كۇلاش شامشيدينوۆا قازىرگى مۇعالىمدەر قانداي بولۋى كەرەكتىگىن ايتتى
«ءبىز جىل سايىن وسىنداي كونفەرەنسيا ۇيىمداستىرادى. بيىل مەكتەپ الەمىن جاڭعىرتاتىن مۇعالىمدەر ماسەلەسى جان- جاقتى تالقىلانۋدا»، - دەدى «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتوراعاسى كۇلاش شامشيدينوۆا «مەكتەپ الەمىن وزگەرتەتىن - ۇستازدار» كونفەرەنسياسىندا.
ول مۇعالىم ماماندىعى جاھاندىق جانە جەرگىلىكتى دەڭگەيدە جاڭعىرۋدا ەكەنىن ايتتى.
«مۇعالىمنىڭ ءوزى وقۋشىلار، اتا- انالار جانە قوعامدا جاڭا كوزقاراس قالىپتاستىرا باستادى. ءبىز ءبىلىم بەرۋ جۇيەسىن نىعايتىپ، ونىڭ سىرتقى كۇشتەر اسەرىنەن ساپاسىن جوعالتپاۋ جاعىن قامتاماسىز ەتىپ، ءوزىن- ءوزى ۇزدىكسىز جەتىلدىرۋ مەن دامىتۋ ءداستۇرىن بارلىق مەكتەپتەردە قالىپتاستىرۋىمىز كەرەك، - دەيدى كۇلاش شامشيدينوۆا.
كۇلاش شامشيدينوۆا قازىرگى زامانعا ساي مۇعالىم كەلبەتى قانداي بولۋى كەرەكتىگىن ايتتى.
«ۋاقىتتى ءتيىمدى پايدالاناتىن، مىندەتتەردى ناقتى انىقتاي الاتىن، ءتۇيىندى ماسەلەلەردى شەشۋدىڭ ءتيىمدى جولدارىن تەز تاباتىن، ءوزىنىڭ مىندەتى ءۇشىن تولىق جاۋاپكەرشىلىك الا الاتىن كوشباسشى بولۋى ءتيىس»، - دەدى ول.
ەسكە سالا كەتسەك، بۇعان دەيىن وردادا مىڭنان استام پەداگوگتىڭ قاتىسۋىمەن Ⅺ حالىقارالىق عىلىمي- تاجىريبەلىك كونفەرەنسيا ءوتىپ جاتقانى جانە ءبىلىم سالاسىنداعى باستى ستراتەگيالىق باعىت - نازاربايەۆ زياتكەرلىك مەكتەپتەرىنىڭ تاجىريبەسىن جالپى ءبىلىم بەرەتىن مەكتەپتەردە قولدانۋ ەكەنى تۋرالى جازعان بولاتىنبىز.
اۆتور: زارينا قاھارمان