بەلارۋس ءوز تاۋارىن قازاقستان ارقىلى قىتايعا شىعارادى
الماتى وبلىسىنىڭ «قورعاس» ەركىن ەكونوميكالىق ايماعىندا بەلارۋس تاۋارلارى ساتىلاتىن ارنايى ساۋدا ورتالىعى اشىلدى. بەلارۋس ەلىنىڭ تاۋارلارى ەندى قازاقستان مەن قىتاي نارىعىنا بىردەي شىعارىلادى.
«قورعاس» ەركىن ەكونوميكالىق ايماعىنداعى ساۋدا ورنى وسىنداي مۇمكىندىك بەردى. مۇندا 20-دان استام تاۋار ءوندىرۋشى كومپانيانىڭ ءونىمى قويىلعان. ورتالىقتىڭ اشىلۋ سالتاناتىنا كەلگەن دەلەگاتتار بۇل اۋقىمدى جوبانىڭ باستاماسى ەكەنىن اتاپ ءوتتى.
الەكساندر تۋرچين، بەلارۋس رەسپۋبليكاسى پرەمەر- ءمينيسترىنىڭ ءبىرىنشى ورىنباسارى:
- بۇل - العاشقى قادام. ءبىز وسى ساۋدا ورتالىعى ارقىلى قىتاي نارىعىنا قانداي تاۋار كەرەك ەكەنىن ساراپتايمىز. سوعان سايكەس جۇمىس ىستەيمىز. ياعني ءبىزدىڭ تاۋارلارعا سۇرانىس ارتىپ جاتسا، ۇلكەن ءوندىرىس ورنىن سالامىز. بەلارۋس ستاندارتىمەن الماتى وبلىسىندا ءونىم وندىرەتىن بولامىز.
«قورعاس» اسپان استى ەلىنىڭ الىپ نارىعىنا جول اشادى. سوندىقتان وعان كورشىلەس مەملەكەتتەردىڭ قىزىعۋشىلىعى جوعارى. قازىردىڭ وزىندە 746 گەكتارداعى ەركىن ەكونوميكالىق ايماقتا ساۋدا- ساتتىق، وندىرىستىك جانە تۋريستىك نىسانداردى سالىپ جاتقان ەلدەر بار.
اماندىق باتالوۆ، وبلىس اكىمى:
- «وسى جەردە ت م د- نىڭ پاۆيلوندارى اشىلسىن» دەگەن ەلباسىنىڭ تاپسىرماسى بار. مىناۋ رەسەيدىڭ پاۆيلونى سالىنىپ جاتىر، بارىنە جاعداي جاساپ بەرەمىز.
بەلارۋس جىل سايىن قىتايعا قۇنى 100 ميلليون دوللار بولاتىن قۇرعاق ءسۇت ونىمدەرىن ساتىپ كەلەدى. تاۋار مۇحيتپەن 45 كۇن تاسىمالدانادى. ەندى سول ونىمدەر قازاقستان اۋماعى ارقىلى 15 كۇندە دىتتەگەن جەرىنە جەتكىزىلۋى مۇمكىن. شەتەلدىكتەر «قۇرعاق پورت» جانە «نۇرلى جول» بەكەتتەرىنىڭ جۇمىسىمەن تانىسىپ، ەكسپورت الەۋەتىن ارتتىرۋ مۇمكىندىكتەرىن سارالادى.
www.24.kz