ءبىزدى كوپ سىنايدى، ءبىراق ودان قورقىپ جاتقانىمىز جوق - ءشامشيدينوۆا

نۇر- سۇلتان. قازاقپارات - پەداگوگ ءوز لوگيكاسىن دامىتۋعا، كوشباسشىلىق داعدىلارىن قولدانۋعا، يننوۆاتسيالاردى شىعارماشىلىق جولمەن ەنگىزۋگە مۇددەلى بولۋى كەرەك.

بۇل تۋرالى ەلوردادا ءوتىپ جاتقان «نازاربايەۆ زياتكەرلىك مەكتەپتەرى» ۇيىمدارىنىڭ «مەكتەپ الەمىن وزگەرتەتىن - ۇستازدار» حالىقارالىق كونفەرەنتسياسىندا ايتىلدى، دەپ حابارلايدى قازاقپارات ءتىلشىسى.

«تەك قانا ءپاندى ءبىلىپ قويۋ - جەتكىلىكسىز. مۇعالىم الدىمەن وزىنە- ءوزى سەنۋى ءتيىس. ول بارلىق وقۋشىنىڭ وقىپ، دامي الاتىنىنا سەنۋى كەرەك. «بالانىڭ دەڭگەيى وسىدان ارتپايدى» دەپ ءبىرجاقتى باعالاۋعا بولمايدى. مۇعالىم ءوز ارەكەتى ارقىلى وقۋشىنى ءتۇسىنىپ، قولداي الاتىنىن كورسەتە ءبىلۋى قاجەت»، - دەيدى «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتوراعاسى كۇلاش ءشامشيدينوۆا.

اتاپ وتىلگەندەي، پەداگوگتىڭ مادەني- ينتەللەكتۋالدىق دەڭگەيىنىڭ جوعارى بولۋى اسا ماڭىزدى.

«مادەني زيات دەڭگەيى جوعارى ماماندار ومىردەگى جانە جۇمىستاعى قيىنشىلىقتارعا بارىنشا مويىماي، ءتيىمدى شەشىم قابىلدايدى. مۇعالىمنىڭ ءوز زياتكەرلىك قۇزىرەتىن دامىتىپ وتىرۋعا مۇمكىندىگى بولۋى ءتيىس. ول لوگيكاسىن دامىتۋعا، كوشباسشىلىق داعدىلارىن قولدانۋعا، يننوۆاتسيالاردى شىعارماشىلىق جولمەن ەنگىزۋگە مۇددەلى بولۋى كەرەك. ءومىر بويى ءبىلىم الۋ وقۋشىلار ءۇشىن عانا ەمەس، ۇستازدار ءۇشىن دە ماڭىزدى»، - دەيدى «نازاربايەۆ زياتكەرلىك مەكتەپتەرى» د ب ب ۇ ءتوراعاسى.

سونداي- اق، كۇلاش ءشامشيدينوۆا  مۇعالىم ءوزىن تەك قىزمەت كورسەتۋشى عانا ەمەس، وقۋشىنىڭ الەۋمەتتىك، مادەني جانە تىلدىك تاجىريبەسىن ەسكەرىپ، ولاردىڭ ءبىلىم الۋىنا وڭ ىقپال ەتەتىن وزگەرىستەردى قوزعاۋشى كۇش رەتىندە سەزىنۋى ءتيىس ەكەنىن تىلگە تيەك ەتتى.

«نازاربايەۆ زياتكەرلىك مەكتەپتەرى» ەلىمىزدىڭ ءبىلىم بەرۋ جۇيەسىندە جاڭارتىلعان ءبىلىم بەرۋ مازمۇنىن ەنگىزۋ جاۋاپكەرشىلىگىن وزىنە الا الدى. وزدەرىڭىز بىلەسىزدەر، 2016 -جىلدان بەرى وسى ماسەلەگە بايلانىستى ءبىزدى كوپ سىناپ جاتىر. ودان قورقىپ وتىرعان جوقپىز. سەبەبى ءبىز ءوز ماماندارىمىزعا سەنەمىز»، - دەدى ول.

ەسكە سالا كەتسەك، ەلوردادا مىڭنان استام پەداگوگتىڭ قاتىسۋىمەن «نازاربايەۆ زياتكەرلىك مەكتەپتەرى» ۇيىمدارىنىڭ «مەكتەپ الەمىن وزگەرتەتىن - ۇستازدار» حالىقارالىق عىلىمي- تاجىريبەلىك كونفەرەنسياسى ءوتتى.

وندا ق ر ءبىلىم جانە عىلىم ۆيتسە- ءمينيسترى شولپان كارينوۆا ءبىلىم سالاسىنداعى باستى ستراتەگيالىق باعىتتاردىڭ ءبىرى - «نازاربايەۆ زياتكەرلىك مەكتەپتەرىنىڭ» تاجىريبەسىن قازاقستانداعى جالپى ءبىلىم بەرۋ مەكتەپتەرىنە تاراتۋ ەكەندىگىن ايتتى.

اۆتور: زارينا قاھارمان