قازاقستاندىق اۋەكومپانيالار ساۋد ارابياسىنا ەكى تۇراقتى رەيس اشۋدى جوسپارلاپ وتىر

نۇر- سۇلتان. قازاقپارات - قازاقستاندىق اۋەكومپانيالار ساۋد ارابياعا تۇراقتى رەيستەردى ورىنداۋ ءۇشىن سەرتيفيكاتتاۋدان وتۋدە، دەپ حابارلايدى قازاقپارات ق ر ي ي د م ازاماتتىق اۆياتسيا كوميتەتىنە سىلتەمە جاساپ.

«ەير استانا» اۋەكومپانياسى الماتى - مەدينا جانە الماتى - جيددا باعىتى بويىنشا اپتاسىنا 2 رەيس جيىلىكپەن تۇراقتى رەيستەردى ورىنداۋدى جوسپارلاپ وتىر. قازىرگى ۋاقىتتا كومپانيا اتالعان رەيستەردى ورىنداۋعا رۇقسات الۋ ءۇشىن قۇجاتتاردى تاپسىردى. ءتيىستى رۇقسات العاننان كەيىن اۋەكومپانيا وسى رەيستەردى ورىنداۋدى 2019 -جىلدىڭ سوڭىنا دەيىن باستاۋعا دايىن. ءوز كەزەگىندە، «SCAT» اۋە كومپانياسى الماتى - جيددا (سارسەنبى) جانە الماتى - مەدينا (سەنبى) باعىتتارى بويىنشا ۇشۋلاردى ورىنداۋدى 2019 -جىلدىڭ جەلتوقسان ايىنان باستاپ Boeing-757 ءتيپتى اۋە كەمەسىندە باستاۋدى جوسپارلاپ وتىر. قازىرگى ۋاقىتتا كومپانيا ساۋد ارابيا كورولدىگىندە سەرتيفيكاتتاۋ راسىمىنەن ءوتىپ جاتىر.

 «قازاقستان رەسپۋبليكاسى مەن ساۋد ارابيا كورولدىگىنىڭ اۆياتسيالىق بيلىك ورىندارى اراسىنداعى قولدانىستاعى كەلىسىمگە سايكەس، ەكى تاراپتىڭ تاعايىندالعان اۋەكومپانيالارى ءار تاراپتان ەلدەر اراسىندا اپتاسىنا 4 جولاۋشى جانە 3 تۇراقتى جۇك تاسىمالداۋ رەيستەرىن ورىنداۋعا قۇقىلى. ساۋد ارابيا تاسىمالداۋشىلارى ءۇشىن رۇقسات ەتىلگەن قالالار - نۇر- سۇلتان، الماتى، شىمكەنت جانە قاراعاندى، ال قازاقستاندىق تاسىمالداۋشىلار ءۇشىن ەر- رياد، ءجيددا، مەدينا جانە داممام» ، دەلىنگەن حابارلامادا.

ايتا كەتەرلىگى، قازاقستاندىق «SCAT» اۋەكومانياسى 2016 -جىلدان باستاپ قاجىلىق ماۋسىمى كەزەڭىندە قازاقستاندىق قاجىلاردى تاسىمالداۋ بويىنشا ساۋد ارابياسىنا رەيستەردى ورىندايدى، الايدا بۇل باعىتتار تۇراقتى ەمەس. ارابتار تاراپىنان قازاقستاندىق قاجىلاردى تاسىمالداۋ رەيستەرىن «Fly Nas» اۋە كومپانياسى جۇزەگە اسىرادى.