ەلورداداعى «سارى ارقا» گازىنىڭ قانشا بولاتىنى بەلگىسىز

نۇر- سۇلتان. قازاقپارات - ەلوردادا الداعى ۋاقىتتا گاز باعاسى قانشا بولۋى مۇمكىن؟ بۇل سۇراققا نۇر- سۇلتان قالالىق وتىن- ەنەرگەتيكالىق كەشەنى جانە كوممۋنالدىق شارۋاشىلىق باسقارماسى باسشىسىنىڭ مىندەتىن اتقارۋشى ەرنات ءبازىل جاۋاپ بەردى، دەپ حابارلايدى قازاقپارات ءتىلشىسى.

«قالا حالقى گاز باعاسى قالاي بولاتىنىن بىلگىسى كەلەدى. قالا شەتىندەگى تۇرعىندار كومىردى ەرىككەننەن جاعىپ وتىرعان جوق. سول سەبەپتى، گازدىڭ كەلەشەكتە باعاسى قالاي بولاتىنىن ءبىلۋ كەرەك. بۇگىن بۇل سۇراق ءتىپتى بيزنەس وكىلدەرىن دە قاتتى الاڭداتادى. گازدىڭ باعاسى ناقتى قانشا بولادى؟» - دەپ سۇرادى قوعامدىق كەڭەس وكىلدەرى بۇگىن ەلوردا اكىمدىگىندە وتكەن وتىرىستا.

ساۋالعا جاۋاپ بەرگەن ەرنات ءبازىل گاز باعاسى تۋرالى ناقتى مالىمەت جوق ەكەنىن ايتتى.

«شامامەن بەلگىلەنگەن باعا بار. ول قۇجاتقا ەنەرگەتيكا ءمينيسترى قانات بوزىمبايەۆ بۇدان بۇرىن قول قويعان. ول قۇجاتتا 1000 تەكشە مەتر گازدىڭ باعاسى 46 مىڭ تەڭگە دەلىنگەن. بۇل - الدىن الا باعا. ال بۇگىنگى كۇنى مينيسترلىك ناقتى باعانىڭ قانشا بولاتىنىن بەرمەي وتىر. ەكى رەت سۇرادىق. جاۋاپتارى بىردەي: «سارى ارقا» ماگيسترالى بويىنشا جۇمىس اياقتالىپ، ينۆەستيتسيالىق جوبا ەسەپتەلگەننەن كەيىن عانا گاز باعاسى ناقتىلانادى. وسىلاي دەگەنىمىزگە ءۇشىنشى اي بولدى. ءدال قازىر مىڭ تەكشە مەتر گازدىڭ باعاسى ايقىندالماي تۇر. قانداي باعا بەلگىلەنسە دە، الداعى بەس جىلعا ءبىراق بەكىتىلەدى. ياعني، بەس جىل بويى گاز باعاسى كوتەرىلمەيدى»، - دەدى ول.

استانادا «سارى ارقا» گازىنىڭ ءۇي- ۇيلەرگە جەتكىزىلۋىن رەتتەيتىن جاڭا كومپانيا قۇرىلادى.

« ۇكىمەتتەن قانداي كومەك بولاتىنىن سۇراپ جاتىرمىز. ەلوردا اكىمدىگى گازدىڭ سوڭعى تۇتىنۋشىعا جەتكەنگە دەيىنگى باعاسىن تومەندەتۋ ماقساتىندا «ەلوردا- گاز» كاسىپورنىن قۇرۋ تۋرالى شەشىم قابىلدادى. قازىر ءتيىستى قۇجاتتاردىڭ ءبارىن جىبەردىك. ۇلتتىق ەكونوميكا مينيسترلىگىنىڭ تابيعي مونوپوليالاردى رەتتەۋ كوميتەتىنىڭ ماقۇلداۋىندا جاتىر. ولار رۇقسات بەرسە، كوپ ماسەلەلەردى رەتتەي الار ەدىك»، - دەپ جاۋاپ بەردى ەرنات ءبازىل بۇگىن ەلوردا اكىمدىگىندە وتكەن قوعامدىق كەڭەستىڭ وتىرىسىنان كەيىن تىلشىلەردىڭ ساۋالىنا.

ونىڭ ايتۋىنشا، كاسىپورىن الەۋمەتتىك از قامتىلعان وتباسىلاردىڭ ءۇيىن گازداندىرۋ، قازاندىق ساتىپ الۋ جاعىنان كومەكتەسەدى.

«گازدى رەتتەپ وتىراتىن ەسەپتەۋىشتەردىڭ باعاسى - 80-90 مىڭ تەڭگە. وتباسىلاردىڭ جاعدايىنا قاراي، كەيبىرىنىڭ قورشاۋىنا دەيىن گاز جەتكىزسەك، كەيبىرىنىڭ ءتىپتى ۇيىنە كىرگىزىپ بەرۋگە تىرىسامىز. وسى ماسەلەلەردىڭ ءبارىن رەتتەپ وتىرۋ ءۇشىن ارنايى ۇيىم كەرەك»، - دەدى ول.

ەرنات ءبازىلدىڭ ايتۋىنشا، «استانا سۋ ارناسى» كاسىپورنى سۋعا جاۋاپتى بولاتىنى سەكىلدى، «ەلوردا- گاز» - گاز ماسەلەسىن رەتتەمەك.

«جاڭا جىلعا دەيىن قۇجات جۇمىستارى رەتتەلسە، جاڭا جىلدان كەيىن جۇمىستى باستاپ كەتەمىز»، - دەدى ول.

اۆتور: ايان بەكەن ۇلى