شەتەلدەگى قازاقتاردى قورعايتىن مەملەكەتتىك باعدارلاما ازىرلەنەدى

نۇر- سۇلتان. قازاقپارات - «وتانداستار» قورى شەت ەلدەردەگى ەتنيكالىق قازاقتارعا قولداۋ كورەتۋ جۇمىستارى تۋرالى باياندادى، دەپ حابارلايدى قازاقپارات ءتىلشىسى.

«وتانداستار» قورىنىڭ ۆيتسە- پرەزيدەنتى ماعاۋيا سارباسوۆتىڭ ايتۋىنشا، ارنايى جول كارتاسى مەن قوردى دامىتۋ جوسپارى بەكىتىلگەن.

«جوسپارعا سايكەس، شەتەلدەگى قازاقتاردى قولداۋ مەن ەرىكتى قونىس اۋدارۋى بويىنشا مەملەكەتتىك باعدارلاما ازىرلەنەدى. شەتەلدەگى وتانداستاردى مەملەكەتتىك قولداۋ تۋرالى ق ر زاڭى دايىندالادى. وتانداستارعا اقپاراتتىق قولداۋ ورتالىعىڭ، ديالوگ الاڭدارىنىڭ جۇمىسى ۇيىمداستىرىلادى. شەت ەلدە قازاق ءتىلىن ۇيرەتۋ بويىنشا وقىتۋ ينفراقۇرىلىمى جاسالادى» ، - دەدى ماعاۋيا سارباسوۆ استانادا «ادام جانە ەتنيكالىق ازشىلىقتار قۇقىقتارىن قورعاۋ» دوڭگەلەك ۇستەلىندە.

سپيكەردىڭ ايتۋىنشا، قازىر وتانداستاردى قولداۋ مەن ولاردى تاريحي وتانعا قايتارۋ بويىنشا وزگە ەلدەردىڭ تاجىريبەسى زەرتتەلىپ جاتىر. ماقساتتى ساراپتامالىق زەرتتەۋلەر جۇرگىزىلۋدە. بۇل جۇمىس ناتيجەسىندە ناقتى ۇسىنىمدار، قورىتىندى ماتەريالدار ازىرلەنەدى جانە اقپارات جانە قوعامدىق دامۋ مينيسترلىگىنە ۇسىنىلادى.

ءوز كەزەگىندە، ق ر اقپارات جانە قوعامدىق دامۋ مينيسترلىگى ەلدەگى ەتنيكاارالىق قاتىناستاردىڭ قالاي رەتتەلەتىنىن ءتۇسىندىردى.

«ەتنيكاارالىق جانە كونفەسسياارالىق كەلىسىمدى ساقتاۋ ەلىمىز ەڭ ماڭىزدى باسىمدىق بولىپ قالا بەرەدى. مينيسترلىك قىزمەتى ارقىلى ەتنيكالىق ب ا ق- تارعا قولداۋ كورسەتىلەدى. قازاقستاندا 52 ەتنيكالىق ب ا ق 12 تىلدە جۇمىس ىستەيدى. مينيسترلىك تۇراقتى نەگىزدە ەتنيكاارالىق سالاعا قۇقىقتىق مونيتورينگ جۇرگىزەدى. ول ءۇشىن ەتنيكاارالىق قارىم- قاتىناستار سالاسىن رەتتەيتىن زاڭنامالىق جانە نورماتيۆتىك- قۇقىقتىق بازانى ۇنەمى جەتىلدىرىپ وتىرامىز. 2018 -جىلى قازاقستان حالقى اسسامبلەياسى تۋرالى زاڭعا تۇزەتۋلەر ەنگىزىلدى، وندا اسسامبلەيانىڭ ەتنومادەني بىرلەستىكتەرىنە قاتىستى جاڭا ەرەجەلەر ەنگىزىلدى» ، - دەدى ق ر اقپارات جانە قوعامدىق دامۋ مينيسترلىگى ەتنيكاارالىق قاتىناستاردى دامىتۋ دەپارتامەنتىنىڭ ديرەكتورى عالىم شويكين.