الماتى پروكۋراتۋراسى تاۋدىڭ قۇنارلى توپىراعىن ۇرلاۋ فاكتىسىن تەكسەرەدى

الماتى. قازاقپارات - الماتى قالاسىنىڭ بوستاندىق اۋدانىندا تاۋدىڭ قۇنارلى توپىراق قاباتىن ۇرلاۋ فاكتىسى انىقتالدى، دەپ حابارلايدى قازاقپارات ءتىلشىسى.

«تابيعات» ەكولوگيالىق وداق ءتوراعاسىنىڭ ورىنباسارى تيمۋر ەلەۋسىزوۆ ءوزىنىڭ Instagram پاراقشاسىندا تاۋلى اۋماقتاعى قۇنارلى توپىراق قاباتىن ساتۋ ءۇشىن قازىپ تاستاعانى تۋرالى ۆيدەوجازبا جاريالاعان ەدى.

اتالعان فاكتى بويىنشا تەرگەۋ باستالدى. بۇل ءىس الماتى مامانداندىرىلعان ەكولوگيالىق پروكۋراتۋراسىنىڭ باقىلاۋىندا.

«الماتى قالاسىنىڭ مامانداندىرىلعان ەكولوگيالىق پروكۋراتۋراسى ەكولوگيالىق پوليتسيا بولىمىنە جانە الماتى قالاسى بويىنشا قالا قۇرىلىسى باسقارماسىنىڭ جەر قاتىناستارى سالاسىنداعى ۋاكىلەتتى ورگانعا جاۋاپتىلارعا شارا قولدانۋ جانە ولاردى جاۋاپكەرشىلىككە تارتۋ تۋرالى نۇسقاۋ بەردى. كەمشىلىك ءۇشىن 10-نان 50 اەك- كە دەيىن ايىپپۇل سالىنادى»، - دەپ حابارلادى قالالىق پروكۋراتۋرا.

بۇعان دەيىن الماتىدا بەلگىسىز بىرەۋلەر جەكەمەنشىك الما باعىنىڭ اعاشتارىن كەسىپ تاستاعان بولاتىن. پوليتسيا تۇرعىنداردىڭ شاعىمىنان كەيىن تەرگەۋدى باستادى.

اۆتور: الما مۇقانوۆا