پرەزيدەنت ماس جۇرگىزۋشىلەردى قاتاڭ جازالاۋدى تاپسىردى
پرەزيدەنتتىڭ ايتۋىنشا، الماتى تۇرعىندار مەن قوناقتار ءۇشىن قاۋىپسىز قالاعا اينالۋى كەرەك.
«ەلىمىزدە، ونىڭ ىشىندە الماتىدا جول-كولىك وقيعالارىنىڭ كوپ تىركەلەتىنى الاڭداتادى. ادامدار قازا تاۋىپ، جاراقاتتانىپ جاتىر. جول اپاتىنان زارداپ شەككەندەر سانى باسقا ەلدەردەگى قارۋلى قاقتىعىستاردان قازا تاباتىنداردىڭ سانىنان كەم ەمەس. جول قوزعالىسى مادەنيەتى ايتارلىقتاي تومەندەپ كەتتى. سوندىقتان، كەشەندى شارالار قولدانۋ كەرەك. الكوگولدىڭ كەز كەلگەن ءتۇرىن كەز كەلگەن مولشەردە قابىلداپ، كولىكتى تىزگىندەگەنى ءۇشىن جازانى قاتاڭداتۋدى زاڭناماعا ەنگىزۋدى تاپسىردىم. بۇل ەسىرتكى مەن باسقا دا پسيحوتروپتىق زاتتارعا دا قاتىستى»، - دەدى پرەزيدەنت الماتى قالاسىن دامىتۋ ماسەلەلەرى جونىندەگى كەڭەستە.
سونداي-اق، پرەزيدەنت ماس نەمەسە ەسىرتكى جانە باسقا دا پسيحوتروپتىق زاتتاردى قابىلداعان سوڭ سانالى تۇردە كولىككە وتىرىپ، جول ەرەجەسىن بۇزعاندارعا قاتىستى زاڭ تالاپتارىن قاتايتۋ تۋرالى ايتتى.
«بۇل - ازاماتتارىمىزدىڭ زاڭدى قۇقىعىنا قارسى باعىتتالعان اۋىر قىلمىس. مۇنداي قىلمىستىڭ اۋىرلىعىنا بايلانىستى قاماپ، ءىرى ايىپپۇلدار سالىپ، اۆتوكولىكتەرىن تاركىلەپ، كولىك جۇرگىزۋ قۇقىعىنان ءومىر بويى ايىرۋ كەرەك»، - دەدى مەملەكەت باسشىسى قاسىم- جومارت توقايەۆ.
اۆتور: الما مۇقانوۆا