1-بولىگىندە قاراستىرىلعان «قازاقستان رەسپۋبليكاسىنىڭ مەملەكەتتىك شەكاراسىن قاساقانا زاڭسىز ءوتۋ» بويىنشا سوتقا دەيىنگى تەكسەرۋ باستالدى.

اۆتور رۋسلان عابباسوۆ