قىرعىز ەلىنىڭ زاڭدارىن جازعان قازاق ەكەنىن بىلەسىز بە؟

نۇر-سۇلتان. قازاقپارات – ​ ك س ر و تاراعاننان كەيىن پوستكەڭەستىكتە پايدا بولعان تاۋەلسىز مەملەكەتتەر العاشقى كەزەكتە وزدەرىنىڭ كونستيتۋتسيالارىن قابىلدادى.

وزبەكستان - 1991 -جىلى، تۇركىمەنستان - 1992 -جىلى، قىرعىزستان جانە رەسەي فەدەراتسياسى - 1993 -جىلى، بەلارۋس، مولدوۆا، تاجىكستان - 1994 -جىلى جانە ءازىربايجان، ارمەنيا، گرۋزيا - 1995 -جىلى، ال ۋكراينا - 1996 -جىلى.

العاشقى قابىلداعان كونستيتۋتسيا مەملەكەت ىرگەتاسىن قالاعان ەڭ قاجەتتى قۇقىقتىق مەحانيزمدەردى بەكىتتى. وعان سول رەسپۋبليكالارداعى بىلىكتى قۇقىقتانۋشىلار تارتىلدى. سولاردىڭ قاتارىندا، جەرلەسىمىز، بىلىكتى قۇقىقتانۋشى سەرىقۇل قوساقوۆ قىرعىزستان رەسپۋبليكاسىنىڭ نەگىزگى زاڭىن جاساۋشىلار قاتارىنان تابىلدى. ول 1993 -جىلى 5 -مامىردا قابىلدانعان قىرعىز رەسپۋبليكاسىنىڭ تۇڭعىش كونستيتۋتسياسىنىڭ اۆتورى - تاۋەلسىز ەلدىڭ كونستيتۋتسياسىن جازۋ ءۇشىن ۇيىمداستىرىلعان ارنايى جۇمىسشى توپتىڭ جەتەكشىسى بولدى.

بۇعان دەيىن، قىرعىزستاننىڭ «مەملەكەتتىك ءتىل تۋرالى»، «قىرعىزستاننىڭ سۋۆەرەنيتەتى تۋرالى»، «ازاماتتىق تۋرالى» (1989-1993 -جىلدار ارالىعىندا) زاڭداردى جازۋعا قاتىسقان بولاتىن.

سەرىقۇل قوساقوۆ - جامبىل وبلىسى، قورداي اۋدانى، جاڭا تۇرمىس اۋىلىندا 1945-جىلى دۇنيەگە كەلگەن. تۋعان اۋىلىندا 7 جىلدىق مەكتەپتى بىتىرگەن سوڭ، كورشىلەس بىشكەك قالاسىندا تۇراتىن اعاسىنا شايتان اربامەن بارىپ، وسىندا وقۋىن جالعاستىرادى. قىرعىزستان استاناسىنداعى بىردەن-ءبىر ايتۋلى قىرعىز ۇلتتىق گيمنازياسىن ۇزدىك ديپلوممەن بىتىرگەن وعان قىرعىزاعايىندار اراسىندا ءومىر سۇرۋگە جازادى. بالاساعۇن اتىنداعى قىرعىز ۋنيۆەرسيتەتىنىڭ زاڭ ينستيتۋتىندا كونستيتۋتسيالىق قۇقىق فاكۋلتەتىنىڭ دەكانى، ادىلەت ءمينيسترىنىڭ ءبىرىنشى ورىنباسارى، رەسپۋبليكالىق تورەلىك سوت ءتوراعاسى لاۋازىمىندا جاۋاپتى قىزمەتتەر اتقارادى.

تۋعان جەردەن وكشەسى كوتەرىلگەن ۇل، تۋعاندارىنان ءجىبىن ۇزگەن ەمەس. ءار جىلدارى تۋعان جەرگە كەلىپ، تاعزىم ەتۋدى ۇمىتپاعان.

قىرعىزستان قازاقتارى اسسامبلەيا ءتوراعاسىنىڭ ورىنباسارى رەتىندە ءوز ۇسىنىستارىن قازاقستان ۇكىمەتىنە بەرىپ وتىرۋدا ۇمىتپاعان. اتتەڭ، 1995 -جىلى استانادا وتكەن دۇنيەجۇزىلىك قازاقتاردىڭ قۇرىلتايىندا قازاق-قىرعىز بەرلەسكەن ۋنيۆەرسيتەتىن اشىپ، وعان قازاقستان پرەزيدەنتىنىڭ ەسىمىن بەرۋ تۋرالى ءوتىنىشىنىڭ جاۋاپسىز قالعانىنا نالىپ-اق ءوتىپتى.

بۇل كۇندە سەرىقۇل اعامىز ورتامىزدا جوق. ءومىرىنىڭ سوڭىندا بىشكەك قالاسىنداعى ماناس كوشەسىنە مۇحتار اۋەزوۆكە مەموريالدىق تاقتا ورناتقاننان كەيىن 2013 -جىلدىڭ 15 -شىلدەسىندە دۇنيەدەن ءوتىپتى.

«ءبىز بىلمەيتىن قازاقتار» كىتابىنان