كيىز ءۇي ىشىندەگى تۇڭعىش ەكسپەريمەنتالدىق مۋزىكالىق قويىلىم بولدى
«شاڭىراق» ەكسپەريمەنتالدىق مۋزىكالىق قويىلىمىنىڭ ءساتتى وتكەن الدىن الا كورسەتىلىمى تالعامپاز كورەرمەننىڭ وڭ باعاسىن الىپ وتىر، دەپ حابارلايدى قازاقپارات ءتىلشىسى.
«شاڭىراق» پەرفورمانسىنىڭ الدىن الا كورسەتىلىمى بۇگىن «Qazaqstan» ورتالىق كونتسەرت زالىندا ارنايى قويىلعان ۇلكەن كيىز ۇيدە ءوتتى.
«شاڭىراق» - بۇل جاڭا باعىتتاعى ەكسپەريمەنتالدى مۋزىكالىق پەرفورمانس. بارلىق كورىنىستەر قازاق حالقى ءۇشىن بىرلىكتىڭ سيمۆولى - كيىز ءۇيدىڭ ىشىندە ساحنالاندى. ارتىستەر مەن كورەرمەندەر اراسىنداعى قاشىقتىقتىڭ جوقتىعى، ۋاقىت پەن كەڭىستىك كوكجيەگىنىڭ توعىسۋى كيىز ۇيدەگى ەرەكشە اتموسفەرانى تولىقتاي سەزىنۋگە مۇمكىندىك بەردى. قويىلىم يدەياسى مەن سيۋجەتى بۇگىنگى تاڭدا كوكەيكەستى ەكەندىگىن اتاپ ءوتۋ كەرەك. «شاڭىراق» پەرفورمانسىندا ۇلى دالا ەلىنىڭ ماڭگىلىك قۇندىلىقتارى تاماشا كورىنىس تاپقان.
ولار - ۇلتتىق مۋزىكالىق ونەر، ەجەلدەن كەلە جاتقان ادەت- عۇرىپتار، ۋاقىت سىنىنان وتكەن سالت- داستۇرلەر. مۋزىكالىق سپەكتاكل ادام ءومىرىنىڭ تال بەسىكتەن جەر بەسىككە دەيىنگى ساتتەرىن قازاقتىڭ سالت- داستۇرلەرىمەن شەبەر بايلانىستىرىپ كورسەتىلدى. كەيىپكەرلەردىڭ ىشكى سەزىمدەرى مۋزىكالىق اريا، دۋەت، تريو، حور ارقىلى ەرەكشە جانردا جەتكىزىلدى. ساحنالىق قويىلىمنىڭ ءار كەزەڭى حالىق اندەرىمەن ارلەنىپ، مۋزىكالىق اسپاپتارمەن سۇيەمەلدەنىپ، زاماناۋي حورەوگرافيامەن ۇيلەسىم تاپتى.
«قازاق حالقى ءۇشىن شاڭىراق قاستەرلى دە قاسيەتتى ۇعىم. بۇگىن تالانتتى جاستار «شاڭىراق» تۋىندىسىن ساحنالاپ، قازاق مۋزىكالىق ونەرىنىڭ قاراشاڭىراعى – قازاق كونسەرتتىڭ 60 جىلدىق مەرەيتويى مەن جاستار جىلى اياسىندا كەرەمەت تارتۋ جاسادى. ۇلتتىق قۇندىلىقتارىمىزدى قادىر تۇتقان ونەرپاز جاستار كوپشىلىككە رۋحاني ازىق سىيلاپ، زامان كوشىمەن جالعاسىپ بۇگىنگى كۇنگە جەتكەن سالت-ءداستۇر، ادەپ-عۇرىپتارىمىزدىڭ قايتا جاڭعىرۋىنا ۇلەس قوستى»، - دەدى ول.
«شاڭىراق» پەرفورمانسى «استانا ميۋزيكل» تەاترىنىڭ كوركەمدىك جەتەكشىسى ەسلام نۇرتازيننىڭ رەجيسسەرلىگىمەن قويىلدى. ليبرەتتو اۆتورى ءانناس باعدات، كومپوزيتورى بولاتبەك نۇرقاسىموۆ بولسا، حورمەيستەرى - المات ابىشەۆ.
قويىلىمنىڭ بارشا كورەرمەن قاۋىمعا ارنالعان پرەمەراسى دا ءدال وسى جەردە 5-6 -قاراشا كۇندەرى ۇسىنىلادى.
اۆتور: ايان بەكەن ۇلى