+7 (701) 759 90 19
+7 °С : نۇر-سۇلتان
+14 °С : الماتى
USD 433.15 EUR 515.06
RUB 5.61 CNY 66.06
جاڭالىقتار

قۋانىش ءىلياس. ارقادان ۇشقان التى قاز - ەلەگيا

8 ءساۋىر 13:31
:ءبولىسۋ
قۋانىش ءىلياس. ارقادان ۇشقان التى قاز -  ەلەگيا

نۇر-سۇلتان. قازاقپارات. احاۋ، ساباز! ۇشىردىڭ ۇياسىنان بالاپان قاز... حالىق انىنەن. جەل ۇيتقىپ، قار ارالاس جاڭبىر جاۋىپ تۇر. ارقا ءتۇنىن وياتىپ قازدار قايتىپ بارادى.

التايدان دا ءدال وسىلاي جىل قۇستارى قايتىپ جاتىر- اۋ! ءيا، قاراقارا باستاپ جىل قۇستارى قايتقالى قاشان؟ تەك، شالشىق كولىن قيماي قاراشا قاز عانا بەيعام ءجۇر…

ال، الگى ءبىر اندىك قاسقالداق پەن شۇرەگەي ۇيرەككە جىلى ۇيەكتەن گورى بورسىعان كولى ىستىق سەزىلەدى- اۋ! ءالى قامسىز. قايرانداپ قالعان ولمەلى شاباقتاردى تەرىپ جەگەنىنە ءماز… سامالىنان اڭىز اڭقىعان ۇلى دالانى اققۋدىڭ سۇڭقىلى، قوڭىر قازدىڭ قاڭقىلى، تىرنانىڭ تىراۋى كەرنەپ تۇر. انە، ارقا اسپانىن سۇڭقىلمەن تىلگىلەپ قازدار ۇزاپ بارادى. ءۇش بۇرىش جاساپ رەتتى تىزىلگەن (تىلىمىزدەگى «قاز- قاتار» دەگەن ءسوزدى وسىلار بەرگەن- اۋ). بەينە جەبەنىڭ ۇشىنا ۇقسايدى. قۇيتۇرقى بوراندى قاق ايىرىپ تارتىپ بارادى… جىل قۇستارى جەلدى، جاۋىندى كۇنى ءتۇن جاستانا ساپارعا شىعادى. ايتپەگەندە، بالاپاندارى جۇمىرتقادان شايقالعان جىلى ۇياسىن، قاناتتانعان كولىن، قالىقتاعان جەرىن قيماي قالىپ قويادى. مىنە، مىناۋ قازدار تىرلىك ءۇشىن ۇرپاقتارىن جاڭبىرلى، جەلدى كۇنى اداستىرىپ الىپ ۇشقانى. ولاردىڭ ارتىندا كيىكتىڭ كوزىندەي مولدىرەگەن تۇمالار، سورپانىڭ بەتىندەي شىمىرلاعان كولدەر، كوك ورايلى بەلدەر قالىپ بارادى…

ءيا، ءبىز دە داۋىل، قار ارالاس جاڭبىر ۇدەپ تۇرعان ساتتە، ءدال وسى قازدارداي، التايدان ارقاعا بالاپانىمىزدى ەرتىپ ءبىر تۇندە ۇشىپ جەتكەن ەدىك. ءبىزدىڭ بالاپاندار الدانۋعا دا ۇلگىرمەي قالدى… كوتەرە ۇشۋعا ارقاعا سيماي التاي قالدى. ورتاسىنان بولگەن جىلانداي شورشىپ، ەڭىرەپ ەرتىس قالدى. ەكى كوزدىڭ شاراسىنا قاپەلىمدە تولىپ، توگىلمەي قالعان اشتى جاستاي مولتىلدەپ قاناس پەن ۇلىڭگىر قالدى. بابام باسقان ەرتىك جولدار مەن جوندار قالدى. ءار سايىڭدا بەيىت بەلگىم، بەسىك ۇلگىم قالدى قايتەيىن… ارقانىڭ سىڭسىعان ساعال نۋلارى، اققۋ- قازداي جامىراي قونعان تاعدىرىمىزدى قۋانا قارسى الدى. بالاپاندارىمىز لەزدە باۋىر باسىپ كەتتى… دومبىرانىڭ قوس ىشەگىندەي التاي مەن ارقا ءبىر ىشەگىڭدە مۇڭايىپ، ءبىر ىشەگىڭدە قۋانىپ، شاناعىڭدا شايقالعان قازاقتىڭ تاعدىرى قينايدى مەنى…

ارقادان ۇشقان قازدار كورىنبەي كەتۋگە اينالدى. - قازدار- اۋ، ءبىز قانداي باقىتتىمىز، سەن توڭساڭ ۇشىپ بارار جىلى كولىڭ بار، مەن تورىقسام ۇشىپ جەتەر جەرىم مەن ەلىم بار، - دەپ ايعاي سالدىم… داۋسىمدى ارقا اسپانى قايتالاپ جاتتى…

قۋانىش ءىلياس



:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات